୨୦୨୧ ଡିସେମ୍ବର ସୁଦ୍ଧା କାର୍ଯ୍ୟକ୍ଷମ ହେବ ମିଶନ ଗଗନୟାନ ! ଜୋରଦାର ପ୍ରସ୍ତୁତି କରୁଛି ଇସ୍ରୋ, ସତ ହେବ ଭାରତର ମହାକାଶଚାରୀ ପଠାଇବା ସ୍ୱପ୍ନ ।
କନକ ବ୍ୟୁରୋ : ଭାରତୀୟ ମହାକାଶ ଗବେଷଣା କେନ୍ଦ୍ର ପକ୍ଷରୁ ମିଶନ ଗଗନୟାନକୁ ସଫଳ କରିବା ପାଇଁ ଚାଲିଛି ଜୋରଦାର ପ୍ରସ୍ତୁତି । ୨୦୨୧ ଡିସେମ୍ବର ସୁଦ୍ଧା ଭାରତର ଗଗନୟାନ ପ୍ରକଳ୍ପ କାର୍ଯ୍ୟକ୍ଷମ ହେବ । ମହାକାଶକୁ ମହାକାଶଚାରୀ ପ୍ରେରଣ କରିବାର ସ୍ୱପ୍ନ ସାକାର ହେବ । ତେବେ ଗଗନୟାନ ଜରିଆରେ ହିଁ ମହାକାଶଚାରୀ ମହାକାଶକୁ ଯିବେ ଏବଂ ଫେରିବେ । ଏଥିପାଇଁ ଏକ ନୂଆ ସେଂଟର ମଧ୍ୟ ସ୍ଥାପନ କରାଯାଇଛି । ଏହି ବର୍ଷ ଗଗନୟାନ ପାଇଁ ସ୍ୱତନ୍ତ୍ର ବର୍ଷ ହେବ ବୋଲି ଇସ୍ରୋ ଅଧ୍ୟକ୍ଷ କେ.ସିବନ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୨୦ ଡିସେମ୍ବରରେ ପ୍ରଥମ ମିଶନ ଏବଂ ୨୦୨୧ ଜୁଲାଇରେ ଦ୍ୱିତୀୟ ମିଶନ ସଫଳ ହେବା ପରେ ହିଁ ୨୦୨୧ ଡିସେମ୍ବରରେ ଗଗନୟାନ ମିଶନ କାର୍ଯ୍ୟକ୍ଷମ ହେବ ବୋଲି ଇସ୍ରୋ ଅଧ୍ୟକ୍ଷ ସୂଚନା ଦେଇଛନ୍ତି । ଗଗନୟାନ ପାଇଁ ଭାରତରେ ଦେବାକୁ ଥିବା ତାଲିମ ଶେଷ ହୋଇଛି ।
ତେବେ ମହାକାଶଚାରୀ ମାନେ ପରବର୍ତୀ ତାଲିମ ଋଷିଆରେ ନେବେ । ଏଥିରେ ଜଣେ ମହିଳା ମହାକାଶ ଚାରୀଙ୍କୁ ମଧ୍ୟ ପଠାଯିବା ପାଇଁ ଇସ୍ରୋ ଚିନ୍ତା କରୁଛି । ତେବେ ଏହା ତାଲିମ ଉପରେ ନିର୍ଭର କରୁଛି ଏବଂ ଏବେ ଉଭୟ ପୁରୁଷ ଓ ମହିଳା ମହାକାଶଚାରୀଙ୍କୁ ତାଲିମ ଦିଆଯାଉଛି ବୋଲି ଇସ୍ରୋ ଅଧ୍ୟକ୍ଷ କହିଛନ୍ତି । ଏହି ପ୍ରକଳ୍ପ ସଫଳ ହେଲେ ମହାକାଶକୁ ସ୍ୱାଧିନ ଭାବେ ମାନବ ପ୍ରେରଣ କରିବାରେ ଭାରତ ବିଶ୍ୱର ଚତୁର୍ଥ ଦେଶ ଭାବେ ମାନ୍ୟତା ଲାଭ କରିବ ।