ସେନସେକ୍ସ ବଜାଇଲା ସତର୍କଘଣ୍ଟି । ସେୟାର ବଜାରରେ ବଡ ହଲଚଲ୍ । ଗୋଟିଏ ଦିନରେ ଅଢ଼େଇ ଲକ୍ଷ କୋଟି ଟଙ୍କା ହରାଇଲେ ନିବେଶକାରୀ ।
କନକ ବ୍ୟୁରୋ : ମାନ୍ଦାବସ୍ଥା ନେଇ ଚିନ୍ତା ବଢ଼ୁଥିବା ବେଳେ ଗତକାଲି ସେୟାର ମାର୍କେଟରେ ଏପରି ମାଡ଼ ପଡ଼ିଛି, ଯାହା ସମସ୍ତଙ୍କ ଉଦବେଗକୁ ଆହୁରି ବଢ଼ାଇ ଦେଇଛି । ଗୋଟିଏ ଦିନର ଟ୍ରେଡିଂରେ ୨ ଲକ୍ଷ ୫୫ ହଜାର କୋଟି ଟଙ୍କା ହରାଇଛନ୍ତି ନିବେଶକ । ୧୩୮ ଲକ୍ଷ ୪୨ ହଜାର କୋଟି ଟଙ୍କାର ସେୟାର ଚାହୁଁ ଚାହୁଁ ବଜାରରୁ ଗାଏବ ହୋଇ ଯାଇଥିଲା ୨ ଲକ୍ଷ ୫୫ ହଜାର କୋଟି ଟଙ୍କା । ଗତକାଲିର କାରବାରରେ ୫୨ ସପ୍ତାହର ରେକର୍ଡ ଭାଙ୍ଗି ସର୍ବନିମ୍ନ ସ୍ତର ଛୁଇଁଥିଲା ୨୦୦ଟି କଂପାନୀର ସେୟାର ।
Kanak News is now on WhatsApp
Join and get latest news updates delivered to you via WhatsApp
କାରବାର ଶେଷ ବେଳକୁ ୭୭୦ ପଏଂଟ ହ୍ରାସ ପାଇ ୩୬ ହଜାର ୫୬୩ ପଏଂଟରେ ବନ୍ଦ ହୋଇଥିଲା ସେନସେକ୍ସ । ସେହିପରି ୨୨୫ ପଏଂଟ ହ୍ରାସ ପାଇ ନିଫ୍ଟି ୧୦ ହଜାର ୭୯୮ ପଏଂଟରେ ବନ୍ଦ ହୋଇଛି । ସେପଟେ ଡଲାର ତୁଳନାରେ ଟଙ୍କାର ମୂଲ୍ୟ ମଧ୍ୟ ଗୋଟିଏ ଦିନରେ ୬୪ ପଇସା ହ୍ରାସ ପାଇଛି । ଜିଡିପି ଅଭିବୃଦ୍ଧି ହାର ହ୍ରାସ ପାଇବା, ଉତ୍ପାଦନ କ୍ଷେତ୍ର ଗଭୀର ଭାବେ ପ୍ରଭାବିତ ହେବା, ବିଶେଷ କରି ଅଟୋ ସେକ୍ଟରରେ ମାନ୍ଦାବସ୍ଥା ଜାରି ରହିବା ଯୋଗୁଁ ସେୟାର ବଜାର ପ୍ରଭାବିତ ହୋଇଥିବା ଆଶଙ୍କା କରାଯାଉଛି ।
ସେୟାର ବଜାରରେ ବଡ଼ ହଲଚଲ । ୭୭୦ ପଏଣ୍ଟ ଖସିଲା ସେନସେକ୍ସ । ୨୨୫ ପଏଣ୍ଟ ହ୍ରାସ ପାଇଲା ନିଫ୍ଟି । ଗଣେଶ ପୂଜାରେ ସେୟାର ବଜାର ବନ୍ଦ ରହିବା ପରେ ଗତକାଲି ଯେତେବେଳେ କାରବାର ଆରମ୍ଭ ହେଲା, ନିବେଶକଙ୍କ ମୁଣ୍ଡ ଉପରେ ଚଡ଼କ ପଡିଗଲା । ପ୍ରାୟ ୨ ମାସର ରେକର୍ଡ ଭାଙ୍ଗି ଗୋଟିଏ ଦିନରେ ୭୭୦ ପଏଣ୍ଟ ଖସିଗଲା ସେନସେକ୍ସ ।
ବମ୍ବେ ଷ୍ଟକ୍ ଏକ୍ସଚେଂଜରେ ସବୁଠୁ ଅଧିକ ପ୍ରଭାବିତ ହୋଇଛି, ଆଇସିଆଇସିଆଇ ବ୍ୟାଙ୍କ, ଏଚଡିଏଫସି ବ୍ୟାଙ୍କ, ଟାଟା ଷ୍ଟିଲ୍, ଟାଟା ମୋଟର୍ସ, ଇଣ୍ଡସଇଣ୍ଡ ବ୍ୟାଙ୍କ ଓ ରିଲାଏନ୍ସ ଇଣ୍ଡଷ୍ଟ୍ରିଜର ସେୟାର । ସେହିପରି ଏନଏସଇ ଅନ୍ତର୍ଭୁକ୍ତ ସରକାରୀ ବ୍ୟାଙ୍କ ଓ ମେଟାଲ୍ ଶିଳ୍ପର ସେୟାରରେ ବିପୁଳ କ୍ଷତି ସହିଛନ୍ତି ନିବେଶକ ।
କାହିଁକି ବଜାର ଉପରେ କମୁଛି ନିବେଶକଙ୍କ ଆସ୍ଥା ?
– ଜୁଲାଇ ମାସରେ କୋଇଲା, ଅଶୋଧିତ ତୈଳ, ପ୍ରାକୃତିକ ବାଷ୍ପ, ରିଫାଇନାରୀ, ସାର, ଇସ୍ପାତ, ସିମେଂଟ, ବିଦ୍ୟୁତ ଭଳି ୮ଟି କୋର୍ ସେକ୍ଟରରେ ଅଭିବୃଦ୍ଧି ମାତ୍ର ୨.୧ ପ୍ରତିଶତ ହୋଇଥିବା ନେଇ ସରକାରଙ୍କ ରିପୋର୍ଟ । ଗତବର୍ଷ ଏହି ସମୟରେ ୭.୩ ପ୍ରତିଶତ ହାରରେ ଅଭିବୃଦ୍ଧି ଘଟିଥିଲା ।
– ଚଳିତ ଆର୍ଥିକ ବର୍ଷ ପ୍ରଥମ ତିନି ମାସରେ ୫ ପ୍ରତିଶତକୁ ଖସି ଆସିଲା ଜିଡିପି ଅଭିବୃଦ୍ଧି ହାର । ଉତ୍ପାଦନ କ୍ଷେତ୍ରରେ ନିରାଶାଜନକ ପ୍ରଦର୍ଶନ ।
– ଅଗଷ୍ଟ ମାସରେ ଅଟୋ ସେକ୍ଟରରେ ସାଂଘାତିକ ମାନ୍ଦାବସ୍ଥା । ବିକ୍ରି କମିଯିବାରୁ ଉତ୍ପାଦନ କମ୍ କଲେ ମାରୁତି ଓ ଟାଟା ମୋଟର ଭଳି ବଡ଼ ବଡ଼ କଂପାନୀ ।
– ୧୦ଟି ବ୍ୟାଙ୍କକୁ ମିଶାଇ ୪ଟି ବଡ଼ ବ୍ୟାଙ୍କ ଘୋଷଣା ପରେ ସରକାରୀ ବ୍ୟାଙ୍କ ସେୟାରରେ ବଡ଼ ହ୍ରାସ ।
– ଦିନକୁ ଦିନ ଡଲାର ତୁଳନାରେ ଟଙ୍କାର ମୂଲ୍ୟ ହ୍ରାସ । ଗୋଟିଏ ଦିନରେ ୬୪ ପଇସା ବଢ଼ି ୧ ଡଲାରର ମୂଲ୍ୟ ହେଲା ୭୨ଟଙ୍କା ୩ପଇସା । ଅଗଷ୍ଟ ମାସରେ ଭାରତୀୟ ସେୟାର ବଜାରରୁ ୬୦୦୦ କୋଟି ଟଙ୍କା ଉଠାଇ ନେଇଛନ୍ତି ବିଦେଶୀ ନିବେଶକ ।
– ଆମେରିକା-ଚୀନ ବାଣିଜ୍ୟିକ ଲଢ଼େଇ ମଧ୍ୟ ସେୟାର ବଜାରକୁ ପ୍ରଭାବିତ କରୁଛି ।