କନକ ବ୍ୟୁରୋ : ଆଇପିଏଲ ୨୦୨୩ରେ ଭାରତୀୟ ଯୁବ ପ୍ରତିଭାଙ୍କ କରିସ୍ମା ଦେଖିବାକୁ ମିଳୁଛି । କୋଲକାତା ବିପକ୍ଷ ମ୍ୟାଚରେ ଯଶସ୍ୱୀ ଜୟସ୍ୱାଲ ବିସ୍ଫୋରକ ଇନିଂସ ଖେଳି ପୁଣିଥରେ ଚର୍ଚ୍ଚାକୁ ଆସିଛନ୍ତି । କୋଲକାତା ବିପକ୍ଷରେ ୯ ୱିକେଟରେ ବିଜୟ ହାସଲ କରିଛି ରାଜସ୍ଥାନ । କିନ୍ତୁ ଏହି ମ୍ୟାଚରେ ନୂଆ କୀର୍ତ୍ତିମାନ ସ୍ଥାପନ କରିଛନ୍ତି ୨୧ ବର୍ଷୀୟ ଯୁବ ଭାରତୀୟ କ୍ରିକେଟର ଯଶସ୍ୱୀ ଜୟସ୍ୱାଲ । ଆଇପିଏଲରେ ଦ୍ରୁତତମ ଅର୍ଦ୍ଧଶତକ ହାସଲ କରିବାର ରେକର୍ଡ ନିଜ ନାଁରେ କରିଛନ୍ତି ଯଶସ୍ୱୀ । ଏହାସହ ଅଳ୍ପକେ ବର୍ତ୍ତି ଯାଇଛି ସିକ୍ସର କିଙ୍ଗ୍ ଯୁବରାଜ ସିଂଙ୍କ ଟି-୨୦ ରେକର୍ଡ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କୋଲକାତା ବିପକ୍ଷରେ ୪୭ ବଲରେ ୯୮ ରନର ଅପରାଜିତ ଇନିଂସ ଖେଳିଥିବା ଯଶସ୍ୱୀ ଆଇପିଏଲ ଇତିହାସରେ ଦ୍ରୁତତମ ଅର୍ଦ୍ଧଶତକ ହାସଲ କରିଛନ୍ତି । ଯଶସ୍ୱୀ ମାତ୍ର ୧୩ଟି ବଲରେ ଏହି ରେକର୍ଡର ଅଧିକାରୀ ହୋଇଛନ୍ତି । ତେବେ ଟି-୨୦ କ୍ରିକେଟରେ ଦ୍ରୁତତମ ଅର୍ଦ୍ଧଶତକ ରେକର୍ଡ ଭାରତୀୟ କ୍ରିକେଟର ଯୁବରାଜ ସିଂଙ୍କ ନାଁରେ ରହିଛି । ଯୁବରାଜ ଇଂଲଣ୍ଡ ବିପକ୍ଷରେ ମାତ୍ର ୧୨ ବଲରୁ ଅର୍ଦ୍ଧଶତକ ହାସଲ କରିଥିଲେ । ସେହିଭଳି କ୍ରିସ୍ ଗେଲ ମଧ୍ୟ ବିଗ୍ ବାସ ଲିଗରେ ଏହି ଉପଲବ୍ଧି ହାସଲ କରିଛନ୍ତି । କିନ୍ତୁ ଆଇପିଏଲରେ ୧୩ଟି ବଲରେ ଏଯାଏଁ କେହି ଅର୍ଦ୍ଧଶତକ ହାସଲ କରିପାରିନଥିଲେ । କିନ୍ତୁ ଏହାକୁ ପୂରା କରି ଦେଖାଇଛନ୍ତି ଜୟସ୍ୱାଲ । ଆଇପିଏଲରେ ଏହି ରେକର୍ଡ ପୂର୍ବରୁ କେ.ଏଲ ରାହୁଲଙ୍କ ନାଁରେ ରହିଥିଲା । କେ.ଏଲ ରାହୁଲ ୧୪ଟି ବଲରୁ ଅର୍ଦ୍ଧଶତକ ହାସଲ କରିଥିଲେ । ପାଟ କମିନ୍ସ ମଧ୍ୟ ସମାନ ସଂଖ୍ୟକ ବଲରେ ନିଜର ଆଇପିଏଲ ଅର୍ଦ୍ଧଶତକ ହାସଲ କରିଥିଲେ ।
ଦ୍ରୁତ ଅର୍ଦ୍ଧଶତକ ହାସଲ କରିଥିବା ଯଶସ୍ୱୀ କିନ୍ତୁ ଶତକରୁ ଅଳ୍ପକେ ବଞ୍ଚିତ ହୋଇଥିଲେ । ହାତରେ ଓଭର ଥିଲା, କିନ୍ତୁ ଟାର୍ଗେଟ ପୂରା ହୋଇ ସାରିଥିଲା । ତେଣୁ କିଛି ମାତ୍ରାରେ ନିରାଶ ହୋଇଛନ୍ତି ଯଶସ୍ୱୀଙ୍କ ପ୍ରଶଂସକ । କିନ୍ତୁ ଏହି ଦମଦାର ଇନିଂସ ପାଇଁ ସୋସିଆଲ ମିଡ଼ିଆରେ ଯଶସ୍ୱୀଙ୍କୁ ଛୁଟୁଛି ପ୍ରଶଂସାର ସୁଅ । ଅନେକ କ୍ରିକେଟର ସୋସିଆଲ ମିଡ଼ିଆରେ ଯଶସ୍ୱୀଙ୍କୁ ପ୍ରଶଂସା କରିବାକୁ ଭୁଲିନାହାନ୍ତି । ଭାରତୀୟ କ୍ରିକେଟର ବିରାଟ କୋହଲି ନିଜ ଇନଷ୍ଟାଗ୍ରାମରେ ଷ୍ଟୋରୀ ସେୟାର କରିବା ସହ କହିଛନ୍ତି, କିଛି ଦିନ ମଧ୍ୟରେ ଦେଖିଥିବା ଇନିଂସ ମଧ୍ୟରୁ ଏହା ସବୁଠୁ ଶ୍ରେଷ୍ଠ ବ୍ୟାଟିଂ । ସେହିଭଳି ପୂର୍ବତନ ଭାରତୀୟ କ୍ରିକେଟର ବୀରେନ୍ଦ୍ର ସେହୱାଗ କହିଛନ୍ତି, ଯଶସ୍ୱୀଙ୍କ ଭଳି ଯୁବ ପ୍ରତିଭା ସ୍ୱତନ୍ତ୍ର । ତାଙ୍କ ବିଧ୍ୱଂସୀ ଇନିଂସର ମଜା ଉଠାଇଛି । କେବଳ ଭାରତୀୟ କ୍ରିକେଟର ନୁହଁନ୍ତି ବରଂ ଅନ୍ୟ ଦେଶର ଖେଳାଳୀ ଓ ଅନ୍ୟ ଫ୍ରାଞ୍ଚାଇଜ ମଧ୍ୟ ଯଶସ୍ୱୀଙ୍କର ଏହି ଇନିଂସକୁ ପ୍ରଶଂସା କରିଛନ୍ତି ।
୨୦୨୩ ଆଇପିଏଲ ସିଜିନରେ ଯଶସ୍ୱୀ ଦମଦାର ଫର୍ମରେ ରହିଛନ୍ତି । ପ୍ରତିଟି ମ୍ୟାଚରେ ଯଶସ୍ୱୀଙ୍କ ବ୍ୟାଟରୁ ବଡ ଇନିଂସ ଦେଖିବାକୁ ମିଳୁଛି । ଏବେ ସୁଦ୍ଧା ଯଶସ୍ୱୀ ୧୨ଟି ମ୍ୟାଚରୁ ଗୋଟିଏ ଶତକ ଓ ୪ ଅର୍ଦ୍ଧଶତକ ସହ ୫୭୫ ରନ କରିଛନ୍ତି । ଏହାସହ ଅରେଞ୍ଜ କ୍ୟାପରୁ ଗୋଟିଏ ରନ୍ ପଛରେ ରହିଛନ୍ତି । ଆରସିବି ଅଧିନାୟକ ଫାପ୍ ଡୁ ପ୍ଲେସିସଙ୍କ ପାଖରେ ଏବେ ଅରେଞ୍ଜ କ୍ୟାପ୍ ରହିଛି । ଡୁ ପ୍ଲେସିସ ଏବେ ସୁଦ୍ଧା ୧୧ଟି ମ୍ୟାଚ୍ ଖେଳି ୫୭୬ ରନ୍ କରିଛନ୍ତି ।