କନକ ବ୍ୟୁରୋ : ଅଲୁ ଅର୍ଜୁନ ଅଭିନୀତ ଫିଲ୍ମ ପୁଷ୍ପାକୁ ନେଇ ଚାରିଆଡେ ଚର୍ଚ୍ଚା । ଦମଦାର କାହାଣୀ ସାଙ୍ଗକୁ ଅଲ୍ଲୁ ଅର୍ଜ୍ଜୁନ ଓ ରଶ୍ମିକାଙ୍କ ଜବରଦସ୍ତ ଅଭିନୟକୁ ଦର୍ଶକ ବେଶ ପସନ୍ଦ କରୁଛନ୍ତି । ଫିଲ୍ମଟି ସିନେମା ହଲରେ ରିଲିଜ ହେବା ପରେ ଏବେ ଓଟିଟି ପ୍ଲାଟଫର୍ମରେ ରିଲିଜ ହୋଇଛି । ଆଉ ସବୁଠୁ ବଡ କଥା ହେଉଛି କରୋନା କାଳରେ କୋଟି କୋଟି ଟଙ୍କା ରୋଜଗାର କରିଛି ଫିଲ୍ମ ପୁଷ୍ପା । ଦର୍ଶକ ଏହି ଫିଲ୍ମକୁ ଏତେ ପସନ୍ଦ କରିଛନ୍ତି ଯେ, ଅଲ୍ଲୁ ଅର୍ଜୁନଙ୍କ ଡାଇଲଗ କହି ସୋସିଆଲ ମିଡ଼ିଆରେ ଏହାକୁ ପୋଷ୍ଟ କରୁଛନ୍ତି । ଆଉ ଏହି ଟ୍ରେଣ୍ଡରୁ ଭାରତୀୟ କ୍ରିକେଟର ରବୀନ୍ଦ୍ର ଜାଡେଜା ମଧ୍ୟ ବାଦ୍ ପଡିନାହାନ୍ତି । ତେବେ ଜାଡେଜା ଏବେ ଯେଉଁ ଫଟୋ ସୋସିଆଲ ମିଡ଼ିଆରେ ଛାଡିଛନ୍ତି ତାହାକୁ ନେଇ ଅଧିକ ଚର୍ଚ୍ଚା ହେଉଛି । କାରଣ ଏହି ଫଟୋରେ ଜାଡେଜାଙ୍କୁ ଏକ ଭିନ୍ନ ଲୁକରେ ଦେଖିବାକୁ ମିଳିଛି । କ୍ରିକେଟର ନୁହେଁ ଫିଲ୍ମ ପୁଷ୍ପାରେ ଅଲ୍ଲୁ ଅର୍ଜୁନଙ୍କ ଭଳି ଲୁକରେ ନଜର ଆସିଛନ୍ତି ଜାଡେଜା ।

Advertisment

ଏହି ପୋଷ୍ଟରେ ଜାଡେଜା ପୂରା ଅଲ୍ଲୁ ଅର୍ଜୁନଙ୍କ ଭଳି ଦେଖାଯାଉଛନ୍ତି । ହେୟାରଷ୍ଟାଇଲ ସହ ଅନ୍ଦାଜ ମଧ୍ୟ କିଛି ଅଲ୍ଲୁ ଅର୍ଜୁନଙ୍କ ଭଳି ରହିଛି । ଏପରିକି ଅଲ୍ଲୁ ଅର୍ଜୁନଙ୍କ ଭଳି ଏକ ବିଡି ମଧ୍ୟ ପାଟିରେ ରଖିଥିବା ଦେଖିବାକୁ ମିଳିଛି । ଏହାସହ ପୁଷ୍ପା ଫିଲ୍ମରେ ଅଲ୍ଲୁ ଅର୍ଜୁନଙ୍କ ଲୋକପ୍ରିୟ ଡାଇଲଗ ମଧ୍ୟ ନିଜ ପୋଷ୍ଟରେ ସେୟାର କରିଛନ୍ତି । ତେବେ ଏହି ପୋଷ୍ଟରେ ଏକ ସାମାଜିକ ସଚେତନତାର ବାର୍ତ୍ତା ମଧ୍ୟ ଦେଇଛନ୍ତି ଜାଡେଜା । ପୋଷ୍ଟରେ ଜାଡେଜା ଲେଖିଛନ୍ତି, ଏହା କେବଳ ଏକ ଗ୍ରାଫିକ୍ସ ଫଟୋ । ସିଗାରେଟ, ବିଡି ଓ ତମ୍ବାକୁ ସେବନ କରିବା ସ୍ୱାସ୍ଥ୍ୟ ପାଇଁ ହାନିକାରକ । ଏହାଦ୍ୱାରା କ୍ୟାନସର ହୋଇଥାଏ, ଏହାଠାରୁ ଦୂରେଇ ରୁହନ୍ତୁ । ଜାଡେଜାଙ୍କ ଏହି ପୋଷ୍ଟ ଦେଖିବା ପରେ ଅଲ୍ଲୁ ଅର୍ଜୁନ ମଧ୍ୟ କମେଣ୍ଟ କରିଛନ୍ତି ।

ଏହାପୂର୍ବରୁ ଟିମ୍ ଇଣ୍ଡିଆର ଷ୍ଟାର ଅଲରାଉଣ୍ଡର ଜାଡେଜାଙ୍କୁ ପୁଷ୍ପା ଫିଲ୍ମର ଡାଇଲଗ କହୁଥିବାର ଦେଖିବାକୁ ମିଳିଥିଲା । ଅଲ୍ଲୁ ଅର୍ଜୁନଙ୍କ ଭଳି ଜାଡେଜାଙ୍କ ଡାଇଲଗକୁ ମଧ୍ୟ ଲୋକେ ବେଶ ପସନ୍ଦ କରିଥିଲେ । ଏପରିକି ସାଥୀ କ୍ରିକେଟର କୁଳଦୀପ ଯାଦବ ଲେଖିଥିଲେ, ଆଗାମୀ ଫିଲ୍ମକୁ ଅପେକ୍ଷା ରହିଲା । ଆଉ ଏହାର ଜବାବରେ ଜାଡେଜା କହିଥିଲେ, ଏନସିଏରେ ଏହାର ସୁଟିଂ ହେବ । ଏବେ ଷ୍ଟାର ଅଲରାଉଣ୍ଡର ରବୀନ୍ଦ୍ର ଜାଡେଜା ଦକ୍ଷିଣ ଆଫ୍ରିକା ଗସ୍ତରୁ ନିଜକୁ ଦୂରେଇ ରଖିବା ସହ ପରିବାର ସହ ସମୟ ବିତାଉଛନ୍ତି । ଆଉ ଫାଙ୍କା ସମୟରେ ସୋସିଆଲ ମିଡ଼ିଆରେ କିଛି ଏଭଳି ପୋଷ୍ଟ କରି ପ୍ରଂଶସକଙ୍କ ମନ ଜିଣୁଛନ୍ତି ।