ଗାଳି ଦେଉଥିବା ଲୋକ ଯେତେବେଳେ ବେକରେ ଫୁଲମାଳ ପକାଏ, ସେତେବେଳେ ଭିତିରିଆ ସ୍ୱାର୍ଥ କଣ ଅଛି ବୁଝାପଡେ । ଜାଣନ୍ତୁ କାହା ଉଦ୍ଦେଶ୍ୟରେ କହିଲେ ଜୟନାରାୟଣ ।
ଜୟନାରାୟଣ କହିଛନ୍ତି, ବୋଧହୁଏ ମୋଠାରୁ ଅଧିକ ଯୋଗ୍ୟତା ଥିବା ବ୍ୟକ୍ତିଙ୍କୁ ଦଳ ପାଇଛି, ତେଣୁ ତାଙ୍କୁ ବିରୋଧୀ ଦଳ ନେତା ଦାୟିତ୍ୱ ଦିଆଯାଇଛି । ନିଜ ପାଖରେ ଅନେକ ଦୁର୍ଗୁଣ ଥିବା ସେ କନକ ନ୍ୟୁଜକୁ ସ୍ୱତନ୍ତ୍ର ସାକ୍ଷାତକାର ଦେଇ କହିଛନ୍ତି । ସେ କେବେ ଗଧକୁ ଘୋଡା କହିପାରିବେ ନାହିଁ ବୋଲି ସଫାସଫା ଶୁଣାଇ ଦେଇଛନ୍ତି ।
ପ୍ରଥମ ଥର ପାଇଁ ବିଧାନସଭାରେ ବିରୋଧୀଦଳର ମାନ୍ୟତା ପାଇଛି ବିଜେପି । ୨୩ ବିଧାୟକଙ୍କ ସହ ଦ୍ୱିତୀୟ ବୃହତ ଦଳ ଭାବେ ଉଭା ହୋଇଛି । ହେଲେ ବିଧାୟକ ଦଳ ଭିତରେ ଯେ ସବୁକିଛି ଠିକ ନାହିଁ, ତାକୁ ନେଇ ଚର୍ଚ୍ଚା କରାଯାଉଛି । ଖାସ କରି ବିରୋଧୀଦଳ ନେତା ପଦକୁ ନେଇ ମୁହାଁମୁହିଁ ହୋଇଛନ୍ତି ଜୟନାରାୟଣ ମିଶ୍ର ଓ ପ୍ରଦୀପ୍ତ ନାୟକ ।
Kanak News is now on WhatsApp
Join and get latest news updates delivered to you via WhatsApp
୨୦୦୯ ପର୍ଯ୍ୟନ୍ତ ବିଜେଡି ସହ ମେଂଟ କରି କ୍ଷମତାରେ ଥିବା ବିଜେପି ମେଂଟ ଭାଙ୍ଗିବା ପରେ ରାଜ୍ୟ ରାଜନୀତିରେ ବେଶ ଦୟନୀୟ ପ୍ରଦର୍ଶନ କରିଥିଲା । ୨୦୦୯ ଓ ୨୦୧୪ରେ ଯଥାକ୍ରମେ ୬ ଓ ୧୦ ବିଧାୟକ ଜିତିଥିଲେ । ୨୦୧୯ରେ ମିଶନ ୧୨୦ କଥା କହି କ୍ଷମତାକୁ ଆସିବାକୁ ଲକ୍ଷ୍ୟ ରଖିଥିବା ଦଳ ମାତ୍ର ୨୩ ଆସନରେ ସୀମିତ ରହିଲା ।
କୁହାଯାଉଛି, ୨୩ ବିଧାୟକ ଜିତିଥିଲେ ମଧ୍ୟ ବିଭିନ୍ନ ଗୋଷ୍ଠୀରେ ବିଭାଜିତ ହୋଇଛି ବିଜେପି ବିଧାୟକ ଦଳ । ଯେଉଁଥିପାଇଁ ବିରୋଧୀଦଳ ନେତା ଚୟନକୁ ନେଇ ଦଳ ଭିତରେ ଅସନ୍ତୋଷର ବହ୍ନି ଜଳିଛି । ମୁହଁ ଖୋଲି ଜୟନାରାୟଣ ମିଶ୍ର କହିଛନ୍ତି, ଦଳ କାହିଁକି ମତେ ବିରୋଧୀ ଦଳ ନେତା କଲାନାହିଁ, ତାର ଉତ୍ତର କେବଳ ସେମାନେ ଦେଇପାରିବେ । ଏହି ପ୍ରଶ୍ନର ଉତ୍ତର କେବେ ଖୋଜିବାକୁ ଚେଷ୍ଟା କରିନାହିଁ । କିଛି ଏଭଳି ଶାଣିତ ଉକ୍ତି ରଖି ଜୟନାରାୟଣ ବିଜେପିର ଶୀର୍ଷ ନେତୃତ୍ୱଙ୍କୁ ଟାର୍ଗେଟ କରିଛନ୍ତି ।
ଉକ୍ତିକୁ ଆହୁରି ଶାଣିତ କରି ଜୟନାରାୟଣ କହିଛନ୍ତି, ବୋଧହୁଏ ମୋଠାରୁ ଅଧିକ ଯୋଗ୍ୟତା ଥିବା ବ୍ୟକ୍ତିଙ୍କୁ ଦଳ ପାଇଛି, ତେଣୁ ତାଙ୍କୁ ବିରୋଧୀ ଦଳ ନେତା ଦାୟିତ୍ୱ ଦିଆଯାଇଛି । ନିଜ ପାଖରେ ଅନେକ ଦୁର୍ଗୁଣ ଥିବା ସେ କନକ ନ୍ୟୁଜକୁ ସ୍ୱତନ୍ତ୍ର ସାକ୍ଷାତକାର ଦେଇ କହିଛନ୍ତି । ସେ କେବେ ଗଧକୁ ଘୋଡା କହିପାରିବେ ନାହିଁ ବୋଲି ସଫାସଫା ଶୁଣାଇ ଦେଇଛନ୍ତି ।
ଯୁଦ୍ଧକୁ ଗଲାପରେ ସେ କେବଳ ବିଜୟ ଚାହାନ୍ତି । କେବେ ଯୁଦ୍ଧଭୁମୀରୁ ପଳାୟନ କରିପାରିବେ ନାହିଁ । ନବୀନ ପଟ୍ଟନାୟକଙ୍କ ବିରୁ୍ଦ୍ଧରେ ଦଳ ଯୁଦ୍ଧ ଘୋଷଣା କରିଥିଲା । ଆଉ ଯଦି ଏବେ କିଏ କହିବ ତାଙ୍କ ସପକ୍ଷରେ କହିବାକୁ, ତେବେ ସେ କହିପାରିବି ନାହିଁ । ଏହି ପଦିଏ କଥା ଅନେକ ବିବାଦୀୟ ଦିଗକୁ ସାମ୍ନାକୁ ଆଣିଛି । ଖାସ କରି ରାଜ୍ୟସଭା ଉପ-ନିର୍ବାଚନରେ ଯେତେବେଳେ ବିଜେଡି ସଂଖ୍ୟା ଥାଇ ସୁଦ୍ଧା ବିଜେପି ପ୍ରାର୍ଥୀଙ୍କୁ ସମର୍ଥନ କଲା, ସେତେବେଳେ ନୂଆ ରାଜନୈତିକ ସମୀକରଣକୁ ନେଇ ଚର୍ଚ୍ଚା କରାଗଲା ।
ରାଜ୍ୟସଭା ନିର୍ବାଚନ ପରିପ୍ରେକ୍ଷୀରେ ଜୟନାରାୟଣ କହିଛନ୍ତି, ଆଜିଯାଏଁ ଗାଳି ଦେଉଥିବା ନେତା ଯେତେବେଳେ ବେକରେ ଫୁଲମାଳ ପକାଉଛନ୍ତି, ସେତେବେଳେ ଏହାର କାରଣ ବୁଝିବାକୁ ପଡିବ । ସେମାନଙ୍କ ସ୍ୱାର୍ଥ ଥିବା ପାଇଁ ମିଶିଛନ୍ତି, ଏକଥା ବୁଝାପଡୁଛି । ଓଡିଶାର ସ୍ୱାର୍ଥ ପାଇଁ ଯଦି ସମର୍ଥନ ଦେଲେ ତେବେ କଣ ସ୍ୱାର୍ଥ ହାସଲ କରିଛନ୍ତି, ସେମାନଙ୍କୁ ଜବାବ ରଖିବାକୁ ପଡିବ ।
ଜୟନାରାୟଣ ଯେଉଁ ତମାମ ଦିଗ ସବୁ ଉଠାଇଛନ୍ତି, ତାହା ସାମ୍ପ୍ରତିକ ରାଜନୈତିକ ସ୍ଥିତିରେ ବେଶ ମହତ୍ତ୍ୱପୂର୍ଣ୍ଣ । କାରଣ, ବିଧାନସଭାରେ ଯଦିଓ ମୁଖ୍ୟ ବିରୋଧୀଦଳ ବିଜେପି, ହେଲେ ପ୍ରସଙ୍ଗ ଉଠାଇ ସରକାରଙ୍କୁ ଘେରିବା ଦିଗରେ ପଛଘୁଂଚା ଦେଉଥିବା ଦେଖିବାକୁ ମିଳୁଛି । ଏପରିକି ୯ ବିଧାୟକଙ୍କ ସହ କଂଗ୍ରେସ ବିଧାନସଭାରେ ଆହୁରି ପ୍ରଭାବୀ ପ୍ରଦର୍ଶନ କରୁଛି ।
ପଦକୁ ନେଇ ଜୟନାରାୟଣ ଅସନ୍ତୁଷ୍ଟ ଥିବାରୁ ଏଭଳି ବୟାନ ଦେଉଛନ୍ତି ନା ବିଜେଡି-ବିଜେପି ଭିତିରି ସଂପର୍କକୁ ନେଇ ଦଳ ଭିତରେ ଅସନ୍ତୋଷ କୁହୁଳୁଛି, ତାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । କିନ୍ତୁ ଏହି ପୁରା ପ୍ରକରଣରୁ ଗୋଟିଏ କଥା ସ୍ପଷ୍ଟ, ଦଳ ଭିତରେ ସବୁକିଛି ଠିକ ଚାଲିନାହିଁ । ଖାସକରି ବହୁଧା ବିଭାଜିତ ଗୋଷ୍ଠୀ ଏକାଠି ଭାବେ ରହିବା ପରିବର୍ତ୍ତେ ଯିଏ ଯାହା ବାଟରେ ନିଜ ଆଭିମୁଖ୍ୟ ସ୍ପଷ୍ଟ କଲାଭଳି ଲାଗୁଛି ।