କରୋନା ରୋଗୀଙ୍କ ଚିକିତ୍ସା ଅବହେଳାରୁ ମୃତ୍ୟୁ ପ୍ରସଙ୍ଗ : ସିଡିଏମଓ କହିଲେ, ପିପିଇ କିଟ ପିନ୍ଧିବା ଡେରି ହେବାରୁ ଏପରି ସ୍ଥିତି ହେଲା, ତଦନ୍ତ କରାଯାଇ ନିଆଯିବ କାର୍ଯ୍ୟାନୁଷ୍ଠାନ
କନକ ବ୍ୟୁରୋ : କୋଭିଡ ରୋଗୀଙ୍କୁ ଚିକିତ୍ସା ନମିଳିବାରୁ ମେଡିକାଲ ଆଗରେ ଚାଲିଗଲା ଜୀବନ । ଏଭଳି ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଥିଲା ଢେଙ୍କାନାଳ ମୁଖ୍ୟ ଡାକ୍ତରଖାନା ସାମ୍ନାରେ । ତାଙ୍କ ପତ୍ନୀ ପମ୍ପିଂ କରି ବଂଚାଇବାକୁ ଚେଷ୍ଟା କରୁଥିଲେ । ଆଉ ଏହି ଦୃଶ୍ୟକୁ ନେଇ ଗତକାଲି ସାରା ଓଡିଶାରେ ବେଶ ଚର୍ଚ୍ଚା ଚାଲିଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହି ଘଟଣାରେ ପ୍ରତିକ୍ରିୟା ରଖି ସିଡିଏମଓ କହିଛନ୍ତି, ଡାକ୍ତର ଜଣଙ୍କ ପିପିଇ କିଟ ପିନ୍ଧିବାରେ ବିଳମ୍ବ ହେବାରୁ ରୋଗୀଙ୍କ ପାଖରେ ପହଂଚିପାରିନଥିଲେ ଯାହା ଫଳରେ ଏପରି ସ୍ଥିତି ଉପୁଜିଥିଲା । ତେବେ ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି କନକ ନ୍ୟୁଜକୁ କହିଛନ୍ତି ସିଡିଏମଓ । ଶେଷ ଖବର ଅନୁସାରେ ସିଡିଏମଓ ଏ ବାବଦରେ ଜିଲ୍ଲାପାଳଙ୍କୁ ରିପୋର୍ଟ ଦେଇଛନ୍ତି । ଘଟଣା ଘଟିବା ସମୟରେ ଡ୍ୟୁଟିରେ ଜଣେ ଆୟୁଷ ଡାକ୍ତର ଥିଲେ । ବର୍ତମାନ ସୁଦ୍ଧା କିଛି କାର୍ଯ୍ୟାନୁଷ୍ଠାନ ନିଆଯାଇନଥିବା ବେଳେ ଏନେଇ ଜିଲ୍ଲାପାଳ ନିଷ୍ପତି ନେବେ ବୋଲି ସୂଚନା ମିଳିଛି ।
ଅନୁଗୁଳ ଜିଲ୍ଲାର ଜଣେ ସରକାରୀ କର୍ମଚାରୀ, ଚିକିତ୍ସା ପାଇଁ ଢ଼େଙ୍କାନାଳ ହସ୍ପିଟାଲକୁ ଆସିଥିଲେ । ରୋଗୀଙ୍କ ମଧୁମେହ ଏବଂ ରକ୍ତଚାପ ଜନିତ ସମସ୍ୟା ମଧ୍ୟ ଥିଲା । ଆଉ ଯେତେବେଳେ ଏହି ବ୍ୟକ୍ତିଙ୍କ କୋଭିଡ୍ ଟେଷ୍ଟ କରାଗଲା, ରିପୋର୍ଟ ପଜିଟିଭ୍ ବାହାରିଲା । । ଆଉ ରିପୋର୍ଟ ପାଇବା ପରେ ଅଚାନକ୍ ତଳେ ପଡ଼ିଯାଇଥିଲେ ଏହି ବ୍ୟକ୍ତି । ତଳେ ପଡ଼ି ଛଟପଟ ହେଲେ ସିନା, ପାଖକୁ କେହି ଆସିଲେ ନାହିଁ । ଆଉ ଶେଷରେ ଏହି ଭଳି ଦୟନୀୟ ଅବସ୍ଥାରେ ଆଖିବୁଜି ଦେଲେ ।