ବ୍ଲକ ଅଫିସରୁ ମିଳିଲା ନାହିଁ ଇନ୍ଦିରା ଆବାସ ବାବଦକୁ ବଳକା ଟଙ୍କା। ସାହୁକାର କରଜ ସୁଝି ପାରିଲେନି ଭଂଜନଗରର ହିତାଧିକାରୀ । ଟଙ୍କା ବଦଳରେ ପକ୍କା ଘରକୁ ବନ୍ଧକ ରଖିଲା ସାହୁକାର ।
କନକ ବ୍ୟୁରୋ: ଇନ୍ଦିରା ଆବାସ ଯୋଜନାରେ ପକ୍କା ଘର ତିଆରି ହୋଇଛି , କିନ୍ତୁ ଘରେ ତାଲା ପଡିଛି । ଆଉ ହିତାଧିକାରୀ ପୂର୍ବ ଭଳି ଏବେ ବି ସେହି କୁଡିଆ ଭିତରେ ରହୁଛନ୍ତି । ଏହାର କାରଣ ହେଉଛି ତାଙ୍କ ଇନ୍ଦିରା ଆବାସ ସାହୁକାର ପାଖରେ ବନ୍ଧା ପଡିଛି ।
Kanak News is now on WhatsApp
Join and get latest news updates delivered to you via WhatsApp
ଅସଲ କଥା ହେଉଛି, ଇନ୍ଦିରା ଆବାସ ଘର ସଂପୂର୍ଣ୍ଣ କରିବା ପାଇଁ ସାହୁକାରଠାରୁ କରଜ ଆଣିଥିଲେ ଭଂଜନଗର ବ୍ଳକ୍ ରଙ୍ଗାମେରୁ ଗାଁର ବିନ ନାଇକ । ହେଲେ ଘର କାମ ସାରିବା ପରେ ବ୍ଲକ ପ୍ରଶାସନ ପକ୍ଷରୁ ବଳକା ଟଙ୍କା ତାଙ୍କୁ ମିଳିନାହିଁ । ଯାହା ଫଳରେ ସେ ବିନ ସାହୁକାର ଠାରୁ ଆଣିଥିବା ଟଙ୍କା ଫେରସ୍ତ କରି ପାରିଲେ ନାହିଁ, ତେଣୁ ସାହୁକାର ତାଙ୍କ ପକ୍କା ଘରକୁ ବନ୍ଧକ ରଖିଥିବା ଅଭିଯୋଗ ହୋଇଛି ।
ବିନ ନାୟକଙ୍କୁ ୨୦୧୪ ମସିହରେ ଇନ୍ଦିରା ଆବାସ ଯୋଜନା କାର୍ଯ୍ୟାଦେଶ ମିଳିଥିଲା । ପ୍ରଥମ କିସ୍ତିରେ ତାଙ୍କୁ ୩୦ ହଜାର ଟଙ୍କା ମିଳିଥିଲା । ଏବଂ ଘର ସାରିଲେ ବାକି ଟଙ୍କା ମିଳିବ ବୋଲି ବ୍ଲକ ପ୍ରଶାସନ ପକ୍ଷରୁ କୁହାଯାଇଥିଲା । ହେଲେ ଘର କାମ ସରିବାର ୩ରୁ ୪ ବର୍ଷ ଯାଏଁ ବଳକା ଟଙ୍କା ନମିଳିବାରୁ ବନ୍ଧା ପଡ଼ିଛି ବିନଙ୍କ ଘର । ଆଉ ବାସହରା ହୋଇ ଗାଁ ମୁଣ୍ଡରେ କୁଡ଼ିଆ କରି ଦୁଃଖରେ ଜୀବନ କାଟୁଛନ୍ତି ବନିଙ୍କ ପରିବାର ।
ଗରିବର ଆର୍ଥିକ ଅବସ୍ଥାକୁ ସୁଧାରିବା ପାଇଁ ସରକାର ଯୋଜନା କରି କୋଟି କୋଟି ଟଙ୍କା ଖର୍ଚ କରୁଛନ୍ତି । ହେଲେ ଅନେକ ସ୍ଥାନରେ ସରକାରୀ ଅର୍ଥ ଲୋକଙ୍କ କାମରେ ଆସୁନଥିବା ଦେଖିବାକୁ ମିଳୁଛି ।