୧୯୨୮ ମସିହାରୁ ୨୦୨୧ । ଅଲିମ୍ପିକ୍ସରେ ଏମିତି ଥିଲା ଭାରତୀୟ ହକିର ସ୍ୱର୍ଣ୍ଣିମ ଇତିହାସ । ଜିତିଛି ୮ ସ୍ୱର୍ଣ୍ଣ, ୧ ରୌପ୍ୟ, ୩ ବ୍ରୋଞ୍ଜ ପଦକ ।
କନକ ବ୍ୟୁରୋ: ଅଲିମ୍ପିକ୍ସ କଥା ଉଠିଲେ ସାଙ୍ଗେ ସାଙ୍ଗେ ଆଖି ଆଗକୁ ଚାଲିଆସେ ଭାରତୀୟ ହକିର ସ୍ୱର୍ଣ୍ଣିମ ଇତିହାସ । କାହିଁକି ନା, ଏବେ ସୁଦ୍ଧା ଭାରତୀୟ ହକି ଟିମ୍ ଅଲିମ୍ପିକ୍ସରେ ମୋଟ ୮ଟି ସ୍ୱର୍ଣ୍ଣପଦକ ହାତେଇଥିବାବେଳେ, ସର୍ବମୋଟ ୧୨ଟି ମେଡାଲ ଜିତିସାରିଛି । ୧୯୨୮ ମସିହାର ଅଲିମ୍ପିକ୍ସ ହେଉ ଅବା ୨୦୨୧ର ଟୋକିଓ ଅଲିମ୍ପିକ୍ସ ସବୁଠି ଭାରତୀୟ ହକି ଦଳ ନିଜର ଜଲୱା ଦେଖାଇଥିବାବେଳେ ଦର୍ଶକଙ୍କ ମନ ଜିତିଛି ।
Kanak News is now on WhatsApp
Join and get latest news updates delivered to you via WhatsApp
କରୋନା କାଳରେ ସାରା ବିଶ୍ୱ ମହାମାରୀକୁ ନେଇ ଭୟରେ ଥିବାବେଳେ ଭାରତୀୟ ପୁରୁଷ ହକି ଦଳ ଟୋକିଓରେ ୪୧ ବର୍ଷର ରେକର୍ଡ ଭାଙ୍ଗିଛି । ଆଉ ଜର୍ମାନୀକୁ ପରାଜିତ କରି ବ୍ରୋଞ୍ଜ ପଦକ ହାତେଇଛି ଭାରତୀୟ ପୁରୁଷ ହକି ଦଳ । ତେବେ ଏହି ଅବସରରେ ଆସନ୍ତୁ ଜାଣିବା ଅଲିମ୍ପିକ୍ସରେ ଭାରତୀୟ ହକିର ‘ସ୍ୱର୍ଣ୍ଣିମ ଇତିହାସ’ ବିଷୟରେ…୧୯୨୮ ମସିହା, ଏମ୍ସଟର୍ଡମ ଅଲିମ୍ପିକ୍ସ
୧୯୨୮ ମସିିହାରେ ବ୍ରିଟିଶ ଶାସନାଧୀନ ଭାରତର ହକି ଦଳ ପ୍ରଥମ ଥର ପାଇଁ ଅଲିମ୍ପିକ୍ସ ଖେଳରେ ଭାଗ ନେଇଥିଲା । ଆଉ ଏହିଠାରୁ ଲେଖାଯାଇଥିଲା ଭାରତୀୟ ହକି ଦଳର ସୁବର୍ଣ୍ଣ ଯୁଗ । ସବୁ ଦଳକୁ ମାତ୍ ଦେଇ ଭାରତୀୟ ହକି ଟିମ୍ ପ୍ରଥମ ଥର ପାଇଁ ଅଲିମ୍ପିକ୍ସରେ ସୁନା ପଦକ ଜିତିଥିଲା । ଆଉ ଆପଣ ଜାଣି ଆଶ୍ଚଯ୍ୟ ହେବେ ଯେଉଁ ଦଳ ଅଲିମ୍ପିକ୍ସକୁ ଯିବାବେଳେ ମାତ୍ର ୩ ଜଣ ଲୋକ ବମ୍ବେ ପୋର୍ଟରେ ଥିଲେ, ସେହି ଦଳ ସ୍ୱର୍ଣ୍ଣ ପଦକ ଜିତି ଭାରତ ଫେରିବା ପରେ ହଜାର ହଜାର ଲୋକଙ୍କ ବାଃ ବାଃ ପାଇଥିଲା ।
୧୯୨୮, ମେ ୨୬ ତାରିଖରେ ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ୍ ଖେଳାଯାଇଥିଲା ଆଉ ସାମ୍ନାରେ ଥିଲା ନେଦରଲ୍ୟାଣ୍ଡ । ଏହି ମ୍ୟାଚରେ ଭାରତର କ୍ୟାପଟେନ୍ ଜୟପାଲ ସିଂହ ମଧ୍ୟ ଦଳରେ ନଥିଲେ । ଫିରୋଜ ଖାନ ଆଉ ସୌକତ ଅଲ୍ଲୀଙ୍କ ଭଳି ଖେଳାଳି ଆହତ ଓ ଜ୍ୱରରେ ପଡି ବେଞ୍ଚରେ ବସିଥିଲେ । ଏପରି ସ୍ଥିତିରେ ଭାରତୀୟ ହକିର ଷ୍ଟାର ଧ୍ୟାନଚାନ୍ଦ ସାଜିଥିଲେ ଦଳର ତ୍ରାଣକର୍ତା । ନେଦରଲ୍ୟାଣ୍ଡକୁ ୩-୦ରେ ହରାଇ ଦଳ ବିଦେଶ ମାଟିରେ ଜିତିଥିଲା ପ୍ରଥମ ସ୍ୱର୍ଣ୍ଣପଦକ ।
୧୯୩୨ – ଲସ୍ ଏଞ୍ଜେଲେସ୍ ଅଲିମ୍ପିକ୍ସ
୧୯୨୮ ମସିହାର ଅଲିମ୍ପିକ୍ସ ପରେ ୧୯୩୨ ମସିହାରେ ଆରମ୍ଭ ହୋଇଥିଲା ଲସ୍ ଏଞ୍ଜେଲେସ୍ ଅଲିମ୍ପିକ୍ସ । ତେବେ ୧୯୨୯ ମସିହାର ଆର୍ଥିକ ମାନ୍ଦାବସ୍ଥା କାରଣରୁ କେବଳ ୩ଟି ଦେଶର ହକି ଟିମ୍ ଏହି ଅଲିମ୍ପିକ୍ସରେ ଭାଗ ନେଇଥିଲେ । ଏହି ଟୁର୍ଣ୍ଣାମେଂଟରେ ମଧ୍ୟ ଭାରତୀୟ ହକି ଦଳ ନିଜର ଦବଦବା ଜାରି ରଖିଥିଲା । ପ୍ରଥମ ମ୍ୟାଚରେ ଦଳ ୧୧-୧ର ବଡ ବ୍ୟବଧାନରେ ଜାପାନକୁ ହରାଇବା ସହିତ ଦ୍ୱିତୀୟ ମ୍ୟାଚରେ ଆମେରିକାକୁ ୨୪-୧ ଗୋଲରେ ହରାଇଥିଲା । ଆଉ ଲଗାତାର ଦ୍ୱିତୀୟ ଥର ପାଇଁ ଅଲିମ୍ପିକ୍ସରେ ଜିତିଥିଲା ସ୍ୱର୍ଣ୍ଣପଦକ ।
୧୯୩୬ ମସିହା, ବର୍ଲିନ ଅଲିମ୍ପିକ୍ସ
୧୯୨୮ ମସିହା, ୧୯୩୨ ମସିହାର ସଫଳତା ପରେ ଲିଜେଣ୍ଡ ଧ୍ୟାନଚାନ୍ଦଙ୍କ କ୍ୟାପଟେନ୍ସିରେ ୧୯୩୬ ବର୍ଲିନ୍ ଅଲିମ୍ପିକ୍ସରେ ଭାଗ ନେଇଥିଲା ଭାରତୀୟ ହକି ଦଳ । ଆଉ ଲିଗ ଷ୍ଟେଜରେ ଦମଦାର ବିଜୟ ସହ ଫାଇନାଲରେ ପହଂଚିଥିଲା ଦଳ । ସେପଟେ ଦ୍ୱିତୀୟ ଦଳ ଭାବେ ବର୍ଲିନ୍ ଅଲିମ୍ପିକ୍ସ ଫାଇନାଲରେ ପହଂଚିଥିଲା ଜର୍ମାନୀ । ହେଲେ ଧ୍ୟାନଚାନ୍ଦଙ୍କ ହକି ଷ୍ଟିକର କମାଲ ଆଗରେ ଧରଶାୟୀ ହୋଇଥିଲେ ଜର୍ମାନ ଖେଳାଳି । ଭାରତ ୮-୧ର ବଡ ବ୍ୟବଧାନରେ ଜର୍ମାନୀକୁ ମାତ୍ ଦେଇ ପୁଣି ଜିତିଥିଲା ସ୍ୱର୍ଣ୍ଣପଦକ ।
କୁହାଯାଏ ଏହି ବିଜୟ ପରେ ହିଟଲରଙ୍କ ନଜରକୁ ଆସିଥିଲେ ଧ୍ୟାନଚାନ୍ଦ । ହିଟଲର, ଧ୍ୟାନଚାନ୍ଦଙ୍କୁ ତାଙ୍କ ସହ ଖାଇବାକୁ ନିମନ୍ତ୍ରଣ ଦେବା ସହିତ ଜର୍ମାନୀ ତରଫରୁ ହକି ଖେଳିବାକୁ ପ୍ରସ୍ତାବ ଦେଇଥିଲେ । ଏପରିକି ତାଙ୍କୁ ଜର୍ମାନ ସେନାର କର୍ନଲ ପଦ ମଧ୍ୟ ଅଫର ଦେଇଥିଲେ ହିଟଲର । ହେଲେ ସେ ସବୁକୁ ପାଦରେ ଏଡେଇ ଦେଇଥିଲେ ହକିର ଯାଦୁଗର । ନିଜର ଏହି ଶେଷ ଅଲିମ୍ପିକ୍ସରେ ସେ ମୋଟ ୧୩ଟି ଗୋଲ କରିବା ସହିତ ଅଲିମ୍ପିକ୍ସ ଇତିହାସରେ ୩୯ଟି ଗୋଲ କରିଥିଲେ ।
୧୯୪୮, ଲଣ୍ଡନ ଅଲିମ୍ପିକ୍ସ
୧୯୪୭ ମସିହାରେ ଭାରତ ସ୍ୱାଧୀନ ରାଷ୍ଟ୍ର ହେଲା । ଆଉ ୧୯୪୮ ମସିହାରେ ଆୟୋଜିତ ହେଲା ଲଣ୍ଡନ ଅଲିମ୍ପିକ୍ସ । ଏହି ଅଲିମ୍ପିକ୍ସରେ ଭାରତ ଓ ପାକିସ୍ତାନ ଅଲଗା ଅଲଗା ଦଳ ଭାବେ ଅଲିମ୍ପିକ୍ସରେ ଭାଗ ନେଲେ । ଖେଳାଳି ମଧ୍ୟ ଭାଗ ଭାଗ ହେଇଯାଇଥିବାରୁ ଏହି ଅଲିମ୍ପିକ୍ସରେ ଭାରତର ପ୍ରଦର୍ଶନ କିପରି ରହୁଛି ତା ଉପରେ ସମସ୍ତଙ୍କର ନଜର ଥିଲା । ହେଲେ ଆରମ୍ଭରୁ ହିଁ ଦଳ ଯେଭଳି ପ୍ରଦର୍ଶନ କଲା ତା ଦେଖି ସମସ୍ତେ ଆଶ୍ଚଯ୍ୟ ହେଇଯାଇଥିଲେ । ଭାରତ – ଅଷ୍ଟ୍ରିଆ, ଆର୍ଜେଂଟିନା ଆଉ ସ୍ପେନକୁ ହରାଇ ସେମିଫାଇନାଲ । ଆଉ ତାପରେ ନେଦରଲ୍ୟାଣ୍ଡକୁ ହରାଇ ଫାଇନାଲରେ ସ୍ଥାନ ପକ୍କା କରିଥିଲା । ଆଉ ଫାଇନାଲରେ ଭାରତୀୟ ହକି ଟିମ ଆଗରେ ଏଭଳି ଏକ ଦେଶ ଥିଲା । ଯିଏକି ଦୀର୍ଘ ବର୍ଷ ଧରି ଭାରତକୁ ଶାସନ କରିଆସିଥିଲା । ଲଣ୍ଡନ ଅଲିମ୍ପିକ୍ସ ଫାଇନାଲରେ ମୁହାଁମୁହିଁ ହୋଇଥିଲେ ଭାରତ ଆଉ ଗ୍ରେଟ୍ ବ୍ରିଟେନ୍ । ଆଉ ଟିମ୍ ଇଣ୍ଡିଆ ୪-୦ ଗୋଲରେ ବ୍ରିଟେନକୁ ହରାଇ ନିଜ ଦୀର୍ଘ ବର୍ଷର ପରାଧୀନର ବଦଲା ନେଇଥିଲା ।
୧୯୫୨ ଅଲିମ୍ପିକ୍ସ /୧୯୫୬ ମେଲବର୍ଣ୍ଣ ଅଲିମ୍ପିକ
୧୯୪୮ ଭଳି ୧୯୫୨ ଅଲିମ୍ପିକ୍ସରେ ମଧ୍ୟ ସ୍ୱର୍ଣ୍ଣପଦକ ଜିତିଥିଲା ଭାରତୀୟ ହକି ଟିମ୍ ।ଏହା ଥିଲା ଭାରତୀୟ ହକି ଟିମର ଲଗାତାର ପଂଚମ ଅଲିମ୍ପିକ୍ସ ସ୍ୱର୍ଣ୍ଣପଦକ । ଏହି ଟୁର୍ଣ୍ଣାମେଂଟରେ ଫାଇନାଲରେ ନେଦରଲ୍ୟାଣ୍ଡକୁ ଦଳ ୬-୧ ଗୋଲରେ ହରାଇଥିଲା । ଯେଉଁଥିରୁ ଏକାକି ୫ଟି ଗୋଲ ଦେଇଥିଲେ ବଲବୀର ସିଂହ । ଯାହାକି ଆଜି ବି ରେକର୍ଡ ହେଇ ରହିଛି । ଆଉ ଏହାପରେ ୧୯୫୬ ମେଲବର୍ଣ୍ଣ ଅଲିମ୍ପିକ୍ସରେ ମଧ୍ୟ ସେହି ସମାନ ଇତିହାସକୁ ଦୋହରାଇଥିଲା ଭାରତ । ହେଲେ ୫୬ ମସିହାର ଏହି ଅଲିମ୍ପିକ୍ସ ଫାଇନାଲରେ ମୁହାଁମୁହିଁ ହୋଇଥିଲେ ଭାରତ ଆଉ ପାକ୍ । ପ୍ରଥମ ଥର ପାଇଁ ଅଲିମ୍ପିକ୍ସରେ ମୁହାମୁହିଁ ହୋଇଥିଲେ ଭାରତ ଆଉ ପାକିସ୍ତାନ । ଯାହାକି ବେଶ ରୋମାଂଚକର ହୋଇଥିଲା । ଫାଇନାଲ ମ୍ୟାଚରେ ଭାରତ, ପାକିସ୍ତାନକୁ ୧-୦ ଗୋଲରେ ହରାଇ ଲଗାତାର ଛଅ ଥର ପାଇଁ ସ୍ୱର୍ଣ୍ଣପଦକ ନିଜ ନାଁରେ କରିଥିଲା ।
୧୯୬୦ ରୋମ୍ ଅଲିମ୍ପିକ୍ସ
୧୯୬୦ ମସିହାର ରୋମ ଅଲିମ୍ପିକ୍ସରେ ଭାରତୀୟ ହକି ଟିମ୍ ପ୍ରଥମ ଥର ପାଇଁ ନିରାଶ ହୋଇଥିଲା । ଆଉ ଫାଇନାଲରେ ପାକିସ୍ତାନଠାରୁ ପରାସ୍ତ ହୋଇ ରୌପ୍ୟପଦକରେ ନିଜକୁ ସନ୍ତୁଷ୍ଟ କରିଥିଲା । ଦଳ ଫାଇନାଲ ପର୍ଯ୍ୟନ୍ତ ଯିବା ପାଇଁ ସବୁଦଳକୁ ହରାଇଥିଲେ ମଧ୍ୟ ଫାଇନାଲରେ ପାକିସ୍ତାନଠୁ ହାରି ଯାଇଥିଲା । ଆଉ ଲଗାତାର ୭ମ ଥର ସ୍ୱର୍ଣ୍ଣ ବିଜୟର ସ୍ୱପ୍ନ ଭାରତୀୟ ଟିମର ଧ୍ୱଂସ ହୋଇଯାଇଥିଲା । ହେଲେ ଏହି ପରାଜୟର ବଦଲା ଟିମ୍ ଇଣ୍ଡିଆ ଆଗାମୀ ୧୯୬୪ ମସିହା ଟୋକିଓ ଅଲିମ୍ପିକ୍ସରେ ନେଇଥିଲା । ଟୁର୍ଣ୍ଣାମେଂଟର ଫାଇନାଲରେ ଦୁଇ ଫେଭରେଟ୍ ଟିମ୍ ଭାରତ-ପାକିସ୍ତାନ ପୁଣି ମୁହାଁମୁହିଁ ହୋଇଥିଲେ । ଆଉ ଟିମ୍ ଭାରତ ଏହି ମ୍ୟାଚରେ ୧-୦ ଗୋଲରେ ପାକିସ୍ତାନରେ ହରାଇ ପୁଣି ଥରେ ନିଜର ସ୍ୱର୍ଣ୍ଣ ବିଜୟ ହାସଲ କରିଥିଲ।।
୧୯୬୮ ମେକ୍ସିକୋ ଅଲିମ୍ପିକ୍ସ
୧୯୬୪ ମସିହା ପରେ ୧୯୬୮ ମେକ୍ସିକୋ ଅଲିମ୍ପିକ୍ସରେ ପ୍ରଥମ ଥର ପାଇଁ ଟିମ୍ ଇଣ୍ଡିଆ ଫାଇନାଲକୁ ଯାଇ ପାରିନଥିଲା । ସେମିଫାଇନାଲରେ ହିଁ ଦଳ ଅଷ୍ଟ୍ରେଲିଆଠାରୁ ୨-୧ ଗୋଲରେ ହାରିଯାଇଥିଲା । ହେଲେ ଦଳ ପଶ୍ଚିମ ଜର୍ମାନୀକୁ ହରାଇ ତୃତୀୟ ସ୍ଥାନରେ ରହିବା ସହିତ କାଂସ୍ୟ ପଦକ ହାସଲ କରିଥିଲା । ଖାଲି ସେତିକି ନୁହେଁ, ୧୯୬୮ ମସିହା ଭଳି ୧୯୭୨ ଅଲିମ୍ପିକ୍ସରେ ମଧ୍ୟ ଦଳ ଫାଇନାଲ ନଯାଇପାରି କାଂସ୍ୟ ପଦକ ଜିତିଥିଲା । ଏଥର ବି ଦଳ ସେମିଫାଇନାଲରେ ପାକିସ୍ତାନଠୁ ହାରି ଯାଇଥିଲା ଆଉ ନେଦରଲ୍ୟାଣ୍ଡଠାରୁ ଜିତି କାଂସ୍ୟ ପଦକ ହାତେଇଥିଲା । ଏହାଥିଲା ଅଲିମ୍ପିକ୍ସରେ ଭାରତର ୧୦ମ ପଦକ ।୧୯୮୦ ମସ୍କୋ ଅଲିମ୍ପିକ୍ସ
୨୦୨୦ ଟୋକିଓ ଅଲିମ୍ପିକ୍ସ ପୂର୍ବରୁ ମସ୍କୋ ଅଲିମ୍ପିକ୍ସ ଏକମାତ୍ର ଶେଷ ଅଲିମ୍ପିକ୍ସ ଥିଲା ଯେଉଁଥିରେ ଭାରତୀୟ ହକି ଟିମ୍ ମେଡାଲ ଜିତିଥିଲା । ଆଉ ତାପରେ ୨୦୨୦ ମସିହା ପର୍ଯ୍ୟନ୍ତ ଭାରତୀୟ ହକି ଟିମ୍ କୌଣସି ଅଲିମ୍ପିକ୍ସରେ ମେଡାଲ ଜିତିପାରିନଥିଲା । ୧୯୮୦ ମସ୍କୋ ଅଲିମ୍ପିକ୍ସରେ ଭାରତୀୟ ହକି ଦଳ ପୁଣି ଇତିହାସର ପୁରୁଣା ପୃଷ୍ଠା ଲେଉଟାଇବା ସହିତ ସବୁ ଦଳକୁ ମାତ୍ ଦେଇଥିଲା । ଆଉ ଏକ ରୋମାଂଚକର ଫାଇନାଲ ମ୍ୟାଚରେ ସ୍ପେନକୁ ହରାଇ ଅଷ୍ଟମ ଥର ପାଇଁ ସ୍ୱର୍ଣ୍ଣପଦକ ଜିତିଥିଲା ।
୨୦୨୦ ଟୋକିଓ ଅଲିମ୍ପିକ୍ସ
୧୯୮୦ର ମସ୍କୋ ଅଲିମ୍ପିକ୍ସ ଆଉ ୨୦୨୦ର ଟୋକିଓ ଅଲିମ୍ପିକ୍ସ ଭିତରେ ପ୍ରାୟ ୪ ଦଶନ୍ଧୀ ସମୟ ବିତିଯାଇଥିଲା । ହେଲେ ଭାରତୀୟ ହକି ଦଳ କୌଣସି ଅଲିମ୍ପିକ୍ସରେ ମେଡାଲ ଜିତିପାରିନଥିଲା । ଏଥର ଦଳ କ୍ୟାପେଟନ୍ ମନପ୍ରୀତ ସିଂଙ୍କ ନେତୃତ୍ୱରେ ଟୋକିଓ ଯାତ୍ରା କରିଥିଲା । ଆଉ ଏବେ ଦଳ ଯାହା କରିଦେଖେଇଛି ତା ସମସ୍ତଙ୍କୁ ଜଣା । ଦଳ ସେମିଫାଇନାଲରେ ବେଲଜିୟମଠାରୁ ପରାସ୍ତ ହୋଇଥିଲେ ମଧ୍ୟ ଜର୍ମାନୀକୁ ହରାଇ କାଂସ୍ୟ ପଦକ ଜିତିଛି ।
୮ ଥର ସ୍ୱର୍ଣ୍ଣ, ଥରେ ରୌପ୍ୟ ଏବଂ ୩ ଥର ବ୍ରୋଞ୍ଜ । ବାସ୍ ଅଲିମ୍ପିକ୍ସରେ ଏମିତି କିଛି ଥିଲା ଭାରତୀୟ ହକି ଟିମର ସ୍ୱର୍ଣ୍ଣିମ ଇତିହାସ । ଜୟପାଲ ସିଂହଙ୍କ ଠାରୁ ଧ୍ୟାନଚାନ୍ଦ । ବାସୁଦେବନ ଭାସ୍କରନଙ୍କଠାରୁ ମନପ୍ରୀତ ସିଂହ । ଏହି ଖେଳାଳିମାନଙ୍କର ଅଧିନାୟକତ୍ୱରେ ଭାରତ ଅଲିମ୍ପିକ୍ସ ଇତିହାସ ପୃଷ୍ଠାରେ ଲେଖିଛି ନୂଆ ନୂଆ ଇତିହାସ ।