ରୋଚକ ହେଉଛି ଦଶପଲ୍ଲାର ରାଜନୀତି । ବିଜେଡି ବିଜେପି ଆଉ ସ୍ୱାଭିମାନ ମଞ୍ଚ ଭିତରେ ଟଣା ଓଟରା
କନକ ବ୍ୟୁରୋ: ରୋଚକ ହେଉଛି ଦଶପଲ୍ଲାର ରାଜନୀତି । ବିଜେଡି ବିଜେପି ଆଉ ସ୍ୱାଭିମାନ ମଞ୍ଚର ଟଣା ଓଟରା ଭିତରେ ଲୋକଙ୍କ ଚର୍ଚ୍ଚା ବଢିବାରେ ଲାଗିଛି । ଗତ ୨୦ ବର୍ଷର ଇତିହାସରେ ପ୍ରଥମ ଥର ପାଇଁ ବିଧାୟକ ରମେଶ ବେହେରାଙ୍କୁ ରିପିଟ କରିଛି ବିଜେଡି । ବିଭିନ୍ନ ଦଳୀୟ ଅସନ୍ତୋଷ ଭିତରେ ଅସନ୍ତୁଷ୍ଟଙ୍କୁ ଦଳକୁ ଫେରାଇ ଆଣିବା ପ୍ରୟାସ ଜାରି ରଖିଛନ୍ତି ବିଧାୟକ ।
Kanak News is now on WhatsApp
Join and get latest news updates delivered to you via WhatsApp
ବିଜୁ ଜନତା ଦଳର ୨୫ ବର୍ଷର ସ୍ଥିର ସରକାର ସହ ଲୋକେ ରହିବେ ବୋଲି ଦଳୀୟ କର୍ମକର୍ତ୍ତା କହିଛନ୍ତି । ସେପଟେ ଦୀର୍ଘ ବର୍ଷ ଧରି ସଂଗଠନ ସହ ଜଡିତ ଥିବା ରାଘବ ମଲ୍ଲିକଙ୍କୁ ବିଜେପି ଏଥର ପ୍ରାର୍ଥୀ କରିଛି । ଆଉ ଟିକେଟ ମିଳିବା ଦିନଠାରୁ ପ୍ରଚାର ମୈଦାନକୁ ଓହ୍ଲାଇ ସାରିଛନ୍ତି ରାଘବ । ନାହିଁ ନାହିଁର ୨୫ ବର୍ଷର ବିଜେଡି ସରକାର ବିରୁଦ୍ଧରେ ତାଙ୍କ ଲଢେଇକୁ ଲୋକେ ସମର୍ଥନ କରିବେ ବୋଲି ସେ କହିଛନ୍ତି ।
ବିଜେଡି ବ୍ୟାନରରେ ରହି ବିଧାୟକଙ୍କୁ ବିରୋଧ କରିଆସୁଥିବା ଦଶପଲ୍ଲା ସ୍ୱାଭିମାନ ମଞ୍ଚ ବିଗତ ଦିନରେ ରାଲି ସମାବେଶ ଇତ୍ୟାଦି କରାଇ ବିଧାୟକଙ୍କ ବହିସ୍କାର ଦାବି କରି ଆସୁଥିଲେ । ଏବେ ପୁଣିଥରେ ବିଧାୟକଙ୍କ ପ୍ରାର୍ଥୀତ୍ୱ ଫଳରେ ଅସନ୍ତୁଷ୍ଟ ସ୍ୱାଭିମାନ ମଞ୍ଚ ବିଜେପିରେ ଯୋଗ ଦେଇଛି । ଫଳରେ ବିଜେପି ଶକ୍ତିଶାଳୀ ହେବା ସହ ଜିତିବାକୁ ଦାବି କରିଛି । ତେବେ ସ୍ୱାଭିମାନ ମଂଚରୁ ଆସିଥିବା ଡାକ୍ତର ରବିନ୍ଦ୍ର ସେଠୀଙ୍କୁ ଟିକେଟ ଦେବା ପାଇଁ ରାଜ୍ୟ ନେତୃତ୍ୱଙ୍କଠାରେ ଦାବି କରିଛି ସ୍ୱାଭିମାନ ମଞ୍ଚ ।
ଏ ପର୍ଯ୍ୟନ୍ତ ତାର ପ୍ରାର୍ଥୀ ଘୋଷଣା କରିନଥିବା କଂଗ୍ରେସ ଏଠାରେ ପ୍ରଭାବ ଶୂନ୍ୟ ରହିଥିବା ବେଳେ ବିଜେପି ର ଚୂଡାନ୍ତ ନିଷ୍ପତିକୁ ଅପେକ୍ଷା କରାଯାଇଛି । ତେବେ ନିର୍ବାଚନୀ ମଇଦାନରେ ଏଥର ତ୍ରିମୁଖୀ ଲଢେଇ ଜୋରଦାର ହେବାର ଜଣାପଡିଛି ।