ନକ୍ସଲଙ୍କ ମୁହଁରେ ଲାଲଗଡର କାହାଣୀ ! କହିଲେ ମାଓ ସଙ୍ଗଠନକୁ ଚାରିଆଡୁ ଘେରିଛନ୍ତି ସୁରକ୍ଷାକର୍ମୀ , କଠିନ ପରିସ୍ଥିତି ଦେଇ ଗତି କରୁଛି ନକ୍ସଲ ଆନ୍ଦୋଳନ
କନକ ବ୍ୟୁରୋ : କଠିନ ପରିସ୍ଥିତି ଦେଇ ଗତି କରୁଛି ଲାଲବାହିନୀ । ଏହାକୁ କ୍ୟାମେରା ସାମନାରେ ସ୍ୱୀକାର କରିଛନ୍ତି ବାଂଶଧାର ଘୁମୁସର ନାଗାବଳୀ ଡିଭିଜନର ଟପ୍ ମାଓନେତା ଉମାକାନ୍ତ । ହେଲେ ଦେଖାଇଛନ୍ତି ଦମ୍ଭୋକ୍ତି । କହିଛନ୍ତି ସରକାରଙ୍କ ଫାଶିବାଦୀ ଦମନ ଯୋଗୁଁ କଠିନ ପରିସ୍ଥିତି ସୃଷ୍ଟି ହୋଇଛି । ଏହାସହ ନିୟମଗିରି ଆନ୍ଦୋଳନରେ ମାଓବାଦୀଙ୍କ ସଂପୃକ୍ତି ପ୍ରସଙ୍ଗରେ ଉତର ରଖି ମାଓନେତା କହିଛନ୍ତି, ଖଣିଜ ସଂପଦ ଲୁଟ୍ ପାଇଁ ଉଦ୍ୟମ କରୁଥିବା ସରକାର ମିଛରେ ଲାଲ ସଂଗଠନକୁ ନିୟମଗିରି ସହ ଯୋଡି ବଦନାମ୍ କରୁଛି ।
Kanak News is now on WhatsApp
Join and get latest news updates delivered to you via WhatsApp
ସରକାରଙ୍କ ବିକାଶମୂଳକ କାର୍ଯ୍ୟକୁ ମାଓବାଦୀ ମାନେ ବିରୋଧ କରୁଥିବା ନେଇ ଟପ ମାଓନେତା ଉମାକାନ୍ତ କହିଛନ୍ତି, ମାଓବାଦୀ କେବେ ବି ବିକାଶ ବିରୋଧୀ ନୁହନ୍ତି । ଯେଉଁ ବିକାଶ କଥା କହି ଉଭୟ କେନ୍ଦ୍ର ଓ ରାଜ୍ୟ ସରକାର କଣ୍ଠ ଫଟେଇ ଚିକ୍ରାର କରୁଛନ୍ତି, ଆଜି ଯାଏଁ, ସ୍ୱାଧୀନାତାର ୭୨ ବର୍ଷ ପରେ ମଧ୍ୟ କାହିଁକି ଲୋକଙ୍କ ବିକାଶ ହୋଇପାରି ନାହିଁ । ସରକାର ଉଦାସୀନ ରହି, ପ୍ରତାରଣା କରି, ଲୋକଙ୍କୁ ଧୋକ୍କା ଦେଇ ଆଜି ବିକାଶର ବାହାନା ଦେଖାଉଛି । ମାଓବାଦୀ ଓ ଲୋକଙ୍କ ଚିନ୍ତା କରିବା ବିକାଶ ଓ ସରକାରଙ୍କ ଚିନ୍ତା ବିକାଶ କରିବା ଅବଧାରଣା ଭିତରେ ଆକାଶ ପାତାଳ ଫରକ ରହିଛି ବୋଲି କହିଛନ୍ତି ଏହି ମାଓ ନେତା ।
ସରକାରଙ୍କ ଗୋଟିଏ ଉଦ୍ଦେଶ୍ୟ ହେଲା ଏଠାରେ ଥିବା ଖଣିଜ ପଦାର୍ଥକୁ ଲୁଟ୍ କରି ବିଦେଶୀ କମ୍ପାନୀକୁ ପୋତ୍ସାହନ ଦେବା ସହ ସେମାନଙ୍କ ବଜାରକୁ ବିସ୍ତାର କରିବା । ଯାହାକୁ ସାଧାରଣ ଲୋକ ବିରୋଧ କରୁଛନ୍ତି । କିନ୍ତୁ ସରକାର ଏହାକୁ ବିକାଶ କହୁଛନ୍ତି । ବିକାଶ ନାଁରେ ରାଜ୍ୟ ଓ କେନ୍ଦ୍ର ସରକାର ରାଜ୍ୟକୁ ବିକ୍ରି କରି ଚାଲିଛନ୍ତି । ବିକାଶ ନାଁରେ ବିନାଶ କରୁଛନ୍ତି ସରକାର ଯାହାକୁ ବନ୍ଦ କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି ।
ଏହାଛଡା ମାଓ ସଙ୍ଗଠନ ଦିନକୁ ଦିନ ଦୁର୍ବଳ ହେଉଯାଉଥିବା ପ୍ରଶ୍ନର ଉତ୍ତରରେ ମାଓନେତା ଉମାକାନ୍ତ କହିଛନ୍ତି, ଗୋଟିଏ ପଟେ ମାଓବାଦୀ ସଙ୍ଗଠନ ଦୁର୍ବଳ ହୋଇଗଲାଣି ବୋଲି ସରକାର କହୁଛନ୍ତି କିନ୍ତୁ ଅନ୍ୟପଟେ ହଜାର ହଜାର ବିଏସଏଫ, ସିଆରପିଏଫ ଏବଂ ଅର୍ଦ୍ଧସାମରିକ ଯବାନ ଓ ସ୍ୱତନ୍ତ୍ର କମାଣ୍ଡୋଙ୍କୁ ଆଣି ମୁତୟନ କରୁଛନ୍ତି । ଆଜି ଫାଶୀବାଦୀ ଦମନ ଯୋଗୁଁ କ୍ରାନ୍ତିକାରୀ ଆନ୍ଦୋଳନ ଏବେ ଏକ କଠିନ ପରିସ୍ଥିତି ଦେଇ ଗତି କରୁଛି ସତ । କିନ୍ତୁ ସରକାର ଯେଉଁ ଦାବି କରୁଛନ୍ତି ତାହା କେବଳ ମନବୈଜ୍ଞାନିକ ଯୁଦ୍ଧ । ମାଓ ଆନ୍ଦୋଳନକୁ ଶେଷ କରିବାକୁ ସରକାର ଯେଉଁ ଯୋଜନା ପ୍ରସ୍ତୁତ କରୁଛନ୍ତି ତାହା ସମ୍ପୂର୍ଣ୍ଣ ଭାବେ ବିଫଳ ହେବ ବୋଲି ସେ କହିଛନ୍ତି ।
ଏହାଛଡା ଫାଶୀବାଦୀ ମୋଦି ସରକାର ସାମ୍ରାଜ୍ୟବାଦର ହିତ ପାଇଁ ମେକ ଇନ୍ ଇଣ୍ଡିଆ ନାଁରେ ଦେଶର ପ୍ରାକୃତିକ ସମ୍ପତିକୁ ବିଦେଶୀ ଲୋକଙ୍କ ହାତରେ ଟେକି ଦେବା ପାଇଁ ବସିଛନ୍ତି । ସ୍କିଲ ଇଣ୍ଡିଆ ନାଁରେ ଭାରତ ବର୍ଷର ଶସ୍ତା ଶ୍ରମକୁ ବହୁ ରାଷ୍ଟ୍ର କମ୍ପାନୀ ହାତରେ ଟେକି ଦେବା ପାଇଁ ବସିଛନ୍ତି । ଆଉ ବିମୁଦ୍ରୀକରଣ ଓ ଜନଧନ ଯୋଜନା ନାଁରେ ଲୋକ ନିଜର ପେଟ କାଟି ସଂଚୟ କରିଥିବା ଟଙ୍କାକୁ ବ୍ୟାଙ୍କକୁ ନେଇ ସେହି ବ୍ୟାଙ୍କ ଟଙ୍କାକୁ ବଡବଡ ପୁଂଜିପତିଙ୍କ ହାତକୁ ଟେକିଦେବା ପାଇଁ ଚେଷ୍ଟା କରୁଛନ୍ତି ବୋଲି ସେ କହିଛନ୍ତି । ତେବେ ଏସବୁ ଭିତରେ ସୁରକ୍ଷାକର୍ମୀଙ୍କ ମୁକାବିଲା ପାଇଁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରୁଥିବା ମାଓନେତା ଉମାକାନ୍ତ କହିଛନ୍ତି ।