ଜଣ୍ଡିସ ଆକ୍ରାନ୍ତଙ୍କୁ ନିଆଁ-ପାଣି ବନ୍ଦ କଲେ ଗ୍ରାମବାସୀ । ହାତ ଛାଡିଦେଲା ସ୍ତ୍ରୀ । ସାମାଜିକ ବାସନ୍ଦର କରୁଣ କାହାଣୀ
କନକ ବ୍ୟୁରୋ : ବୈଜ୍ଞାନିକ ଯୁଗରେ ବି ବଂଚିରହିଛି ସାମାଜିକ ବାସନ୍ଦ । ଆଉ ଜଣ୍ଡିସ ରୋଗରେ ଆକ୍ରାନ୍ତ ଜଣେ ଜଣ୍ଡିସ ରୋଗୀଙ୍କୁ ଗାଁ ଲୋକେ ନିଆଁ ପାଣି ବାରଣ କରିଛନ୍ତି । ଆଜି ବି ସମାଜରେ ଏଭଳି ଘୃଣ୍ୟ ପ୍ରଥା ବଂଚି ରହିଥିବା ଜାଣି ଲଜ୍ଜିତ ହେବାକୁ ପଡୁଛି । ଜଣେ ଜଣ୍ଡିସ ଆକ୍ରାନ୍ତ ବ୍ୟକ୍ତିଙ୍କୁ ଗ୍ରାମବାସୀ ସାମାଜିକ ବାସନ୍ଦ କରିଛନ୍ତି। ପତ୍ନୀ ଛାଡ଼ି ପଳାଇବା ପରେ ଏବେ ସେ ଅସହାୟ ଅବସ୍ଥାରେ ଭାଇ ପାଖରେ ପଡ଼ିଛନ୍ତି। ଏଭଳି ଘଟଣା ଘଟିଛି କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ ଅଟାଳ ଗ୍ରାମର ପ୍ରଭାକର ପ୍ରଧାନଙ୍କ କ୍ଷେତ୍ରରେ। ପ୍ରଭାକର ଏବେ ନିଃସଙ୍ଗ ଜୀବନ ବିତାଉଛନ୍ତି।
Kanak News is now on WhatsApp
Join and get latest news updates delivered to you via WhatsApp
ପତ୍ନୀ ଓ ଦୁଇ ପିଲାଙ୍କୁ ନେଇ ୫୦ ବର୍ଷ ବୟସ୍କ ପ୍ରଭାକରଙ୍କ ସଂସାର। କୋଲକତାରେ କାମ କରୁଥିଲେ। ଦୁଇ ବର୍ଷ ତଳେ ରୋଗାକ୍ରାନ୍ତ ହୋଇ ଘରକୁ ଚାଲି ଆସିଲେ ସେ। ପ୍ରଥମେ ଆଳି ସରକାରୀ ସ୍ୱାସ୍ଥ୍ୟକେନ୍ଦ୍ର, ଜିଲ୍ଲା ହସ୍ପିଟାଲରେ ଚିକିତ୍ସା କରାଇଥିଲେ। ରୋଗ ଭଲ ନ ହେବା ପରେ ଚିକିତ୍ସା ନିମନ୍ତେ ଯାଇଥିଲେ କଟକ ବଡ଼ଡାକ୍ତରଖାନା। ସେଠାରେ ଚିକିତ୍ସାଧୀନ ଥିବା ବେଳେ ପତ୍ନୀ ଛାଡ଼ିି ପଳାଇଗଲେ । ଏଭଳି ଦୁର୍ଦ୍ଦିନରେ ସାହା ହୋଇଥିଲେ ଅଲଗା ହୋଇଥିବା ଭାଇ କୈଳାସ। କଟକରୁ ପ୍ରଭାକରଙ୍କୁ ଆଣି ନିଜ ଘରେ ରଖିଛନ୍ତି। କୈଳାସଙ୍କ ସହାୟତାରେ ଏବେ ଚଳୁଛନ୍ତି ପ୍ରଭାକର।
ପତ୍ନୀ ବାପଘରକୁ ଚାଲିଯିବା ପରେ ଗ୍ରାମବାସୀ ପ୍ରଭାକରଙ୍କ ସହ ମିଳାମିଶା କରିବା ବନ୍ଦ କରିଦେଇଥିଲେ। ଅଜଣା ସଂକ୍ରାମକ ରୋଗରେ ଆକ୍ରାନ୍ତ ହୋଇଥିବା ସନ୍ଦେହରେ ତାଙ୍କୁ ପୋଖରୀ, ନଳକୂପ ବାରଣ କରାଯାଇଛି। ହେଲେ, ପ୍ରଭାକର ଜଣ୍ଡିସ(ହେପାଟାଇଟିିସ୍-ବି)ରେ ଗୁରୁତର ଆକ୍ରାନ୍ତ ବୋଲି କହିଛନ୍ତି ଆଳି ସ୍ୱାସ୍ଥ୍ୟକେନ୍ଦ୍ରର ମୁଖ୍ୟ ଡାକ୍ତର ମନୋଜ ସେନାପତି। ରୋଗାକ୍ରାନ୍ତଙ୍କୁ ସାମାଜିକ ବାସନ୍ଦର କୌଣସି ବି କାରଣ ନାହିଁ ବୋଲି କହିଛନ୍ତି ଡା.ସେନାପତି।