ମୁଁ ବୁଢା ହେଇଗଲି ବୋଲି ପର କରିଦେଲା ମାଲିକ… ଦିନେ ମୋ ପିଠିରେ ବୋଝ ବୋହି ରୋଜଗାର କରୁଥିଲା ମାଲିକ, ଆଜି ବଳ ହଟିଗଲା ବୋଲି ରାସ୍ତା କଡରେ ଛାଡିଦେଲା…
କନକ ବ୍ୟୁରୋ: ଓଟ ଆଖିରେ ଲୁହ । ସରିଗଲା ସ୍ୱାର୍ଥ, ଛାଡିଦେଲା ମଣିଷ । ସ୍ୱାର୍ଥ ସରିଗଲା ବୋଲି ମାଲିକ ପର କରିଦେଲା । ବୁଢା ହେଇଗଲା ବୋଲି ଓଟକୁ ରାସ୍ତାରେ ଛାଡିଦେଇଗଲା ସ୍ୱାର୍ଥପର ମାଲିକ । ମଣିଷ ମନରୁ ମରିଗଲା ମାନବିକତା । ଦିନେ ଏଇ ଓଟକୁ ନେଇ ନିଜ ସ୍ୱାର୍ଥ ସାଧନ କରୁଥିଲା ମଣିଷ । ନିଜ କାମରେ, ନିଜ ବେପାର ବଣିଜରେ ଖଟାଉଥିଲା ହେଲେ ଆଜି ବୟସ ହେଇଗଲା ବୋଲି, ଦେହରୁ ବଳ ହଟିଗଲା ବୋଲି ଜଙ୍ଗଲିଆ ରାସ୍ତାରେ ଅତି ଅମାନବିକତାର ସହ ବୃଦ୍ଧ ପଶୁକୁ ଦୂରେଇଦେଲା ମାଲିକ । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ଗଞ୍ଜାମ ଖଲ୍ଲିକୋଟ ମାନାପୋଲି ଛାଞ୍ଚୁଣିଆ ଜଙ୍ଗଲରେ…
Kanak News is now on WhatsApp
Join and get latest news updates delivered to you via WhatsApp
ତେବେ ଗତ କିଛି ଦିନ ହେବ ଏଇ ଜଙ୍ଗଲ ପାଖ ରାସ୍ତାରେ ଏକ ବୃଦ୍ଧ ଓଟକୁ ଦେଖିଥିଲେ ସ୍ଥାନୀୟ ଲୋକେ । ଖାଇବାକୁ ନପାଇ ଭୋକ ଉପାସରେ ଓଟ ପଡିଥିବା ଦେଖିବାକୁ ପାଇଥିଲେ । ଅତି ରୋଗୀଣା ଅବସ୍ଥାରେ ରାସ୍ତା କଡରେ ଓଟର ଏ ଅବସ୍ଥା ଦେଖି କିଛି ସହୃଦୟ ବ୍ୟକ୍ତି ନିରୀହ ପଶୁ ପେଟରେ ଦାନା ଦେଇଥିଲେ । ଆଉ ଖାଦ୍ୟ ଟିକେ ପାଇଁ ଭୋକିଲା ଓଟ ଆଖି ମିଟିମିଟି କରିଥିଲା ।
ସେପଟେ ସ୍ଥାନୀୟ ଲୋକଙ୍କ କହିବା କଥା ଓଟକୁ ତା ମାଲିକ ନିଜ କାମରେ ଲଗାଉଥିଲେ । ଏମିତି କି ବିଭିନ୍ନ ସମୟରେ ଖଲ୍ଲିକୋଟ ଅଞ୍ଚଳରେ ଓଟକୁ ନେଇ ମାଲିକ ବେପାରରେ ଲଗାଉଥିବା ଦେଖିବାକୁ ମିଳିଥିଲା । ଓଟ ସାହାଯ୍ୟରେ ସାରା ଜୀବନ ଟଙ୍କା ରୋଜଗାର କରି ଶେଷରେ ମାଲିକ କାମରେ ଆସୁନଥିବା ଓଟକୁ ରାସ୍ତାରେ ଛାଡି ଦେଇ ପଳାଇଛି । ଏହାଠାରୁ ଅତି ଘୃଣ୍ୟ ଘଟଣା ଆଉ କଣ ହୋଇପାରେ ।
ଦିନେ ଯେଉଁ ପଶୁ ମଣିଷକୁ ଲାଭ ଦେଉଥିଲା ତା କାମରେ ଆସୁଥିଲା ଆଜି ସିଏ କାମରେ ଲାଗୁନି ବୋଲି ତାକୁ ଏମିତି ଅବସ୍ଥାରେ ଛାଡିଦେବା କେତେ ଦୂର ଠିକ । ଯଦି ଓଟକୁ ଭଗବାନ କହିପାରିବାର ଶକ୍ତି ଦେଇଥାନ୍ତେ ହୁଏତ ସେ ଆଜି ଏ ସ୍ୱାର୍ଥପର ମଣିଷକୁ ପ୍ରଶ୍ନ ପଚାରୁଥାନ୍ତା, ମୁଁ ବୁଢା ହୋଇଗଲି ବୋଲି ମୋର କଣ ଜୀବନ ନାହିଁ, ବଞ୍ଚିବାର ଅଧିକାର ନାହିଁ ।