ପେଗାସସ୍ ଗୁଇନ୍ଦାଗିରି ପ୍ରସଙ୍ଗରେ ସଂସଦ ଗୃହ ଗରମ । କେନ୍ଦ୍ରକୁ ଘେରିଲେ ବିରୋଧୀ, ଜବାବ୍ ଦେଲେ ସରକାର ।
କନକ ବ୍ୟୁରୋ: ମୌସୁମୀ ଅଧିବେଶନର ପ୍ରଥମ ଦିନରେ ଯେଉଁ ପ୍ରସଙ୍ଗକୁ ନେଇ ଗୃହ ତାତିଥିଲା, ତାହା ହେଉଛି ପେଗାସସ ଗୁଇନ୍ଦାଗିରି ପ୍ରସଙ୍ଗ । ଇସ୍ରାଏଲର ସ୍ପାଏ ଓୟାର ଜରିଆରେ ଭାରତରେ ନେତାଙ୍କ ଠାରୁ ବୈଜ୍ଞାନିକଙ୍କ ମୋବାଇଲ ଫୋନ୍ ହ୍ୟାକ୍ ଘଟଣାକୁ ନେଇ କେନ୍ଦ୍ର ସରକାରଙ୍କୁ ଘେରିଛନ୍ତି ବିରୋଧୀ । ଶେଷରେ ଏହାକୁ ନେଇ ସଦନରେ ଉତର ରଖିବାକୁ ବାଧ୍ୟ ହୋଇଥିଲେ କେନ୍ଦ୍ର ଆଇଟି ମନ୍ତ୍ରୀ । କହିଥିଲେ ପ୍ରକାଶିତ ରିପୋର୍ଟ ଭୁଲ, ସେପରି କୌଣସି କାମରେ ଲିପ୍ତ ନାହାନ୍ତି କେନ୍ଦ୍ର ସରକାର ।
Kanak News is now on WhatsApp
Join and get latest news updates delivered to you via WhatsApp
କରୋନା ସଂକଟ, ଦରବୃଦ୍ଧି ଏବଂ ଅନ୍ୟ ସମସ୍ତ ବଡ ପ୍ରସଙ୍ଗ ଭିତରେ ମୌସୁମୀ ଅଧିବେଶନର ପ୍ରଥମ ଦିନରେ ଯେଉଁ ପ୍ରସଙ୍ଗ ପ୍ରମୁଖ ପାଲଟିଥିଲା , ତା ହେଉଛି ପେଗାସସ ସ୍ପାଏ ଇସ୍ୟୁ । ଏହା ହେଉଛି ଏକ ପ୍ରକାର ଫୋନ୍ ହ୍ୟାକିଂର ମାମଲା । କିଛି ଦିନ ଆଗରୁ ଅନ୍ତର୍ଜାତୀୟ ଗଣମାଧ୍ୟମରେ ଜାରି ଏକ ରିପୋର୍ଟରେ ଦାବି କରାଯାଇଛି , କି ପେଗାସସ ସ୍ପାଏ ଓୟାର ଜରିଆରେ ଭାରତରେ ଅନେକ ସାଂବାଦିକ, ନେତା ଏବଂ ଅନ୍ୟ ବରିଷ୍ଠ ଅଧିକାରୀଙ୍କ ଫୋନ୍ ହ୍ୟାକ୍ କରାଯାଇଛି । ବିରୋଧୀ ଦାବି କରିଛନ୍ତି ଏ ସବୁ ସରକାରଙ୍କ ଦ୍ୱାରା କରାଯାଇଛି । ଏହାକୁ ନେଇ ମୌସୁମୀ ଅଧିବେଶନର ପ୍ରଥମ ଦିନରେ ଦେଖିବାକୁ ମିଳିଛି ତାତି ।
ରବିବାର ରାତିରେ ‘ଦ ଓୟାର’ର ଏକ ରିପୋର୍ଟ ସାମ୍ନାକୁ ଆସିଥିଲ।। ଯେଉଁ ଥିରେ ଦାବି କରାଯାଇଥିଲା, ଇସ୍ରାଏଲର ସଫ୍ଟଓୟାର କମ୍ପାନୀ ପେଗାସସ ଜରିଆରେ ଭାରତରେ ପ୍ରାୟ ୩୦୦ ଲୋକଙ୍କ ଫୋନ୍ ହ୍ୟାକ୍ କରାଯାଇଛି । ଯେଉଁଥିରେ ସାଂବାଦିକ, ନେତା, ବୈଜ୍ଞାନିକ, ଆଇନଜୀବୀ, ବ୍ୟବସାୟୀ ଓ ଅନ୍ୟ ସାର୍ବଜନୀନ ଜୀବନ ସହିତ ଜଡିତ ବ୍ୟକ୍ତି ବି ଅଛନ୍ତି । ବିରୋଧୀ ଦଳର ୩ ନେତାଙ୍କ ଫୋନ୍ ହ୍ୟାକ୍ ହୋଇଥିବା ରିପୋର୍ଟରେ କୁହାଯାଇଛି । ଏହାକୁ ଏବେ ଦେଶର ସୁରକ୍ଷା ସହିତ ଜଡିତ କରି କେନ୍ଦ୍ର ସରକାରଙ୍କୁ ଘେରିଛନ୍ତି ବିରୋଧୀ । ଏକ ପାର୍ଲାମେଂଟାରୀ କମିଟି ଗଠନ କରି ଏହାର ତଦନ୍ତ ଦାବି ହୋଇଛି ।
ପେଗାସସ ଜରିଆରେ ଗୁଇନ୍ଦାଗିରି ଖବରକୁ ନେଇ ଗୃହରେ ଜବାବ ରଖିଥିଲେ କେନ୍ଦ୍ର ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ । ଏହା ଏକ ଭ୍ରମାତ୍ମକ ଖବର, ଆସିଥିବା ରିପାର୍ଟ ପୁରା ମିଥ୍ୟା । ଏହାକୁ ଖବର ପ୍ରକାଶ କରିଥିବା ସଂସ୍ଥା ନିଜ ଢଙ୍ଗରେ ପ୍ରକାଶିତ କରିଥିବା କହିଛନ୍ତି କେନ୍ଦ୍ରମନ୍ତ୍ରୀ । କାହାର ଫୋନ୍ ହ୍ୟାକିଂ ପରି ଘଟଣାରେ କେନ୍ଦ୍ର ସରକାର ଲିପ୍ତ ନାହାନ୍ତି ବୋଲି ସଫେଇ ରଖିଛନ୍ତି କେନ୍ଦ୍ରମନ୍ତ୍ରୀ ।
ସେପଟେ ସଂସଦ ବାହାରେ ପେଗାସସର ଗୁଇନ୍ଦାଗିରି ପ୍ରସଙ୍ଗକୁ ନେଇ କେନ୍ଦ୍ର ସରକାରଙ୍କ ଉପରେ ବର୍ଷିଛି କଂଗ୍ରେସ । ସାଂବିଧାନିକ ପଦରେ ବସିଥିବା ଲୋକଙ୍କ ଉପରେ ଗୁଇନ୍ଦାଗିରି ଏକ ସୁସ୍ଥ ଗଣତନ୍ତ୍ରର ପରିଚାୟକ ନୁହଁ ବୋଲି କହିଛି କଂଗ୍ରେସ ।
ଚିନ୍ତାର କଥା ହେଉଛି ଇସ୍ରାଏଲର ସଫ୍ଟଓୟାର କମ୍ପାନୀ ପେଗାସସ୍ ନିକଟରେ ବିଶ୍ୱର ପ୍ରାୟ ୫ ହଜାର ଡାଟା ରହିଛି । ଏଥିରୁ ଭାରତରୁ ରହିଛି ୩୦୦ ଡାଟା । ଅଧିକ ଚିନ୍ତାର ବିଷୟ ବିଦେଶୀ ଗଣମାଧ୍ୟମକୁ ମିଶାଇ ପ୍ରାୟ ୨୦ଟି ସଂସ୍ଥା ନିକଟକୁ ପେଗାସସ୍ ଏହି ତଥ୍ୟ ପ୍ରଦାନ କରିଛି । ବିରୋଧୀଙ୍କ ଦାବି ଏହା କେବଳ ବ୍ୟକ୍ତିଗତ ନୁହଁ, ଜାତୀୟ ସୁରକ୍ଷା ପ୍ରତି ବି ବିପଦ ହୋଇପାରେ ।