କରୋନା ମାଡରେ ବୋଲ୍ଡ ହେଲା ଆଇପିଏଲ୍ । ଫଟାଫଟ୍ କ୍ରିକେଟ ଅନିର୍ଦ୍ଧିଷ୍ଟ କାଳ ଯାଏଁ ସ୍ଥଗିତ, ଜୈବ ବଳୟରେ ଥାଇ ସୁଦ୍ଧା ଖେଳାଳିଙ୍କୁ ଛୁଇଁଲା କରୋନା ।
କନକ ବ୍ୟୁରୋ : ଆଇପିଏଲରେ ଲାଗିଛି କରୋନାର କଳା ନଜର । ଖେଳାଳିଙ୍କୁ ଭୂତାଣୁ ଛୁଇଁବା ପରେ ଫଟାଫଟ କ୍ରିକେଟରେ ଲାଗିଗଲା ଫୁଲଷ୍ଟପ । ସ୍ଥଗିତ ରହିଲା ଆଇପିଏଲର ଚଳିତ ସଂସ୍କରଣ । ଏକାଧିକ ଖେଳାଳି କରୋନା ଆକ୍ରାନ୍ତ ହେବା ପରେ ଅନିର୍ଦ୍ଦିଷ୍ଟ କାଳ ପାଇଁ ଏହାକୁ ସ୍ଥଗିତ ରଖାଯାଇଛି । ଆଇପିଏଲ ଗଭର୍ଣ୍ଣିଂ କାଉନସିଲ ଓ ବିସିସିଆଇ ଏକ ଜରୁରୀ ବୈଠକରେ ଆଇପିଏଲର ୧୪ ତମ ସଂସ୍କରଣର ବାକି ମ୍ୟାଚକୁ ଅନିର୍ଦ୍ଦିଷ୍ଟ କାଳ ଯାଏଁ ସ୍ଥଗିତ ରଖିବା ପାଇଁ ନିଷ୍ପତି ହୋଇଥିବା ସୂଚନା ଦେଇଛନ୍ତି ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଳା ।
Kanak News is now on WhatsApp
Join and get latest news updates delivered to you via WhatsApp
ଲକଡାଉନ୍, ସଟଡାଉନ୍ ଭିତରେ ସବୁ କିଛି ତ’ ବନ୍ଦ ହୋଇସାରିଥିଲା, ସିନେମା ହଲ୍, ପାର୍କ, ଗାର୍ଡେନ୍, ଏଂଟରଟେନମେଂଟ ପାର୍କ ଏମିତି ଅନେକ । ହୁଏତ, ଆଇପିଏଲ୍ ହିଁ ଏକମାତ୍ର ବଡ଼ ଇଭେଂଟ ଥିଲା, ଯାହା କରୋନା କାଳରେ ଲୋକଙ୍କୁ ମନୋରଂଜନର ଖୋରାକ୍ ଯୋଗାଇ ଆସୁଥିଲା । ହେଲେ, ଆଇପିଏଲ୍ ଖେଳ ଉପରେ ବି ଲାଗିଗଲା କରୋନାର କଳା ନଜର ।
ଖେଳାଳି ସଂକ୍ରମିତ, ଖେଳ ସ୍ଥଗିତ । ଆଇପିଏଲକୁ ନେଇ ବିସିସିଆର ବଡ଼ ନିଷ୍ପତ୍ତି । ବାୟୋ-ବବଲ୍ ବା ଜୈବ ସୁରକ୍ଷିତ ବାତାବରଣ ଭିତରେ ଆଇପିଏଲ୍ ଖେଳାଯାଉଥିଲେ ସୁଦ୍ଧା କିଛି ଦିନ ହେଲା, ବିଭିନ୍ନ ଦଳରୁ କରୋନା ସଂକ୍ରମିତ ଚିହ୍ନଟ ହେବା ଖବର ଆସିବାରେ ଲାଗିଥିଲା । ଆଉ ଏହାକୁ ଦୃଷ୍ଟିରେ ରଖି ଆଇପିଏଲର ଅବଶିଷ୍ଠ ମ୍ୟାଚକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି ।
ଋଦ୍ଧିମାନ ଶାହା, ସନରାଇଜର୍ସ ହାଇଦ୍ରବାଦ । ଲକ୍ଷ୍ମୀପତି ବାଲାଜୀ, ବୋଲିଂ କୋଚ୍, ଚେନ୍ନାଇ ସୁପର କିଙ୍ଗସ । ସନ୍ଦୀପ ୱାରିୟର୍ସ, କୋଲକାତା ନାଇଟ ରାଇଡର୍ସ, ବରୁଣ ଚକ୍ରବର୍ତ୍ତୀ କୋଲକାତା ନାଇଟ ରାଇଡର୍ସ । କ୍ରମାଗତ ଭାବରେ ଜଣେ ପରେ ଜଣେ ଖେଳାଳି ପଜିଟିଜ ଚିହ୍ନଟ ହେବା ପରେ ବିସିସିଆଇକୁ ବାଧ୍ୟ ହୋଇ କଠୋର ନିଷ୍ପତି ନେବାକୁ ପଡ଼ିଛି ।
ଯିବାକୁ ତ’ ବହୁ ବାଟ ଥିଲା । ହେଲେ ଅଧା ବାଟରେ କରୋନା ବାଟ ଓଗାଳି ଦେଲା । ଫଟାଫଟ କ୍ରିକେଟରେ ଲାଗିଗଲା ଫୁଲଷ୍ଟପ୍ । ଚଳିତ ମାସ ୩୦ ତାରିଖରେ ଆଇପିଏଲର ଫାଇନାଲ ଅହମ୍ମଦାବାଦରେ ହେବାକୁ ଥିଲା । ହେଲେ ଏହା ପୂର୍ବରୁ ୩୧ଟି ମ୍ୟାଚ୍ ଖେଳିବାକୁ ବାକିଥିଲା । ଆଉ ଟୁର୍ଣ୍ଣାମେଂଟ ସ୍ଥଗିତ ହେବା ପରେ ଏହା ପୁଣି କେବେ ଖେଳା ହେବ ତାହା ଆକଳନ କରିବା ବି ମୁସ୍କିଲ ।
ଆଇପିଏଲ୍ ଅତୀତରେ ଅନେକ ଝଡ଼ଝଞ୍ଜାକୁ ଅତିକ୍ରମ କରିଛି, କିନ୍ତୁ ଅଧା ମ୍ୟାଚରୁ ଟୁର୍ଣ୍ଣାମେଂଟ ସ୍ଥଗିତ ରଖିବା ଭଳି ସ୍ଥିତି କେବେ ଆସିନଥିଲା । ଦୁଇ ଦୁଇ ଥର ଭାରତ ବାହାରେ ଯାଇ ବିସିସିଆଇ ଆଇପିଏଲ୍ ଆୟୋଜନ କରିଛି । ୨୦୦୯ରେ ଦକ୍ଷିଣ ଆଫ୍ରିକା ଏବଂ ୨୦୧୪ରେ ୟୁଏଇରେ ଆଇପିଏଲ୍ ଆୟୋଜିତ ହୋଇଛି । ୨୦୦୯ରେ ଶ୍ରୀଲଙ୍କା ଟିମ୍ ଉପରେ ଆତଙ୍କବାଦୀ ଆକ୍ରମଣ ଭଳି ସାଂଘାତିକ୍ ଅଘଟଣ ପରେ ବି ଆଇପିଏଲ୍ ହୋଇଥିଲା । ନିର୍ବାଚନ ଥିବାରୁ ସୁରକ୍ଷା ଦେବାକୁ ଭାରତ ସରକାର ଅମଙ୍ଗ ହେବାରୁ ଦେଶ ବାହାରେ ଆଇପିଏଲ୍ ହୋଇଥିଲା । ହେଲେ ଏଥର କିନ୍ତୁ ବିସିସିଆଇକୁ କଠୋର ନିଷ୍ପତି ନେବାକୁ ବାଧ୍ୟ କରି ଦେଇଛି ଭୂତାଣୁ ।