ଭୟ ବଢାଇଲା କରୋନାର ନୂଆ ପ୍ରଜାତି ଓମିକ୍ରନ : ଗୋଟିଏ ଦିନରେ ୧୭ ଜଣ ସଂକ୍ରମିତ ଚିହ୍ନଟ
ରାଜସ୍ଥାନରେ ୯, ମହାରାଷ୍ଟ୍ରରେ ନୂଆ ୭ ମାମଲା ଠାବ; ଦେଶରେ ୨୧ରେ ପହଂଚିଲା ଓମିକ୍ରନ ଆକ୍ରାନ୍ତଙ୍କ ସଂଖ୍ୟା
କନକ ବ୍ୟୁରୋ : ଦେଶରେ ଓମିକ୍ରନ ଆତଙ୍କ ବଢିବାରେ ଲାଗିଛି । ରାଜସ୍ଥାନରେ ୯ ଜଣ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । ଜୟପୁରର ଗୋଟିଏ ପରିବାର ସମସ୍ତେ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଥିବା ଜଣାପଡିଛି । ଏମାନେ ସମସ୍ତେ ଦକ୍ଷିଣ ଆଫ୍ରିକା ଗସ୍ତରେ ଯାଇଥିଲେ । ଏହା ସହ ମହାରାଷ୍ଟ୍ରରେ ଆହୁରି ୭ ଜଣ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହାକୁ ମିଶାଇ କେବଳ ମହାରାଷ୍ଟ୍ରରେ ୮ ଏବଂ ଦେଶରେ ଓମିକ୍ରନ ସଂକ୍ରମିତଙ୍କ ସଂଖ୍ୟା ୨୧କୁ ଛୁଇଁଛି ।
Kanak News is now on WhatsApp
Join and get latest news updates delivered to you via WhatsApp
ମହାରାଷ୍ଟ୍ର ପୁଣେରେ ନାଇଜେରିଆରୁ ପିମ୍ପର ଚିଂଚୱାଡାକୁ ଫେରିଥିବା ଜଣେ ୪୪ ବର୍ଷୀୟ ମହିଳା କରୋନାର ନୂଆ ପ୍ରଜାତିରେ ଆକ୍ରାନ୍ତ ହୋଇଛନ୍ତି । ଆକ୍ରାନ୍ତ ମହିଳାଙ୍କ ଦୁଇ ଝିଅ, ତାଙ୍କ ଭାଇ ଓ ଭାଇଙ୍କ ଦୁଇ ଝିଅ ମଧ୍ୟ ଓମିକ୍ରନରେ ସଂକ୍ରମିତ ହୋଇଛନ୍ତି । ଗତମାସରେ ଫିନଲାଣ୍ଡରୁ ପୁଣେ ଫେରିଥିବା ୪୭ବର୍ଷ ବୟସ୍କ ଜଣେ ବ୍ୟକ୍ତି ମଧ୍ୟ ଓମିକ୍ରନ ଭୂତାଣୁରେ ଆକ୍ରାନ୍ତ ହୋଇଛନ୍ତି । ଶନିବାର ପୁଣିରେ ଡୋମ୍ବିଭିଲ ସହରକୁ ଦକ୍ଷିଣ ଆଫ୍ରିକାରୁ ଫେରିଥିବା ଜଣେ ୩୩ବର୍ଷୀୟ ଯୁବକ ଓମିକ୍ରନରେ ସଂକ୍ରମିତ ହୋଇଥିବା ଜଣାପଡିଥିଲା । ଏହାକୁ ମିଶାଇ କେବଳ ମହାରାଷ୍ଟ୍ରରେ ୮ଆକ୍ରାନ୍ତ ଚିହ୍ନଟ ହୋଇଛନ୍ତି ।
ସେପଟେ ଦିଲ୍ଲୀରେ ଜଣେ ତାଞ୍ଜାନିଆ ଫେରନ୍ତା ଯାତ୍ରୀଙ୍କ ଠାରେ ଓମିକ୍ରନ ଭୁତାଣୁକୁ ଠାବ କରାଯାଇଛି । ସେ ଦେଶର ପଂଚମ ଓମିକ୍ରନ ଆକ୍ରାନ୍ତ ଭାବେ ଚିହ୍ନଟ ହୋଇଥିଲେ । ତାଙ୍କୁ ଦିଲ୍ଲୀର ଲୋକନାୟକ ଜୟପ୍ରକାଶ ହସ୍ପିଟାଲରେ ଭର୍ତି କରାଯାଇ ଚିକିତ୍ସା କରାଯାଉଛି । ପୂର୍ବରୁ କର୍ଣ୍ଣାଟକ ୨ଜଣ ଗୁଜୁରାଟରୁ ଜଣେ ମହାରାଷ୍ଟ୍ରରୁ ଜଣେ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଥିଲେ । କିନ୍ତୁ ପୁଣେରୁ ଆହୁରି ୭ଜଣ ଓମିକ୍ରନ ଆକ୍ରାନ୍ତ ଚିହ୍ନଟ ପରେ ମହାରାଷ୍ଟ୍ରରେ ଆକ୍ରାନ୍ତଙ୍କ ସଂଖ୍ୟା ୮କୁ ଓ ଦେଶରେ ଏହି ସଂଖ୍ୟା ୨୧କୁ ବୃଦ୍ଧି ପାଇଛି ।