ଦେଶକୁ ଓମିକ୍ରନ୍ ଭୟ । ଜୟପୁରରେ ଦକ୍ଷିଣ ଆଫ୍ରିକା ଫେରନ୍ତା ଗୋଟିଏ ପରିବାରରେ ୪ ପଜିଟିଭ୍ !
କନକ ବ୍ୟୁରୋ: ଦକ୍ଷିଣ ଆଫ୍ରିକାରେ ଓମିକ୍ରନ୍ ଭ୍ୟାରିଆଣ୍ଟ ଆତଙ୍କ ଖେଳାଇବା ପରେ ଭାରତକୁ ମଧ୍ୟ ଘାରିଛି ଓମିକ୍ରନ୍ ଭୟ । ଏହା ମଧ୍ୟରେ ଦକ୍ଷିଣ ଆଫ୍ରିକାରୁ ରାଜସ୍ଥାନ ଜୟପୁର ଫେରିଛନ୍ତି ଗୋଟିଏ ପରିବାର । ଏମାନଙ୍କ ମଧ୍ୟରୁ ୪ଜଣ କରୋନା ପଜିଟିଭ ଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ଓମିକ୍ରନର ଦୁଇଟି ମାମଲା ଜଣାପଡିବା ପରେ ଏବେ ଦକ୍ଷିଣ ଆଫ୍ରିକାରୁ ଜୟପୁରକୁ ଫେରିଥିବା ପରିବାରକୁ ନେଇ ଚିନ୍ତା । କାରଣ ଦକ୍ଷିଣ ଆଫ୍ରିକାରୁ ଫେରିଥିବା ଏହି ପରିବାରର ୪ଜଣ କୋଭିଡ ପଜିଟିଭ ଥିବା ଜଣାପଡିଛି । ସୂଚନା ମୁତାବକ, ନଭେମ୍ବର ୨୫ ତାରିଖରେ ଏହି ପରିବାରର ୯ଜଣ ଦକ୍ଷିଣ ଆଫ୍ରିକାରୁ ଫେରିଥିଲେ । ସେମାନଙ୍କ ମଧ୍ୟରୁ ପରିବାରର ମା’ ବାପା, ତାଙ୍କର ୮ବର୍ଷ ଓ ୧୫ ବର୍ଷର ଦୁଇ ଝିଅଙ୍କୁ କୋଭିଡ୍ ପଜିଟିଭ ଥିବା ଜଣାପଡିଛି । ଏହାଠାରୁ ଆହୁରି ଚିନ୍ତାର ବିଷୟ ହେଉଛି ଏମାନେ ବିଦେଶରୁ ଫେରିବା ପରେ ଯେଉଁମାନଙ୍କ ସଂସ୍ପର୍ଶରେ ଆସିଥିଲେ ସେମାନଙ୍କ ମଧ୍ୟରୁ ମଧ୍ୟ ୫ଜଣ କରୋନା ସଂକ୍ରମିତ ଥିବା ଜଣାପଡିଛି ।
ଏ ସମସ୍ତଙ୍କୁ ବର୍ତ୍ତମାନ ସଙ୍ଗରୋଧରେ ରଖାଯିବା ସହ ସମସ୍ତଙ୍କର ଜିନୋମ ସିକ୍ୱେନ୍ସିଙ୍ଗ କରାଯାଇଛି । ତେବେ ରିପୋର୍ଟ ଆସିବା ପରେ ହିଁ ଏମାନେ କରୋନାର କେଉଁ ଭ୍ୟାରିଆଣ୍ଟ ଦ୍ୱାରା ସଂକ୍ରମିତ ହୋଇଛନ୍ତି ତାହା ସ୍ପଷ୍ଟ ହେବ । ତେବେ ସଂକ୍ରମିତ ଏହି ବାପା, ମା’ କୋଭିଡର ଦୁଇ ଡୋଜ୍ ଟିକା ନେଇସାରିଛନ୍ତି । ଦୁଇ ଝିଅଙ୍କ ଠାରେ ମଧ୍ୟ କରୋନାର କୌଣସି ଲକ୍ଷଣ ନାହିଁ । କିନ୍ତୁ ଯେହେତୁ ସେମାନେ ଦକ୍ଷିଣ ଆଫିକାରୁ ଫେରିଲେ ସେଥିପାଇଁ ସେମାନଙ୍କର ଟେଷ୍ଟ କରାଯିବାରୁ ସେମାନେ ପଜିଟିଭ ଥିବା ଜଣାପଡିଛି । ଏହାପୂର୍ବରୁ କର୍ଣ୍ଣାଟକରେ ଓମିକ୍ରନର ଦୁଇଟି କେସ୍ ମିଳିଥିବା ସୂଚନା ରହିଛି ।