କ୍ରିକେଟକୁ ଇରଫାନଙ୍କ ଅଲବିଦା । ସବୁ ଫର୍ମାଟରୁ ଅବସର ଘୋଷଣା କଲେ ଇରଫାନ୍ ପଠାନ ।
କନକ ବ୍ୟୁରୋ : ଭାରତୀୟ କ୍ରିକେଟ ଦଳର ପୂର୍ବତନ ଅଲରାଉଣ୍ଡର ଇରଫାନ ପଠାନ ସବୁ ପ୍ରକାରର କ୍ରିକେଟରୁ ଅବସର ଗ୍ରହଣ କରିଛନ୍ତି । ଗତ କିଛି ବର୍ଷ ଧରି ସେ ଆହତଜନିତ କାରଣରୁ ଅନ୍ତର୍ଜାତୀୟ ତ ଦୂରର କଥା, ପ୍ରଥମ ଶ୍ରେଣୀ କ୍ରିକେଟରୁ ମଧ୍ୟ ଦୂରେଇ ରହିଥିଲେ ।
Kanak News is now on WhatsApp
Join and get latest news updates delivered to you via WhatsApp
୨୦୦୩ରେ ନିଜର କ୍ୟାରିୟର ଆରମ୍ଭ କରିଥିବା ଇରଫାନ ୨୦୧୨ ଅକ୍ଟୋବରରେ ଭାରତ ପାଇଁ ନିଜର ଶେଷ ଅନ୍ତର୍ଜାତୀୟ ମ୍ୟାଚ ଖେଳିଥିଲେ । ସେହିପରି ୨୦୧୯ ଫେବ୍ରୁଆରି ମାସରେ ସେ ଜମ୍ମୁ ଓ କଶ୍ମୀର ପାଇଁ ସୟଦ ମୁସ୍ତାକ ଅଲ୍ଲୀ ଟ୍ରଫି ଖେଳିଥିଲେ । ଏହା ତାଙ୍କ କ୍ୟାରିୟରର ଶେଷ ପ୍ରତିଯୋଗିତାମୂଳକ ମ୍ୟାଚ ଥିଲା । ଏଥର ଆଇପିଏଲ ନିଲାମି ପାଇଁ ମଧ୍ୟ ସେ ନିଜକୁ ଉପଲବ୍ଧ କରାଇ ନଥିଲେ ।
୨୦୦୩ରେ ଭାରତୀୟ ଦଳର ଅଷ୍ଟ୍ରେଲିଆ ଗସ୍ତକାଳରେ ସେ ନିଜର ଟେଷ୍ଟ କ୍ୟାରିୟର ଆରମ୍ଭ କରିଥିଲେ । ଆଡିଲେଡ ଓଭାଲଠାରେ ସେ ନିଜର ପ୍ରଥମ ମ୍ୟାଚ ଖେଳି ଭାରତ ପକ୍ଷରୁ ବୋଲିଂ ଓପନ କରିଥିଲେ । ଏହି ମ୍ୟାଚରେ ସେ ମାଥ୍ୟୁ ହେଡେନଙ୍କ ପରି ମହାନ ବ୍ୟାଟ୍ସମ୍ୟାନଙ୍କୁ ଆଉଟ କରି ଚର୍ଚ୍ଚାକୁ ଆସିଥିଲେ । ସେ ଭାରତ ପକ୍ଷରୁ ୨୯ଟି ଟେଷ୍ଟ, ୧୨୦ଟି ଏକଦିବସୀୟ ଓ ୨୪ଟି ଟି-୨୦ ଖେଳିଛନ୍ତି । ଟେଷ୍ଟରେ ସେ ଗୋଟିଏ ଶତକ ଓ ୭ଟି ଅର୍ଦ୍ଧଶତକ ହାସଲ କରିଛନ୍ତି । ସେହିପରି ବୋଲିଂ କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନକରି ଟେଷ୍ଟରେ ୧୦୦ଟି ଓ ଏକଦିବସୀୟରେ ୧୭୩ଟି ଓ୍ଵିକେଟ ନେଇଛନ୍ତି ।