ଜିଏସଟି ଆଦାୟ, ପେଟ୍ରୋଲ-ଡିଜେଲର ବିକ୍ରି ଓ ଗାଡ଼ି ବିକ୍ରିକୁ ନେଇ ବିଶେଷଜ୍ଞଙ୍କ ଆକଳନ । ଟ୍ରାକକୁ ଫେରୁଛି ଦେଶର ଅର୍ଥନୀତି । ବିଶେଷଜ୍ଞ କହିଲେ ମିଳୁଛି ଖୁବ ଭଲ ସଂକେତ
କନକ ବ୍ୟୁରୋ : କରୋନା ମହାମାରୀର ସବୁଠାରୁ ବେଶୀ ପ୍ରଭାବିତ ହୋଇଥିଲା ରାଜ୍ୟ ତଥା ଦେଶର ଅର୍ଥନୀତି । ସବୁଠାରୁ ଅଧିକ ଦିନ ଧରି ଲକ୍ ଡାଉନ ହେବା ଫଳରେ ଶିଳ୍ପ ଓ ବ୍ୟବସାୟ ସମ୍ପୂର୍ଣ୍ଣ ବନ୍ଦ ହେବା ସହ ଚାକିରୀଆଙ୍କ ବେତନକାଟ ଯୋଗୁ ଅର୍ଥନୀତି ଏକ ରକମ ସ୍ଥାଣୁ ପାଲଟି ଯାଇଥିଲା । କିନ୍ତୁ ଏବେ ବିଭିନ୍ନ କ୍ଷେତ୍ରରେ ଦେଖା ଦେଇଥିବା ଅଭିବୃଦ୍ଧି କିଛିଟା ଆଶା ସଂଚାର କରିଛି ।
Kanak News is now on WhatsApp
Join and get latest news updates delivered to you via WhatsApp
ବଢିଲା ବିଦ୍ୟୁତ ବ୍ୟବହାର
ଦେଶରେ ବିଦ୍ୟୁତ ବ୍ୟବହାର ଅକ୍ଟୋବର ମାସରେ ୧୩.୩୮ ପ୍ରତିଶତ ବୃଦ୍ଧି ପାଇ ୧୧୦.୯୪ ବିଲିୟନ ୟୁନିଟରେ ପଂହଚିଛି । ଏହା କଳ କାରଖାନା ଓ ଶିଳ୍ପସଂସ୍ଥା ସବୁ ପୁଣି କାର୍ଯ୍ୟକ୍ଷମ ହେବା ନେଇ ସଙ୍କେତ ଦେଉଛି । ଏପରିକି ଅକ୍ଟୋବରର ବିଦ୍ୟୁତ ବ୍ୟବହାର ଗତବର୍ଷର ବ୍ୟବହାରଠାରୁ ମଧ୍ୟ ବଢି ଯାଇଛି ।
ଇନ୍ଧନ ବିକ୍ରିରେ ବୃଦ୍ଧି
ଅକ୍ଟୋବରରେ ମାସରେ ଡିଜେଲ ବିକ୍ରୀ ୬.୬ ଓ ପେଟ୍ରୋଲ ବିକ୍ରୀ ୪ ପ୍ରତିଶତ ବଢିଛି । ସେହିପରି ବିମାନ ଇନ୍ଧନ ମାସିକ ବିକ୍ରିରେ ୧୩ ପ୍ରତିଶତ ଓ ଏଲପିଜି ବିକ୍ରିରେ ମଧ୍ୟ ୭ ପ୍ରତିଶତ ବୃଦ୍ଧି ହୋଇଛି ।
ବଢିଲା କାର ବିକ୍ରି
କାର ବିକ୍ରିରେ ମଧ୍ୟ ବଡ ଧରଣର ସୁଧାର ଦେଖିବାକୁ ମିଳିଛି । ଦେଶର ପ୍ରମୁଖ କାର ନିର୍ମାତା ମାରୁତି ସୁଜୁକି ୧୭.୬ ପ୍ରତିଶତ ଅଭିବୃଦ୍ଧି ଲାଭ କରିଛି ।
ରେଳବାଇ ମାଲ ପରିବହନରେ ବୃଦ୍ଧି
ଅକ୍ଟୋବର ମାସରେ ରେଳବାଇ୧୦୮.୧୬ ନିୟୁତ ଟନ ମାଲ ପରିବହନ କରିଛି, ଯାହା ଗତ ବର୍ଷ ତୁଳନାରେ ୧୫ ପ୍ରତିଶତ ଅଧିକ ।
ୟୁପିଆଇ କାରବାର ବୃଦ୍ଧି
ମହାମାରୀ ଭିତରେ ବଢିଯାଇଛି ଡିଜିଟାଲ କାରବାର । ଚଳିତ ବର୍ଷ ଅକ୍ଟୋବରରେ ଏହା ୮୦ ପ୍ରତିଶତ ବୃଦ୍ଧି ପାଇ ୪ଲକ୍ଷ କୋଟି ଟଙ୍କା ଅତିକ୍ରମ କରିଛି ।
ଜିଏସଟି ଆଦାୟରେ ବୃଦ୍ଧି
କୋଭିଡ ମହାମାରୀ ସମୟରେ ଦୀର୍ଘ ୮ ମାସ ପରେ ଅକ୍ଟୋବର ମାସରେ ଦେଶରେ ଜିଏସଟି ଆଦାୟ ଏକ ଲକ୍ଷ କୋଟି ଟଙ୍କା ଅତିକ୍ରମ କରିଛି । ଆମ ରାଜ୍ୟ ଓଡିଶାରେ ମଧ୍ୟ ଏହି କ୍ଷେତ୍ରରେ ୨୧ ପ୍ରତିଶତ ଅଭିବୃଦ୍ଧି ପରିଲକ୍ଷିତ ହୋଇଛି ।
ଦେଶରେ କରୋନା ସଂକ୍ରମଣ କମି ଚାଲିଥିବା ବେଳେ ପର୍ଯ୍ୟାୟକ୍ରମେ ଅର୍ଥନୀତିକୁ ଉନ୍ମୁକ୍ତ କରାଯାଉଛି । ଅର୍ଥନିତୀକୁ ସବଳ କରିବା ପାଇଁ କେନ୍ଦ୍ର ସରକାର ବିଭିନ୍ନ ପ୍ୟାକେଜ୍ ମଧ୍ୟ ଘୋଷଣା କରୁଛନ୍ତି । ତଥାପି ଏପର୍ଯ୍ୟନ୍ତ ପର୍ଯ୍ୟଟନ, ହୋଟେଲ, ସିନେମା ପରି ଅନେକ ଶିଳ୍ପ ଅଭିବୃଦ୍ଧି ଅପେକ୍ଷାରେ ଅଛନ୍ତି । ତେବେ ବିଭିନ୍ନ କ୍ଷେତ୍ରରେ ଦେଖାଦେଇଥିବା ଏହି ଅର୍ଥନୈତିକ ଅଭିବୃଦ୍ଧି କୋଭିଡପୂର୍ବ ସ୍ଥିତିକୁ ଶୀଘ୍ର ଫେରିବାରିବାର ଆଶା ସଂଚାର କରୁଛି ।