କେରଳ ବିମାନ ଦୁର୍ଘଟଣାରେ ତଦନ୍ତ ଆରମ୍ଭ : ରନୱେ ବିପଦପୂର୍ଣ୍ଣ ବୋଲି ଚେତାଇଥିଲେ ବିଶେଷଜ୍ଞ; ଦୁର୍ଘଟଣାରେ ବର୍ତ୍ତମାନ ସୁଦ୍ଧା ଦୁଇ ପାଇଲଟଙ୍କ ସହ ୧୮ ଜଣଙ୍କ ମୃତ୍ୟୁ
କନକ ବ୍ୟୁରୋ : କେରଳ କୋଝିକୋଡ୍ ବିମାନ ଦୁର୍ଘଟଣାର ଆରମ୍ଭ ହୋଇଛି ତଦନ୍ତ । କିପରି ସ୍ଥିତିରେ ଘଟିଲା ଦୁର୍ଘଟଣା ସେନେଇ ତଦନ୍ତ ଆରମ୍ଭ ହୋଇଛି । ଗତକାଲି ଦୁର୍ଘଟଣା ପରେ ତଦନ୍ତ ନିର୍ଦ୍ଦେଶ ଦେଇଥିଲା ଡିଜିସିଏ । ଆଜି ସ୍ଥିତି ଅନୁଧ୍ୟାନ ପାଇଁ ଦୁର୍ଘଟଣା ସ୍ଥଳକୁ ବେସାମିରକ ବିମାନ ଚଳାଚଳ ମନ୍ତ୍ରୀ, କେରଳ ମୁଖ୍ୟମନ୍ତ୍ରୀ ଓ ରାଜ୍ୟପାଳ ଘଟଣା ସ୍ଥଳକୁ ଯାଇ ପରିଦର୍ଶନ କରିବା କାର୍ଯ୍ୟସୂଚୀ ରହିଛି । ଏହା ପରେ ଦିଲ୍ଲୀରେ ହେବ ମାନସମଂଥନ । ୯ ବର୍ଷ ପୂର୍ବରୁ କେରଳର କୋଝିକୋଡ୍ ଅନ୍ତର୍ଜାତୀୟ ବିମାନ ବନ୍ଦରରେ ବିମାନ ଅବତରଣକୁ ବିପଦ ପୂର୍ଣ୍ଣ ବୋଲି ରିପୋର୍ଟ ଦେଇଥିଲେ ବିଶେଷଜ୍ଞ । ଏହାକୁ ଅଣଦେଖା କରାଯାଇଥିଲା । ଶେଷରେ ଘଟିଲା ଏପରି ଏକ ଦୁର୍ଘଟଣା । ଯେଉଁଥିରେ ମୃତ୍ୟୁ ସଂଖ୍ୟା ୧୮କୁ ବୃଦ୍ଧି ହୋଇଛି । ଦୁଇ ଜଣ ପାଇଲଟଙ୍କ ସମେତ ଆଉ ୧୬ ଯାତ୍ରୀ ପ୍ରାଣ ହରାଇଛନ୍ତି । ୧୨୩ ଜଣ ଯାତ୍ରୀ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ୧୫ ଜଣଙ୍କ ଅବସ୍ଥା ଗୁରୁତର ରହିଛି ।
Kanak News is now on WhatsApp
Join and get latest news updates delivered to you via WhatsApp
ଦୁର୍ଘଟଣା ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେରଳ ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି । କେନ୍ଦ୍ରପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଅର୍ଥମନ୍ତ୍ରୀ ନିର୍ମଳା ସୀତାରମଣ, ଗୃହ ମନ୍ତ୍ରୀ ଅମିତ ଶାହା ପ୍ରମୁଖ ଟ୍ୱିଟ୍ କରି ଗଭୀର ଦୁଃଖପ୍ରକାଶ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଟ୍ୱିଟ୍ କରି ଦୁଃଖ ପ୍ରକାଶ ସହ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି ।