କଳାକାରଙ୍କ କଳି, ବଳି ପଡିଲା ଜଲିଉଡ୍: ବିରୋଧ ଯୋଗୁଁ ଯାତ୍ରା ବାତିଲ

କନକ ବ୍ୟୁରୋ: ଓଲିଉଡ୍ କଳାକାରଙ୍କ କଳି ଏବେ ଜଲିଉଡ୍ ଉପରେ ପ୍ରଭାବ ପକାଇଛି । କଳିରୁ ଫାଇଦା ଉଠାଇବାକୁ କିଛି ଲୋକ ପୂର୍ବ ଓ ପଶ୍ଚିମ ଓଡ଼ିଶା ମଧ୍ୟରେ ବିଭେଦ ତିଆରି କରିବାକୁ ନିରନ୍ତର ପ୍ରୟାସ କରୁଛନ୍ତି । ଆଉ ଏତିିକି ବେଳେ ବଲାଙ୍ଗିରରେ ବନ୍ଦ ହୋଇଯାଇଛି ଯାତ୍ରା । ଯାତ୍ରାକୁ ବନ୍ଦ କରିଛି କୋଶଳ ସଂଗଠନ । ପଶ୍ଚିମ ଓଡ଼ିଶାର ଦୁଇ ପ୍ରମୁଖ କଳାକାର ମଂଟୁ ଛୁରିଆ ଓ ଅଭିଜିତ ମଜୁମଦାର ଏକତାର ବାର୍ତା ଦେଇଛନ୍ତି ।

ପଶ୍ଚିମ ଓଡିଶାରୁ ବିଭିନ୍ନ ସ୍ଥାନରୁ ଆସୁଥିବା ଦୃଶ୍ୟକୁ ନେଇ ଯାହା ଆଶଙ୍କା କରାଯାଉଥିଲା ତାହା ଧିରେ ଧିରେ ସତ ହେବାରେ ଲାଗିଛି । ମାତ୍ର କେତେଜଣ ସିନେ କଳାକାର ଓ ପ୍ରଯୋଜକଙ୍କ କଳି ଭିତରେ ପ୍ରଭାବିତ ହୋଇଛି ଅନ୍ୟମାନଙ୍କ ଜୀବନଜୀବିକା । ମନୋଜ ମିଶ୍ରଙ୍କୁ ସମର୍ଥନ କରିବାକୁ ଯାଇ କୋଶଳ ସଂଗଠନର ବିରୋଧ ଯୋଗୁଁ ପ୍ରଥମେ ବଳି ପଡିଛି ଯାତ୍ରା ଦୁନିଆ । ବଲାଙ୍ଗୀର ବେଲପଡାରେ ଚାଲିଥିବା ଯାତ୍ରାକୁ ବିରୋଧ ଯୋଗୁଁ ଅଧାରେ ଅଟକାଇବାକୁ ବାଧ୍ୟ ହୋଇଛନ୍ତି ଆୟୋଜକ । ସେହିପରି ଖପ୍ରାଖୋଲରେ ଆୟୋଜିତ ହେବାକୁ ଥିବା ଯାତ୍ରାକୁ ଆଗୁଆ ବାତିଲ କରି ଦେଇଛନ୍ତି ପୂଜା କମିଟି ।

କଳାକରଙ୍କ କଳି ଭିତରେ ଯାତ୍ରା ଜଗତ ପ୍ରଭାବିତ ହେବା ପରେ, ଏଭଳି ନକରିବାକୁ ଅନୁରୋଧ କରିଛନ୍ତି ଯାତ୍ରା କଳାକାର । ପୂର୍ବ- ପଶ୍ଚିମ ଓଡିଶା କଥା କହି, ବିବାଦ ନକରିବାକୁ ଅପିଲ କରିଛନ୍ତି । ଏଥିସହ ବିବାଦର ସମାଧାନ ପାଇଁ ଉଦ୍ୟମ କରିବାକୁ କହିଛନ୍ତି ।

ବିବାଦ ଭିତରେ ମୁହଁ ଖୋଲିଛନ୍ତି କଣ୍ଠଶିଳ୍ପୀ ମଂଟୁ ଛୁରିଆ । ସେ ଭିଡିଓ ଜାରି କରି ନିଜର ମତ ରଖିଛନ୍ତି । ସେହିପରି ଗୀତ ଗାଇ ଏକତାର ବାର୍ତା ଦେଇଛନ୍ତି ସଂଗୀତ ନିର୍ଦ୍ଦେଶକ ତଥା କଣ୍ଠଶିଳ୍ପର ଅଭିଜିତ୍ ମଜୁମଦାର ।