ସରକାରଙ୍କ ନଜର ଆଢୁଆଳରେ ରହି ଯାଇଛି କି ବାଲେଶ୍ୱରର କ୍ଷୀରଚୋରା ଗୋପୀନାଥ ମନ୍ଦିର ? ବାରମ୍ବାର ଟ୍ରଷ୍ଟ ବୋର୍ଡ ଭାଙ୍ଗିବାରୁ ହୋଇପାରୁନି ବିକାଶ
କନକ ବ୍ୟୁରୋ: ବିକାଶ ଠାରୁ ବହୁ ପଛରେ ବାଲେଶ୍ୱରର କ୍ଷୀରଚୋରା ଗୋପିନାଥ ମନ୍ଦିର । ଓଡିଶାର ଐତିହ୍ୟ ଓ ସଂସ୍କୃତିକୁ ବଞ୍ଚାଇ ରଖିବା ପାଇଁ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚର୍ କରୁଛନ୍ତି କିନ୍ତୁ ଗୁପ୍ତ ବୃନ୍ଦାବନ କୁହାଯାଉଥିବା କ୍ଷୀରଚୋରା ଗୋପିନାଥ ମନ୍ଦିର ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛି । ଅନ୍ୟପଟେ ଠାକୁରଙ୍କ ସମ୍ପତ୍ତି ଏବେ ଜବର ଦଖଲରେ । ତେଣୁ ନା ଠାକୁର ଜମିରୁ ରୋଜଗାର ହେଉଛି ନା ଏହି ପ୍ରସିଦ୍ଧ ପୀଠ ଉପରେ ପ୍ରଶାସନର ନଜର ପଡୁଛି ।
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ପ୍ରସିଦ୍ଧ କ୍ଷୀରଚୋରା ଗୋପୀନାଥ ମନ୍ଦିରରେ ଭଗବାନ, ଭକ୍ତ ପାଇଁ କ୍ଷୀର ଚୋରେଇ ଥିବାରୁ ତାଙ୍କୁ କ୍ଷୀରଚୋରା ଗୋପୀନାଥ ବୋଲି କୁହାଯାଏ । ପ୍ରାୟ ସବୁ ଦିନ ଏଠାକୁ ଜିଲ୍ଲା ତଥା ଜିଲ୍ଲା ଓ ରାଜ୍ୟ ବାହାରୁ ଶ୍ରଦ୍ଧାଳୁ ଆସିଥାନ୍ତି । ହେଲେ ବର୍ତ୍ତମାନ ପରିଚାଳନା ଅଭାବ ଓ ସରକାରଙ୍କ ଅଣଦେଖା ଯୋଗୁଁ ମନ୍ଦିରର ସ୍ଥିତି ବିଗିଡି ଯାଇଛି । ମନ୍ଦିରର ନୀତିକାନ୍ତି ପାଇଁ ଅର୍ଥର ଅଭାବ ରହିଛି । ମନ୍ଦିର ଚଟାଣ ଫାଟି ଗଲାଣି, ମନ୍ଦିର ପ୍ରବେଶ ପଥରେ ଥିବା ଗାଧୁଆ କୁଣ୍ଡ ଭାଙ୍ଗି ଗଲାଣି । ଫଳରେ ମନ୍ଦିରକୁ ଆସୁଥିବା ଶ୍ରଦ୍ଧାଳୁ ମୌଳିକ ସୁବିଧା ନପାଇ ଅସନ୍ତୋଷ ପ୍ରକାଶ କରୁଛନ୍ତି ।
ପୂର୍ବରୁ କ୍ଷୀରଚୋରା ଗୋପୀନାଥଙ୍କ ବହୁ ସମ୍ପତ୍ତି ଥିଲା । ଠାକୁରଙ୍କ ନିଜସ୍ୱ ୩୧୧ ଏକର ସମ୍ପତ୍ତିି ସହ ବିରାଟ ଗୋଶାଳାରେ ଶତାଧିକ ଗାଈ ଥିଲେ । ହେଲେ ଦେବୋତ୍ତର ବିଭାଗ ଅଧିନରେ ଥିବା ଏହି ମନ୍ଦିରର ଦୂରାବସ୍ଥା କହିଲେ ନସରେ । ୩୧୧ ଏକର ଜମିରୁ ୩୦ରୁ ୪୦ ଏକର ଜମି ମନ୍ଦିର ପାଖରେ ରହିଥିବା ବେଳେ ବାକି ସବୁ ଜମି ଜବର ଦଖଲରେ ରହିଛି । ଠାକୁର ଜମି ଖାଉଥିବା ବ୍ୟକ୍ତି ଏକର ପିଛା ବାର୍ଷିକ ୨ ହଜାର ଟଙ୍କା ଦେଉଛନ୍ତି, ତାହା ଠାକୁରଙ୍କ ନୀତି ପାଇଁ ନିଅଣ୍ଟ ହେଉଛି । ମନ୍ଦିର ଗୋ-ଶାଳାରେ ଗାଈ ନଥିବାରୁ କ୍ଷୀରଚୋରା ଗୋପୀନାଥଙ୍କ ପାଖରେ ଭୋଗ ପାଇଁ କ୍ଷୀର କିଣିବାକୁ ପଡୁଛି । ତେବେ ଖର୍ଚ୍ଚ ଅନୁସାରେ ରୋଜଗାର ହେଉନାହିଁ । ମନ୍ଦିର ଟ୍ରଷ୍ଟ ବୋର୍ଡ କି ରାଜ୍ୟ ସରକାରଙ୍କ ନଜର ପଡୁନଥିବାରୁ ଖ୍ୟାତି ସଂପନ୍ନ ମନ୍ଦିରର ପ୍ରଗତି ହୋଇପାରୁନଥିବା ଅଭିଯୋଗ ହୋଇଛି ।
ସରକାରଙ୍କ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ, ଖୋଦ୍ ବାଲେଶ୍ୱର ଜିଲ୍ଲାର ହୋଇଥିବା ବେଳେ ବାଲେଶ୍ୱରର କ୍ଷୀରଚୋରା ଗୋପୀନାଥ ମନ୍ଦିର ଅବହେଳିତ ଅବସ୍ଥାରେ ସରକାରଙ୍କ କୃପାଦୃଷ୍ଟିକୁ ଅପେକ୍ଷା କରି ରହିଛି ।