କନକ ବ୍ୟୁରୋ : ବେଆଇନ ଆତଙ୍କୀ ସଂଗଠନକୁ ନେଇ ଗୁଇନ୍ଦା ବିଭାଗ ସରକାରଙ୍କୁ ସତର୍କ କରାଇଛି । ଗୁଇନ୍ଦା ବିଭାଗ କହିଛି ଯେ ପ୍ରତିବନ୍ଧିତ ଆତଙ୍କୀ ସଂଗଠନ ‘ଶୀଖ୍ ଫର ଜଷ୍ଟିସ’ କୌଣସି ସମୟରେ ସଂସଦ ଭବନରେ ଖଲିସ୍ତାନୀ ପତାକା ଲଗାଇପାରେ । ଏନେଇ ଜାତୀୟ ଗଣମାଧ୍ୟମର ହସ୍ତଗତ ହୋଇଥିବା ଗୁଇନ୍ଦା ସଂସ୍ଥାର ରିପୋର୍ଟ ମୁତାବକ ‘ଶୀଖ ଫର ଜଷ୍ଟିସ’ ଆତଙ୍କବାଦୀ ସଂଗଠନର ନେତା ପନ୍ନୁ ୟୁଟ୍ୟୁବରେ ଏକ ଭିଡିଓ ଜାରି କରିଛି । ଏହି ଭିଡିଓରେ ଦୀର୍ଘଦିନ ହେବ କୃଷି ଆଇନକୁ ବିରୋଧ କରି ଆନ୍ଦୋଳନ ଚଳାଇଥିବା କୃଷକମାନଙ୍କୁ ଅପିଲ କରାଯାଇଛି କି ନଭେମ୍ବର ୨୯ ତାରିଖରେ ସଂସଦରେ ଶୀତକାଳୀନ ଅଧିବେଶନ ସମୟରେ ସଂସଦ ଘେରାଉ କର ଓ ଖଲିସ୍ତାନୀ ପତାକା ସଂସଦରେ ଲଗାଅ ।
Kanak News is now on WhatsApp
Join and get latest news updates delivered to you via WhatsApp
କେବଳ ସେତିକି ନୁହେଁ ପନ୍ନୁ ଏହି ଭିଡିଓ ମାଧ୍ୟମରେ କହିଛନ୍ତି ଯେ, ଯିଏ ସଂସଦ ଭବନରେ ଖଲିସ୍ତାନୀ ପତାକା ଉଡାଇବ ତାକୁ ଦେଢଲକ୍ଷ ଡଲାର ପୁରସ୍କାର ମିଳିବ । ଏହି ଖବର ପାଇବା ପରେ ଗୁଇନ୍ଦା ବିଭାଗ ଦିଲ୍ଲୀ ପୋଲିସ ସମେତ ସବୁ ଏଜେନ୍ସିକୁ ସତର୍କ ସୂଚନା ଜାରି କରିଛି । ଏହାସହ ସଂସଦ ଭବନ ପାଖା ପାଖି ସମସ୍ତ ଇଲାକାରେ ସୁରକ୍ଷା ବ୍ୟବସ୍ଥା କଡା କଡି କରିବାକୁ କହିଛି ।
କହିରଖୁ କି , ପ୍ରତିବନ୍ଧିତ ଆତଙ୍କୀ ସଂଗଠନ ‘ଶୀଖ ଫର ଜଷ୍ଟିସ’ ଚଳିତ ବର୍ଷ ଆରମ୍ଭରୁ ଆନ୍ଦୋଳନକାରୀ କୃଷକଙ୍କୁ ପ୍ରଭାବିତ କରିବାକୁ ଚେଷ୍ଟା କରିଥିଲା । ଆତଙ୍କୀ ସଂଗଠନ ଘୋଷଣା କରିଥିଲା କି ଗଣତନ୍ତ୍ର ଦିବସରେ ଯିଏ ଲାଲ କିଲ୍ଲାରେ ଖଲିସ୍ତାନୀ ପତାକା ଲଗାଇବ ତାଙ୍କୁ ଅଢେଇ ଲକ୍ଷ ଡଲାର ପୁରସ୍କାର ମିଳିବ ।
ସୂଚନା ଥାଉକି ‘ଶୀଖ୍ ଫର ଜଷ୍ଟିସ’ ସମେତ ସମସ୍ତ ଖଲିସ୍ତାନୀ ଆତଙ୍କବାଦୀ ସଂଗଠନ ଓ ତାଙ୍କ ସହିତ ଜଡିତ ବେସରକାରୀ ସଂଗଠନଗୁଡିକୁ କେଉଁଠୁ ଅର୍ଥ ଆସୁଛି ତା ଉପରେ ତୀକ୍ଷ୍ଣ ନଜର ରଖିଛି ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ)