ଉହାନ ଲ୍ୟାବରୁ ବାହାରିଛି କି ମାରାତ୍ମକ ଭୂତାଣୁ ? ଆମେରିକା ମାଗିଲା ଲ୍ୟାବ୍ କର୍ମଚାରୀଙ୍କ ରିପୋର୍ଟ ।
କନକ ବ୍ୟୁରୋ : ଉହାନ ଲ୍ୟାବରୁ ବାହାରିଛି କି ମାରାତ୍ମକ ଭୂତାଣୁ ? ଆମେରିକା ମାଗିଲା ଲ୍ୟାବ୍ କର୍ମଚାରୀଙ୍କ ରିପୋର୍ଟ । ଉହାନ ଲ୍ୟାବରେ କାମ କରୁଥିବା ୩ କର୍ମଚାରୀଙ୍କ ମେଡିକାଲ୍ ରିପୋର୍ଟ ମାଗିଲେ ଆମେରିକାର ବରିଷ୍ଠ ସଂକ୍ରାମକ ରୋଗ ବିଶେଷଜ୍ଞ ଡାକ୍ତର ଆନ୍ଥୋନୀ ଫସି । ଏଥିସହ ୨୦୧୯ରେ ଉହାନରେ ପ୍ରଥମ କରି କରୋନା ଭୂତାଣୁରେ ସଂକ୍ରମିତ ହୋଇଥିବା ୯ ଜଣଙ୍କ ମେଡିକାଲ୍ ରିପୋର୍ଟ ମଧ୍ୟ ଚୀନକୁ ମାଗିଲେ ଡାକ୍ତର ଫସି । ଫାଇନାନ୍ସିଆଲ ଟାଇମ୍ସକୁ ଦେଇଥିବା ଏକ ସାକ୍ଷାତକାରରେ ଡାକ୍ତର ଫସି କହିଛନ୍ତିି ଯେ, ସେ କରୋନା ଭୂତାଣୁର ଉତ୍ପତି ବିଷୟରେ ଜାଣିବାକୁ ଚାହୁଁଛନ୍ତି । ସେଥିପାଇଁ ସେ ଉହାନ୍ ଲ୍ୟାବରେ କାମ କରୁଥିବା ସେହି ୩ କର୍ମଚାରୀଙ୍କ ସେତେବେଳର ମେଡିକାଲ ରିପୋର୍ଟ ଦେଖିବାକୁ ଚାହୁଁଛନ୍ତି । ଉହାନରେ କରୋନା ଭୂତାଣୁ ଚିହ୍ନଟ ହେବାର ୧ମାସ ପୂର୍ବରୁ ସେଠାରେ ଥିବା ଚାଇନିଜ୍ ଭରୋଲୋଜି ଲ୍ୟାବ୍ରୋଟୋରୀରେ ୩ଜଣ କର୍ମଚାରୀ ଅସୁସ୍ଥ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ସାରା ବିଶ୍ୱକୁ କବଳିତ କରିଥିବା ମାରାତ୍ମକ କରୋନା ଭୂତାଣୁର ପ୍ରକୃତ ସତ୍ୟ ବାହାର କରିବା ପାଇଁ ଲାଗିଛି ଆମେରିକା । ସେପଟେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, “ଚୀନ ଭୂତାଣୁ, ଉହାନ ଲ୍ୟାବରୁ ହିଁ ବାହାରିଛି । ଏହାକୁ ନେଇ ମୋ ଅନୁମାନ ସଠିକ୍ ଥିଲା ।” ଟ୍ରମ୍ପଙ୍କ କହିବା କଥା ଉହାନ ଲ୍ୟାବରୁ ହିଁ ମାରାତ୍ମକ କରୋନା ଭୂତାଣୁ ଲିକ୍ ହୋଇଛି । ଆଉ ଏହି ମାରାତ୍ମକ ଭୂତାଣୁରେ ସାରା ବିଶ୍ୱକୁ ଯାହା କ୍ଷତି ପହଁଚାଇଛି ସେଥିପାଇଁ ଚୀନ୍ ନିଜକୁ ଦାୟୀ ମାନିବା ଉଚିତ୍ । ଡାକ୍ତର ଫସିଙ୍କ କଥାକୁ ଏଡାଇ ଦିଆଯାଇ ନପାରେ ବୋଲି ଟ୍ରମ୍ପ ଯୁକ୍ତି ବାଢିଛନ୍ତି । ଚୀନକୁ ପଠାଯାଇଥିବା ଡାକ୍ତର ଆନ୍ଥୋନୀଙ୍କ ଫସି ୩ ହଜାର ପୃଷ୍ଠା ବିଶିଷ୍ଟ ଇମେଲ ପଦାକୁ ଆସିବା ପରେ ଉହାନ ଲ୍ୟାବ୍କୁ ନେଇ ପୁଣିଚର୍ଚ୍ଚା ଆରମ୍ଭ ହୋଇ ଯାଇଛି ।
ସେପଟେ ଚୀନ ଏହି କଥାକୁ ଖଣ୍ଡନ କରିଛି । ଚୀନ ବୈଜ୍ଞାନିକମାନେ ବାରମ୍ବାର କହି ଆସୁଛନ୍ତି ଯେ, ମାରାତ୍ମକ କରୋନା ଭୂତାଣୁ ଉହାନ ଲ୍ୟାବରୁ ବାହାରିନି । ଉହାନରେ ସଂକ୍ରମଣ ବଢିବା ଆଗରୁ ଏହା ଚୀନର ଅନ୍ୟ ସ୍ଥାନରେ ଦେଖାଦେଇଥିଲା । ଏହି ଭୂତାଣୁ ଚାଇନା ମଧ୍ୟକୁ ଅନ୍ୟ ମାଧ୍ୟମରେ ପ୍ରବେଶ କରିଥିବା ଚୀନ୍ କର୍ତୃପକ୍ଷ ଦାବିକରିଛି ।