ଅଲୋଡ଼ା ହୋଇଗଲେ ଇନ୍ଦ୍ରାବତୀ ବିସ୍ଥାପିତ: ଜଳଭଣ୍ଡାର ପାଇଁ ଭିଟାମାଟି ହରାଇ ପାହାଡ ଟାପୁରେ ରହୁଛନ୍ତି ୧୬ଟି ଗାଁର ଆଦିବାସୀ
କନକ ବ୍ୟୁରୋ: ଅଖୋଜା ସଭ୍ୟତାରେ ହଜି ଯାଇଛି ଇନ୍ଦ୍ରାବତୀ ବିସ୍ଥାପିତଙ୍କ ଜୀବନ । ଜଳଭଣ୍ଡାରରେ ଜଳ ରହିବାକୁ ଗାଁ ଛାଡିଲେ, ସରକାରଙ୍କୁ ଜମି ଦେଲେ । ବିଜୁଳି ଉତ୍ପାଦନ କରି ସରକାର ମାଲେମାଲ ହେଲେ, କିନ୍ତୁ ବିସ୍ଥାପିତଙ୍କୁ ଭୁଲିଗଲେ । ଫଳରେ ଭିଟାମାଟି ହରାଇ, ଅଭିଶପ୍ତ ପ୍ରାୟ ଜଳବନ୍ଦୀ ଜୀବନ ଜିଉଁଛନ୍ତି କଳାହାଣ୍ଡି ଜିଲ୍ଲାର ଆଦିବାସୀ । ଶିକ୍ଷା, ସ୍ୱାସ୍ଥ୍ୟ, ଗମନାଗମନରୁ ବଂଚିତ ବିସ୍ଥାପିତ ମୁଖ୍ୟ ସ୍ରୋତରେ ସାମିଲ ହେବା ପାଇଁ ବାରମ୍ବାର ନିବେଦନ କଲେ ବି କେହି ଶୁଣୁନଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
କଳାହାଣ୍ଡି ଇନ୍ଦ୍ରାବତୀ ଜଳରୁ ବିଜୁଳି ଉତ୍ପାଦନ ହେଲା, ଜଳଭଣ୍ଡର ଯୋଗୁଁ ଜିଲ୍ଲାର ଅନେକ ଅଂଚଳ ଶସ୍ୟଶାମଳା ହେଲା, ହେଲେ ଏଥିପାଇଁ ବିସ୍ଥାପିତ ହୋଇଥିବା ଗ୍ରାମବାସୀଙ୍କ ଜୀବନ ଅନ୍ଧାର ଭିତରକୁ ଢେଲି ହୋଇଗଲା । ସରକାରଙ୍କ ଦୃଷ୍ଟି ଆଢୁଆଳରେ ରହିଗଲେ ଭିଟାମାଟି ଛାଡି ପାହାଡ ଟାପୁରେ ରହୁଥିବା ପୋଡାପଦର ପଂଚାୟତର ୧୬ଟି ଗାଁର ଆଦିବାସୀ ।
ଥୁଆମୁଳରାମପୁର ସଦର ଠାରୁ ୭୫ କିଲୋମିଟର ଯିବା ପରେ ଡଙ୍ଗାରେ ପାଣି ପାରିିହେବାକୁ ପଡେ । ଜଳଭଣ୍ଡାରରେ ପ୍ରାୟ ୮ରୁ ୧୦ କିଲୋମିଟର ଯାତ୍ରା କରି ୭ କିଲୋମିଟର ପାହାଡ ଚଢିଲେ ଛୋଟ ଛୋଟ ଆଦିବାସୀ ବସ୍ତି ଦେଖିବାକୁ ମିଳେ । ଏମିତି ବସ୍ତିରେ ୧୬ଟି ଗାଁର ଲୋକେ ବସବାସ କରୁଛନ୍ତି । ଏଥିମଧ୍ୟରୁ ୨-୩ଟି ଗାଁର ବିସ୍ଥାପିତ କିଛି ସରକାରୀ ସୁବିଧା ପାଉଥିବା ବେଳେ ଅଧିକାଂଶ ଗାଁର ଆଦିବାସୀ ଆନ୍ଧାରୀ ଜୀବନ ବିତାଉଛନ୍ତି । ଶିକ୍ଷା, ସ୍ୱାସ୍ଥ୍ୟ, ଗମନାଗମନରୁ ବଂଚିତ ବିସ୍ଥାପିତ । ତେବେ ପାହାଡି ମୁଲକର ଏହି ଗାଁ ଗୁଡିକୁ ଭଲ ରାସ୍ତା ହେଲେ ଏମାନେ ସବୁ ପ୍ରକାର ମୌଳିକ ସୁବିଧା ସୁଯୋଗ ପାଇପାରନ୍ତେ ବୋଲି କହିଛନ୍ତି ।
ନିର୍ବାଚନ ସମୟରେ ଏଜେଂଟ ପଠାଇ କିଛି ଟଙ୍କା ଦେଇ ଲୋକଙ୍କୁ ପ୍ରଲୋଭିତ କରନ୍ତି ବିଭିନ୍ନ ଦଳର ନେତା । ସମସ୍ୟା ସମାଧାନ କରିବା ନେଇ କୁଢକୁଢ ପ୍ରତିଶ୍ରୃତି ଦେଇ ଭୋଟ ନେଇ ଯାଆନ୍ତି, ହେଲେ ନିର୍ବାଚନ ସରିଲେ, ଜନତାଙ୍କ ଦୁଃଖ ଭୁଲି ଯାଆନ୍ତି ଏଠାକାର ଜନ ପ୍ରତିନିଧି ।