ଭାରତର ମିଶନ ‘ମତ୍ସ୍ୟା’, ଅନ୍ତରୀକ୍ଷ ପରେ ବର୍ତ୍ତମାନ ସମୁଦ୍ରରରେ ଇତିହାସ ରଚିବ ଭାରତ
କନକ ବ୍ୟୁରୋ: ଆପଣ ଜାଣିଛନ୍ତି କି ଭାରତର ମିଶନ ମତ୍ସ୍ୟା ବାବଦରେ? ଅନ୍ତରୀକ୍ଷ ପରେ ବର୍ତ୍ତମାନ ସମୁଦ୍ରରରେ କେଉଁ ମିଶନ ପାଇଁ ପ୍ରସ୍ତୁତ ହେଉଛି ଭାରତ । କଣ ଏହି ପ୍ରକଳ୍ପର ବିଶେଷତା । ଆସନ୍ତୁ ଜାଣିବା ଏହା ବାବଦରେ ବିସ୍ତୃତ ଭାବେ ।
Kanak News is now on WhatsApp
Join and get latest news updates delivered to you via WhatsApp
ଆମେରିକା, ଚୀନ ଭଳି ବିକଶିତ ଦେଶ ପରେ ଭାରତ ସମୁଦ୍ର ଭିତରର ଦୁନିଆକୁ ସନ୍ଧାନ କରିବାକୁ ପ୍ରସ୍ତୁତ ହେଉଛି । ଏଥିପାଇଁ ଯୋଜନା ବି ପ୍ରସ୍ତୁତ ହୋଇଛି । ଅନ୍ତରୀକ୍ଷରେ ଇତିହାସ ରଚିବା ପରେ ବର୍ତ୍ତମାନ ସମୁଦ୍ରରେ ଇତିହାସ ଲେଖିବାକୁ ପ୍ରୟାସ ଆରମ୍ଭ କରିଛି । ସମୁଦ୍ର ବକ୍ଷରେ ଏହି ମିଶନର ଶୁଭାରମ୍ଭ ହେବାକୁ ଯାଉଛି । ନିକଟରେ ରାଜ୍ୟସଭାରେ ସୂଚନା ଦେଇ କେନ୍ଦ୍ରମନ୍ତ୍ରୀ କିରଣ ରିଜିଜୁ କହିଛନ୍ତି, ଭାରତ ବହୁତ ଶୀଘ୍ର ନିଜର ପ୍ରଥମ ମହାସାଗର ମିଶନ ସମୁଦ୍ରଯାନରେ ଏକ ବୁଡାଜାହାଜ ସାହାଯ୍ୟରେ ଗଭୀର ସମୁଦ୍ରକୁ ମଣିଷକୁ ପଠାଇବାକୁ ଯୋଜନା କରିଛି । ଏହି ଜାହାଜ ୩ ଜଣଙ୍କୁ ଗଭୀର ସମୁଦ୍ର ମଧ୍ୟକୁ ନେଇଯିବ । ପାଖାପାଖି ୬ ହଜାର ମିଟର ଗଭୀରତାକୁ ଏହା ନେଇଯାଇପାରିବ । ବୁଡାଜାହାଜର ନାଁ ମତ୍ସ୍ୟ ୬ ହଜାର ରଖାଯାଇଛି । ଏହାର ପ୍ରଥମ ପର୍ଯ୍ୟାୟ ପରୀକ୍ଷଣ ୨୦୨୪ ମାର୍ଚ୍ଚ ମାସ ମଧ୍ୟରେ ଶେଷ ହେବ । ଅର୍ଥାତ ବର୍ଷ ୨୦୨୬ ଯାଏ ମତ୍ସ୍ୟ ୬ ହଜାର ୩ ଜଣଙ୍କୁ ଗଭୀର ସମୁଦ୍ରକୁ ନେଇଯାଇପାରିବ ।
ତେବେ ଆସନ୍ତୁ ପ୍ରଥମେ ଏହି ସମୁଦ୍ରଯାନ ମିଶନ କଣ ତାକୁ ବୁଝିନେବା । ଏହି ମିଶନର ଶୁଭାରମ୍ଭ କେନ୍ଦ୍ର ସରକାରଙ୍କ ବ୍ଲୁ ଇକୋନମି ଅନୁସାରେ କରାଯାଇଛି । ଏହା ଭାରତ ସରକାରଙ୍କ ପ୍ରଥମ ସମୁଦ୍ର ମିଶନ ଯେଉଁଥିରେ ମଣିଷ ଗଭୀର ସମୁଦ୍ରକୁ ଯିବା ପାଇଁ ଯୋଜନା କରାଯାଇଛି । ମିଶନର ଲକ୍ଷ୍ୟ ଗଭୀର ସମୁଦ୍ର ମଧ୍ୟରେ ଥିବା ଜିନିଷ ବାବଦରେ ଅନୁଧ୍ୟାନ କରିବା । ତା ସହ ଜୈବ ବିବିଧତା ଉପରେ ମଧ୍ୟ ଅନୁଧ୍ୟାନ କରିବା । ବର୍ତ୍ତମାନ ଏହି ମିଶନ ଉପରେ ଚେନ୍ନାଇର ରାଷ୍ଟ୍ରୀୟ ମହାସାଗର ପ୍ରଦ୍ୟୋଗିକ ସଂସ୍ଥା ଏନଆଇଓଟି କାମ କରୁଛି ।
ସମୁଦ୍ରାୟନ ମିଶନରେ ୩ ଜଣଙ୍କୁ ସମୁଦ୍ରର ୬ ହଜାର ମିଟର ଗଭୀରତାକୁ ପଠାଯିବ । ଏହି ୩ ଜଣଙ୍କୁ ସେଠାକୁ ପହଞ୍ଚାଇବା ପାଇଁ ଯେଉଁ ଯାନର ବ୍ୟବସ୍ଥା କରାଯାଇଛି ତାକୁ ମତ୍ସ୍ୟ ୬ ହଜାର ଭାବେ ନାମିତ କରାଯାଇଛି । କିଛି ସମୟ ପୂର୍ବରୁ ମୁଁ ଆପଣଙ୍କୁ ବ୍ଲୁ ଇକୋନୋମି ବାବଦରେ କହିଥିଲି । ଆସନ୍ତୁ ଏ ବାବଦରେ ମଧ୍ୟ ଟିକେ ଜାଣିନେବା । ବିଶ୍ୱବ୍ୟାଙ୍କ ଅନୁସାରେ ଅର୍ଥନୈତିକ ଅଭିବୃଦ୍ଧି, ଉନ୍ନତ ଜୀବିକା ଏବଂ ଚାକିରୀ ପାଇଁ ସମୁଦ୍ର ସମ୍ପଦର ନିରନ୍ତର ବ୍ୟବହାର ।
ସାଧାରଣ ଭାଷାରେ କହିବାକୁ ଗଲେ ସମୁଦ୍ର ଦୁନିଆର ଉପଯୋଗ କରି ଅର୍ଥନୀତିକୁ ସୃଷ୍ଟି କରିବା । ଏଥିରେ ୯ଟି ବିଭାଗ ସାମିଲ ରହିଛି । ଆମେ ସମସ୍ତେ ଜାଣିଛେ ଯେ ଗଭୀର ସମୁଦ୍ରରେ ଲୁଚିରହିଥିବା ବ୍ଲୁ ହୁଏଲ ବାବଦରେ ଜାଣିବା କେତେ ଜରୁରୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲଗାତର ୨ ଥର ୨୦୨୧ ଏବଂ ୨୦୨୨ରେ ସ୍ୱାଧୀନତା ଦିବସର ଅଭିଭାଷଣରେ ଡିପ ଓସେନ ମିଶନ ଅର୍ଥାତ ସମୁଦ୍ର ଅଭିଯାନ ବାବଦରେ କହିଥିଲେ ।
ଏବେ ଟିକେ କହିଦେବାକୁ ଚାହିଁବି ଯେ ଏହି ବ୍ଲୁ ଇକୋନମି କାହିଁକି କୌଣସି ବି ଦେଶ ପାଇଁ ଗୁରୁତ୍ୱପୂର୍ଣ୍ଣ । ଭାରତ ହେଉକି ଆମେରିକା । କୌଣସି ବି ଦେଶ ପାଇଁ ବ୍ଲୁ ଇକୋନମି ଅନେକ ଗୁରୁତ୍ୱପୂର୍ଣ୍ଣ । ଭାରତ ପାଇଁ ଏହା ଏଥିପାଇଁ ଗୁରୁତ୍ୱପୂର୍ଣ୍ଣ ଯେ ଭାରତ ପାଖରେ ଏକ ବଡ ସମୁଦ୍ର କ୍ଷେତ୍ର ରହିଛି । ଭାରତ ପାଖରେ ୧୩୮୨ ଦ୍ୱୀପ ସହ ୭ ହଜାର ୫୧୭ କିମି ଲମ୍ବା ତଟରେଖା ରହିଛି । ୯ଟି ତଟୀୟ ରାଜ୍ୟରେ ଏହା ବ୍ୟାପିରହିଛି । ୧୨ଟି ପ୍ରମୁଖ ଏବଂ ୨ ଶହ ଛୋଟ ଛୋଟ ବନ୍ଦର ରହିଛି । ଦେଶର ୯୫ ପ୍ରତିଶତ ବ୍ୟାପାରରେ ଏହା ସମ୍ପୃକ୍ତ ରହିଛି । ଦେଶର ଜିଡିପିରେ ବ୍ଲୁ ଇକୋନିମିର ୪ ପ୍ରତିଶତର ଯୋଗଦାନ ରହିଛି । ଏହିଭଳି ଭାବେ ଭାରତ ପାଖରେ ସବୁଠାରୁ ବିସ୍ତୃତ ତଟୀୟରେଖା ରହିଛି । ତେଣୁ ମହାସାଗରୀୟ ଅଧାରିତ ପର୍ଯ୍ୟଟନର ବିକାଶ ବଢିଯିବାର ଆଶା ରହିଛି । ବ୍ଲୁ ଇକୋନୋମି କେତେ ଗୁରୁତ୍ୱପୂର୍ଣ୍ଣ ତାହା ଏଥିରୁ ସ୍ପଷ୍ଟ ହୋଇଥାଏ ଯେ ବିଶ୍ୱର ୮୦ ପ୍ରତିଶତ ଆର୍ଥିକ କାରବାର ସମୁଦ୍ରଦ୍ୱାରା ହୋଇଥାଏା
ସେହିଭଳି ବିଶ୍ୱ କଥା ଯଦି କହିବା ୪୦ ପ୍ରତିଶତର ଜନସଂଖ୍ୟା ତଟୀୟ ଅଞ୍ଚଳରେ ରହିଛି । ସେହିଭଳି ୩ ଅରବ ଲୋକ ନିଜର ଜୀବିକା ପାଇଁ ସମୁଦ୍ର ଉପରେ ନିର୍ଭର କରିଥାନ୍ତି । ଏବେ ଆସନ୍ତୁ ଜାଣିନେବା ଏହି ମିଶନର କେମିତି ଶୁଭାରମ୍ଭ ହୋଇଥିଲା । ସମୁଦ୍ରଯାନ ମିଶନ ୨୦୨୧ ଅକ୍ଟୋବର ୨୯ରେ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ ଏହାକୁ ଲଞ୍ଚ କରିଥିଲେ । ଏହାର ଶୁଭାରମ୍ଭ ସହ ଭାରତ ଅନେକ ଦେଶର ତାଲିକାରେ ସାମିଲ ହୋଇଥିଲା ଯେଉଁମାନଙ୍କ ପାଖରରେ ସମୁଦ୍ରଗତିବିଧିର ଯାଞ୍ଚ ପାଇଁ ବିଶେଷ ଜ୍ଞାନକୌଶଳ ରହିଛି । ମିଶନକୁ ପୂରା କରିବା ପାଇଁ ୬ ହଜାର କୋଟିର ବଜେଟ ରଖାଯାଇଛି । ତେବେ ଦେଖିବାକୁ ବାକି ରହିଲା ଭାରତର ଏହି ସମୁଦ୍ରଯାନ ମିଶନ କେତେ ସଫଳ ହେଉଛି ।