ଚିକିତ୍ସକଙ୍କୁ ଦିଆଯିବ ଅକ୍ଷର ତାଲିମ ! ସହଜରେ ରୋଗୀ ଚିହ୍ନିପାରିବେ ଚିକିତ୍ସକଙ୍କ ଅକ୍ଷର । 

ଚିକିତ୍ସକଙ୍କ ଚିଠାରେ ଔଷଧର ବିବରଣୀ ଯେମିତି ଲେଖାଯାଇଥାଏ ତାହାକୁ ପଢିବା ସାଧାରଣ ଲୋକଙ୍କ ପକ୍ଷେ ଯେଭଳି ଅସମ୍ଭବ ହୋଇପଡେ । ରୋଗୀ ନିଜେ କେଉଁ ଔଷଧ ଖାଉଛନ୍ତି ସେ ବିଷୟରେ ବି ବେଳେବେଳେ ଅଜ୍ଞାତ ରହିଯାନ୍ତି । ଯାହା ଫଳରେ ସେମାନେ ବହୁ ଅସୁବିଧାର ସାମ୍ନା ମଧ୍ୟ କରିଥାନ୍ତି । ତେବେ ଲୋକଙ୍କ ଏହି ଅସୁବିଧାକୁ ଦୂର କରିବା ପାଇଁ ମଧ୍ୟପ୍ରଦେଶରେ ଏକ ଅଭିନବ ଉପାୟ କରାଯାଇଛି । ରାଜ୍ୟର ମେଡିକାଲ୍ କଲେଜଗୁଡିକର ବିଦ୍ୟାର୍ଥୀ ଏବଂ ବରିଷ୍ଠ ଡାକ୍ତରଙ୍କୁ ଭଲ ଏବଂ ବୁଝି ହେଉଥିବା ଅକ୍ଷରରେ ଲେଖିବା ପାଇଁ ଏବେ ତାଲିମ ଦିଆଯିବ ।

ମଧ୍ୟପ୍ରଦେଶ ଆର‌୍ୟୁବିଜ୍ଞାନ ବିଶ୍ୱବିଦ୍ୟାଳୟର କୁଳପତି ଡା.ରବିଶଙ୍କର ଶର୍ମା ଗଣମାଧ୍ୟମକୁ  କହିଛନ୍ତି ଯେ,ଖାସ୍ କରି ରୋଗୀଙ୍କ ଚିଠାରେ କିଛି ଡାକ୍ତରଙ୍କ ହ୍ୟାଣ୍ଟରାଇଟିଙ୍ଗ୍ ତରବରରେ ଲେଖାଯିବା କାରଣରୁ ଖରାପ ଦେଖାଯାଏ । କିଛି ଡାକ୍ତର ତ ଏ ମାମଲାରେ ଏତେ ହଡବଡି ଦେଖାନ୍ତି ଯେ ୩୦ ସେକେଣ୍ଡ ମଧ୍ୟରେ ହିଁ ଚିଠା ଲେଖିଦିଅନ୍ତି । ତେବେ ଡା. ଶର୍ମା କହିଛନ୍ତି ଯେ,ମେଡିକାଲ୍ ବିଧ୍ୟାର୍ଥୀ କିମ୍ବା ଡାକ୍ତରଙ୍କୁ ଚିଠା ଲେଖିବା ପାଇଁ ୩ ମିନିଟର ସମୟ ନେବା ଉଚିତ୍ । ସେ ଏହା ଉପରେ ରୋଗୀର ଲକ୍ଷଣ ଏବଂ ଔଷଧର ନାଁ ଆଦି ସ୍ପଷ୍ଟ ରୁପରେ ଲେଖିପାରିବେ । ଯେଭଳି ମେଡିସିନ୍ ଦୋକାନୀବାଲା ଡାକ୍ତରଙ୍କ ଅକ୍ଷରକୁ ବୁଝିପାରୁଛି ଠିକ୍ ସେହିପରି ରୋଗୀ ମଧ୍ୟ ଏହି ଅକ୍ଷରକୁ ବୁଝିବାରେ ସକ୍ଷମ ହୋଇପାରିବ ।

ଔଷଧ କିଣିବା ସମୟରେ ରୋଗୀମାନଙ୍କୁ ସଠିକ୍ ଔଷଧର ପରଖ ହୋଇପାରେ ନାହିଁ । ତେବେ ମେଡିକାଲ୍ ଆଇନ୍ ଅନୁସାରେ ଏଭଳି ଖରାପ ଲେଖା କାରଣରୁ ପୋଲିସ୍ ଜାଞ୍ଚ୍ ରେ ମଧ୍ୟ ଅସୁବିଧା ଉପୁଜେ । ବହୁ ସମୟରେ ଡାକ୍ତରଙ୍କ ଅବୁଝା ଲେଖାକୁ ବୁଝିବାପାଇଁ ଜାଞ୍ଚ୍ କର୍ତ୍ତାଙ୍କ ଝାଳ ବୋହିଯାଏ ।