ନୂଆ ବର୍ଷ ପାଇଁ ସଜେଇ ହେଉଛି ସିଂହଦ୍ୱାର । ଫୁଲରେ ସଜାଯାଇଛି ନବନିର୍ମିତ ସେଡ୍, ଆକର୍ଷଣୀୟ କରିବାକୁ ଶୁଭିବ ଭକ୍ତିପୂର୍ଣ୍ଣ ଭଜନ। ଭକ୍ତଙ୍କ ଉପରେ ନଜର ରଖିବ କ୍ୟାମେରା

କନକ ବ୍ୟୁରୋ: ନୂଆ ବର୍ଷ ପାଇଁ ସଜେଇ ହେଉଛି ଶ୍ରୀମନ୍ଦିର । ନୂଆବର୍ଷକୁ ଆଉ ଦୁଇଦିନ ବାକି ଥିବା ବେଳେ ଆଜି ନବନିର୍ମିତ ସେଡ଼କୁ ଅଧିକ ଆକର୍ଷଣୀୟ କରାଯାଇଛି । ନବନିର୍ମିତ ସେଡ଼ରେ ଖୁବ୍ ସୁନ୍ଦର ଭାବେ ଫୁଲ ସଜା ଯାଇଛି । ଏପରିକି ଭକ୍ତମାନଙ୍କ ମନରେ ଆଧ୍ୟାତ୍ମିକ ଭାବ ସୃଷ୍ଟି କରିବା ପାଇଁ ସାଉଣ୍ଡ ବକ୍ସ ମଧ୍ୟ ଲଗାଯାଇଛି । ଏଥିରେ ଭକ୍ତିପୁର୍ଣ୍ଣ ଭଜନ ଜଗନ୍ନାଥଷ୍ଟକ ବାଜିବ । ସେହିଭଳି ଭକ୍ତମାନଙ୍କ ଉପରେ ନଜର ରଖିବା ପାଇଁ ଅତ୍ୟାଧୁନିକ ସିସି ଟିଭି କ୍ୟାମେରା ବି ଲଗାଯାଇଛି । ପୁରୀକୁ ନୂଆ ରୁପ ଦେବା ପାଇଁ ସରକାରଙ୍କ ପକ୍ଷରୁ ଜୋରଦାର ପ୍ରୟାସ କରାଯାଉଥିବା ବେଳେ ସିଂହଦ୍ୱାର ସମ୍ମୁଖ ପାଚେରୀ କଡ଼ରେ ସବୁଜିମା ସୃଷ୍ଟି କରାଯାଇଛି ।

ସେପଟେ ପ୍ରବଳ ଭକ୍ତ ସମାଗମକୁ ଦୃଷ୍ଟିରେ ରଖି ଶ୍ରୀମନ୍ଦିର ସୁରକ୍ଷାକୁ ବଢାଇ ଦିଆଯାଇଛି । ଟ୍ରାଫିକ୍ ବ୍ୟବସ୍ଥାକୁ ନିୟନ୍ତ୍ରଣାଧୀନ କରିବା ପାଇଁ ପୁରୀ ସହର ଏବଂ ସହର ବାହାରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ସୁରକ୍ଷା ପାଇଁ ୬୫ ପ୍ଲାଟୁନ୍ ଫୋର୍ସ ମୁତୟନ କରାଯିବ । ମିଳିଥିବା ସୂଚନା ମୁତାବକ, ନୂଆବର୍ଷ ଉପଲକ୍ଷେ ୨ ଜଣ କମାଣ୍ଡାଣ୍ଟଙ୍କୁ ମୁତୟନ କରାଯାଇଛି। ସେହି ଭଳି ୭ ଜଣ ଏଏସପି, ୧୯ ଜଣ ଡିଏସପି ଓ ଆସିଷ୍ଟାଣ୍ଟ କମାଣ୍ଡାଣ୍ଟ, ୪୮ ଥାନା ଅଧିକାରୀ, ୨୦୦ ଏସଆଇ ଓ ଏଏସଆଇଙ୍କୁ ମୁତୟନ କରାଯାଇଛି। ହାବିଲଦାର ଓ ଟ୍ରାଫିକ୍ ପୁଲିସକୁ ମିଶାଇ ୩୬ ଜଣ ଓ ୨୨୯ କନଷ୍ଟେବଳଙ୍କୁ ସୁରକ୍ଷା ଦାୟିତ୍ବ ବଣ୍ଟନ କରାଯାଇଛି। ଏହାବାଦ୍ ୬୦୦ ହୋମାଗାର୍ଡ଼ଙ୍କୁ ବି ମୁତୟନ କରାଯାଇଛି।

ଅନ୍ୟପଟେ ନୂଆବର୍ଷରେ ଟ୍ରାଫିକ୍ ସମସ୍ୟା ଦୂର ପାଇଁ ପୁଲିସ ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ଟ୍ରାଫିକ୍ ବ୍ୟବସ୍ଥାରେ ଶୃଙ୍ଖଳା ଆଣିବା ପାଇଁ ଡିସେମ୍ବର ୩୧ ଓ ଜାନୁଆରି ୧ରେ ମାଲବାହୀ ଗାଡ଼ି ଚଳାଚଳରେ କଟକଣା ଲଗାଯାଇଛି। ଏହି ଦୁଇଦିନ ସହର ଭିତରେ ମାଲବାହୀ ଗାଡ଼ି ପ୍ରବେଶରେ ରୋକ୍ ଲଗାଯାଇଛି। ଦୈନନ୍ଦିନ ଯାତାୟାତ କରୁଥିବା ଯାତ୍ରୀବାହୀ ବସ ଓ ଟୁରିଷ୍ଟ ବସ ଚଳାଚଳର ରୁଟ୍ ପରିବର୍ତ୍ତନ କରାଯାଇନି। ପୂର୍ବଭଳି ପୁରୀ ବସଷ୍ଟାଣ୍ଡକୁ ଦୈନନ୍ଦିନ ଯାତାୟାତ କରୁଥିବା ବସ୍ ନିଜ ରୁଟରେ ଚଳାଚଳ କରିବ। ଟୁରିଷ୍ଟ ବସ୍ମାନେ ମାଳତୀପାଟପୁର ବସଷ୍ଟାଣ୍ଡରେ ରହିବେ। କିନ୍ତୁ ଚାରିଚକିଆ, ତିନିଚକିଆ ଓ ଦୁଇଚକିଆ ଉପରେ କଟକଣା ଲଗାଯାଇଛି।