ଆଶ୍ୱସ୍ତ କରୁଛି କରୋନା ଆକ୍ରାନ୍ତଙ୍କ ସୁସ୍ଥ ସଂଖ୍ୟା : ରାଜ୍ୟରେ ସୁସ୍ଥ ହେଲେ ୨ ଲକ୍ଷରୁ ଅଧିକ ଆକ୍ରାନ୍ତ; ମୋଟ୍ ସୁସ୍ଥଙ୍କ ସଂଖ୍ୟା ୨ ଲକ୍ଷ ୨ ହଜାର ୩୦୨
କନକ ବ୍ୟୁରୋ : କରୋନା ସଂକଟ ଭିତରେ ଆସିଛି ଆଶ୍ୱସ୍ତର ସୂଚନା । ରାଜ୍ୟରେ କରୋନା ରୋଗୀ ସୁସ୍ଥ ହେବା ସଂଖ୍ୟା ୨ ଲକ୍ଷ ଟପିଛି । ରାଜ୍ୟରେ କରୋନାରୁ ସୁସ୍ଥ ହୋଇଥିବା ବ୍ୟକ୍ତିଙ୍କ ସଂଖ୍ୟା ୨ ଲକ୍ଷ ୨ ହଜାର ୩୦୨ ହୋଇଛି । ଏବେ ବି ରାଜ୍ୟରେ ୨୯ ହଜାର ୪୫୧ ଜଣ ଚିକିତ୍ସାଧୀନ ଅଛନ୍ତି । ରାଜ୍ୟରେ ଏଯାଏଁ ମୋଟ ୨ ଲକ୍ଷ ୩୨ ହଜାର ୭୧୩ ଜଣ କରୋନା ଆକ୍ରାନ୍ତ ଚିହ୍ନଟ ହୋଇସାରିଛନ୍ତି । ସେମାନଙ୍କ ମଧ୍ୟରୁ ବର୍ତମାନ ସୁଦ୍ଧା କରୋନା ଭୂତାଣୁ ସଂକ୍ରମଣରୁ ୯୦୭ ଜଣଙ୍କ ମୃତ୍ୟୁ ଘଟିଥିବା ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ହିସାବ ଅନୁସାରେ ରାଜ୍ୟରେ କରୋନା ଆକ୍ରାନ୍ତଙ୍କ ସୁସ୍ଥତା ହାର ପ୍ରାୟ ୮୭ ପ୍ରତିଶତ ରହିଥିବା ବେଳେ ମୃତ୍ୟୁ ହାର ମାତ୍ର ଶୂନ ଦଶମିକ ୩୯ ପ୍ରତିଶତ ରହିଛି । ଅନ୍ୟପଟେ ଦେଶରେ କୋଭିଡ୍ ସୁସ୍ଥତା ହାର ପ୍ରାୟ ୮୪ ପ୍ରତିଶତ ରହିଥିବା ବେଳେ ମୃତ୍ୟୁ ହାର ୧.୫୫ ପ୍ରତିଶତ ରହିଛି । ଏହା ସହ ଗତକାଲି ସୁଦ୍ଧା ରାଜ୍ୟରେ ମୋଟ ୩୪ ଲକ୍ଷ ୪୦ ହଜାର ୮୩୫ ନମୂନା ପରୀକ୍ଷଣ ହୋଇଛି । ନମୂନା ପରୀକ୍ଷାର ମାତ୍ର ୬ ଦଶମିକ୭୬ ପ୍ରତିଶତ ପଜିଟିଭ୍ ଆସୁଛି ଏବଂ ଅବଶିଷ୍ଟ ୯୩ ଦଶମିକ ୨୪ ପ୍ରତିଶତ ନେଗେଟିଭ୍ ଆସୁଛି ।
ଜିଲ୍ଲାରେ କରୋନା ସଂକ୍ରମଣ ତାଲିକା ଉପରେ ନଜର ପକାଇଲେ ବର୍ତମାନ ଶୀର୍ଷରେ ରହିଛି ଖୋର୍ଦ୍ଧା ଜିଲ୍ଲା ଏବଂ ତା ପଛକୁ ରହିଛି କଟକ । ବର୍ତମାନ ଖୋର୍ଦ୍ଧା ଜିଲ୍ଲାରେ ୪୦ ହଜାର ୧୯୬ ଜଣ କରୋନା ରୋଗୀ ଚିହ୍ନଟ ହୋଇଥିବା ବେଳେ କଟକ ଜିଲ୍ଲାରେ ଏହି ସଂଖ୍ୟା ୨୧ ହଜାର ୭୭୩ ଜଣ ରହିଛି । ତେବେ କୋଭିଡ୍ ମୃତ୍ୟୁ ସଂଖ୍ୟା ତାଲିକାରେ ଗଂଜାମରେ ସର୍ବାଧିକ ୨୨୧ ଜଣଙ୍କ ମୃତ୍ୟୁ ଘଟିଥିବା ବେଳେ ଖୋର୍ଦ୍ଧାରେ ମୃତକଙ୍କ ସଂଖ୍ୟା ୧୪୯ ରହିଛି ।