ଜୟପୁରରେ ଚାଲିଛି ମତଦାନ । ତାରା-ରବିଙ୍କ ଜବରଦସ୍ତ ଲଢ଼େଇ, ବିଜେଡି-କଂଗ୍ରେସକୁ ଟକ୍କର ଦେଇପାରିବେ କି ବିଜେପିର ନୂଆ ମୁହଁ?
କନକ ବ୍ୟୁରୋ: କୋରାପୁଟ ସଂସଦୀୟ କ୍ଷେତ୍ରର ସବୁଠାରୁ ଗୁରୁତ୍ୱପୂର୍ଣ୍ଣ ଆସନ ମଧ୍ୟରେ ଜୟପୁର ବିଧାନସଭା ଆସନ ଗୁରୁତ୍ୱବହନ କରେ । କାରଣ ଜୟପୁର ବିଧାନସଭା ଆସନ ଦଖଲ ପାଇଁ କଂଗ୍ରେସ ଓ ବିଜେଡି ମଧ୍ୟରେ ସର୍ବଦା ଛକାପଞ୍ଝା ଲାଗି ରହିଥାଏ । ଶାସକ ବିଜେଡି ଓ ବିରୋଧୀ କଂଗ୍ରେସ ଏବଂ ବିଜେପିର ସିପାହୀ ପ୍ରସ୍ତୁତ ହୋଇଥିବାବେଳେ ଆଜି ପ୍ରଥମ ପର୍ଯ୍ୟାୟ ନିର୍ବାଚନରେ ଏଠାରେ ମତଦାନ ଦେଉଛନ୍ତି ମତଦାତା ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ରାଜନୀତିର ଦୁଇ ହେଭିୱେଟ ନେତାଙ୍କ ଲଢେଇକୁ ନେଇ ସର୍ବଦା ଚର୍ଚ୍ଚାରେ ରହି ଆସିଛି କୋରାପୁଟର ଜୟପୁର ବିଧାନସଭା ଆସନ । ଆଉ ଏସବୁ ଭିତରେ ୨୦୧୯ ନିର୍ବାଚନରେ ପୁଣିଥରେ କଂଗ୍ରେସ ତାରାଙ୍କୁ ବାଛିଥିବାବେଳେ ବିଜେଡି ପୁନର୍ବାର ରବିଙ୍କୁ ପ୍ରାର୍ଥୀ କରିବାକୁ ମନସ୍ଥ କରିଛି । ସେପଟେ ବିଜେପି ଏଥର ନୂଆ ମୁହଁ ଗୌତମ ସାମନ୍ତରାୟଙ୍କୁ ଉଭୟଙ୍କ ବିରୋଧରେ ପ୍ରାର୍ଥୀ କରି ମୈଦାନକୁ ଓହ୍ଲାଇଛି । ତେବେ ୫ ବର୍ଷ ପରେ ତାରା ଚମକିବେ ନା ପୁଣିଥରେ ଉଦୟ ହେବେ ରବି ନା ବିଜେପିର ନୂଆ ମୁହଁ ଗୌତମ କିଛି ଚମକ୍ରାର କରି ଦେଖାଇବେ କି ତାହା ଭୋଟ ଫଳାଫଳ ପରେ ହିଁ ସ୍ପଷ୍ଟ ହୋଇଯିବ ।
ଜୟପୁର ବିଧାନସଭା ଆସନ ଗଠନ ହେବା ପରଠାରୁ ଏଠାରେ ୧୫ ଥର ନିର୍ବାଚନ ହୋଇଛି । ଯେଉଁଥିରେ କଂଗ୍ରେସ ସର୍ବାଧିକ ୮ ଥର ଜୟପୁର ଆସନକୁ ହାତେଇଛି । ୧୯୭୪ ମସିହାରୁ ଲଗାତାର ଜିତି ଆସୁଥିବା କଂଗ୍ରେସର ବିଜୟରଥରେ ପ୍ରଥମଥର ପାଇଁ ୨୦୦୦ ମସିହାରେ ବ୍ରେକ ଲଗାଇଥିଲା ବିଜେଡି । ଆଉ ଏହାସହ ୨୦୦୦,୨୦୦୪ ଓ ୨୦୦୯ରେ ନିର୍ବାଚନ ଜିତିବା ସହ ହ୍ୟାଟ୍ରିକ ବିଜୟ ହାସଲ କରିଥିଲେ ରବି ନାରାୟଣ ନନ୍ଦ । ଯାହାର ଫଳ ସ୍ୱରୂପ ତାଙ୍କୁ ଗତ ସରକାରରେ ମଧ୍ୟ ମନ୍ତ୍ରୀପଦ ମିଳିଥିଲା । ୨୦୦୯ ନିର୍ବାଚନରେ ବିଜେପି ଟିକେଟରେ ଲଢିଥିବା ତାରା ପ୍ରସାଦ ବାହିନୀପତିଙ୍କୁ ପାଖାପାଖି ୧୦ହଜାର ଭୋଟରେ ହରାଇଥିଲେ ରବି । ଯାହାର ବଦଲା ୨୦୧୪ରେ କଂଗ୍ରେସ ଟିକେଟରେ ଲଢି ନେଇଥିଲେ ତାରା । ଆଉ ଏହାସହ ରବିଙ୍କ ଗଡରେ ଚମକି ଉଠିଥିଲେ ତାରା । ଏସବୁ ଭିତରେ ଆଗାମୀ ଆଜି ଏଠାରେ ମତଦାନ ହେଉଥିବାବେଳେ ତାରା ଓ ରବିଙ୍କ ମଧ୍ୟରେ ପୁଣିଥରେ ଜୋରଦାର ହେବ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି ।