ଦେଶରେ ବଢି ଚାଲିଛି କରୋନା ସଂକ୍ରମଣ: ଆଜି ୩୦ ଲକ୍ଷ ସୀମା ପାର କରିବ ଆକ୍ରାନ୍ତଙ୍କ ସଂଖ୍ୟା; ମାତ୍ର ୧୬ ଦିନରେ ନୂଆ ଦଶ ଲକ୍ଷ ଚିହ୍ନଟ
ସେପଟେ ବିଶ୍ୱରେ ୨ ବର୍ଷ କାୟା ବିସ୍ତାର କରିବ କରୋନା, କହିଲେ ବିଶ୍ୱ ସ୍ୱାସ୍ଥ୍ୟ ସଂଗଠନ ମୁଖ୍ୟ
କନକ ବ୍ୟୁରୋ: ଗତକାଲି ଗୋଟିଏ ଦିନରେ ୬୮ ହଜାର ନୂଆ କରୋନା ଆକ୍ରାନ୍ତ ଚିହ୍ନଟ ହେବା ପରେ ଆଜି ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ୩୦ ଲକ୍ଷ ଛୁଇଁବା ଆଶଙ୍କା ବଢିଛି । ହିସାବ ଅନୁସାରେ ଆଉ ମାତ୍ର ୩୦ ହଜାର ନୂଆ ଆକ୍ରାନ୍ତ ଚିହ୍ନଟ ହେଲେ ଭାରତ ୩୦ଲକ୍ଷ ଆକ୍ରାନ୍ତ ସଂଖ୍ୟା ଟପିବ । ବିଶ୍ୱରେ କରୋନା ସଂକ୍ରମଣ ସଂଖ୍ୟାରେ ତୃତୀୟ ରହିଥିବା ଭାରତ ଆଉ ଏକ ଅନାବଶ୍ୟକ ମାଇଲଖୁଂଟ ପ୍ରତିଷ୍ଠା କରିବାକୁ ଯାଉଛି । ଯଦି ଆଜି କରୋନା ମିଟର ୩୦ଲକ୍ଷ ଛୁଉଁଛି, ତେବେ ଦେଶରେ ୨୦ ଲକ୍ଷରୁ ୩୦ ଲକ୍ଷ ଆସିବାକୁ ମାତ୍ର ୧୬ ଦିନ ସମୟ ହେବ । ଅନ୍ୟ ଦୁଇ ଶୀର୍ଷ ଦେଶ ଆମେରିକା ଓ ବ୍ରାଜିଲ ତୁଳନାରେ ଏହି ଦିନ ସବୁଠୁ କମ୍ । ଅର୍ଥାତ୍ ସଂକ୍ରମଣ ଅଧିକ ବଢିଛି ଭାରତରେ ।
Kanak News is now on WhatsApp
Join and get latest news updates delivered to you via WhatsApp
ହିସାବ ଅନୁସାରେ ୨୦ ଲକ୍ଷରୁ ୩୦ ଲକ୍ଷ ଆକ୍ରାନ୍ତ ସଂଖ୍ୟା ଛୁଇଁବାକୁ ବ୍ରାଜିଲକୁ ୨୩ ଦିନ ଲାଗିଥିବା ବେଳେ ଆମେରିକା ଲାଗିଥିଲା ୨୮ ଦିନ । କିନ୍ତୁ ଭାରତ କ୍ଷେତ୍ରରେ ଏହା ମାତ୍ର ୧୬ ଦିନ ରହିଛି । ଅନ୍ୟପଟେ ପ୍ରଥମ ୧୦ ଲକ୍ଷ ସଂକ୍ରମଣ ହେବାକୁ ଭାରତରେ ସବୁଠାରୁ ଅଧିକ ୧୩୮ ଦିନ ଲାଗିଥିଲା । ଏହି ସଂଖ୍ୟକ ଆକ୍ରାନ୍ତ ପାଇଁ ଆମେରିକାକୁ ୯୮ ଦିନ ଲାଗୁଥିବା ବେଳେ ବ୍ରାଜିଲକୁ ଲାଗିଥିଲା ୧୧୪ ଦିନ । କିନ୍ତୁ ଧିରେ ଧିରେ ଭାରତରେ ସଂକ୍ରମଣ ଅଧିକ ତୀବ୍ର ହେବାରେ ଲାଗିଲା । ତଥାପି ଅନ୍ୟ ଦୁଇ ଦେଶ ତୁଳନାରେ ଭାରତରେ କରୋନା ଜନିତ ମୃତ୍ୟୁ ସଂଖ୍ୟା ବେଶ୍ କମ୍ । ବ୍ରାଜିଲ ଓ ଆମେରିକାରେ ୩୦ ଲକ୍ଷ ସଂକ୍ରମଣରେ ମୃତ୍ୟୁ ସଂଖ୍ୟା ୧ ଲକ୍ଷରୁ ଅଧିକ ରହିଛି ।
ପରିସଂଖ୍ୟାନ ଅନୁସାରେ ଭାରତରେ ସକ୍ରୀୟ ଆକ୍ରାନ୍ତଙ୍କ ସଂଖ୍ୟା ୭ ଲକ୍ଷ ଛୁଇଁଛି । ଶେଷ ଏକ ଲକ୍ଷ ଆକ୍ରାନ୍ତ ପାଇଁ ୧୫ ଦିନ ସମୟ ଲାଗୁଥିଲା । କିନ୍ତୁ ୫ ଲକ୍ଷରୁ ୬ ଲକ୍ଷ ସକ୍ରିୟ ଆକ୍ରାନ୍ତ ଚିହ୍ନଟ ହେବା ପାଇଁ ମାତ୍ର ୯ ଦିନ ସମୟ ଲାଗିଥିଲା । ତେବେ ସକ୍ରୀୟ ଆକ୍ରାନ୍ତ ବୃଦ୍ଧି ହାର କମିବା ପଛରେ ଅଧିକ୍ ସୁସ୍ଥ ହାର ଦାୟୀ । ଅନ୍ୟପଟେ ଏବେ ବି ଭାରତ ତାର ସବୁଠାରୁ ଅଧିକ ସଂକ୍ରମଣ ସ୍ଥିତିକୁ ପହଂଚି ନାହିଁ ବୋଲି ବିଶେଷଜ୍ଞ ମତ ଦେଇଛନ୍ତି ।