ଆଜିଠୁ ପ୍ରଥମ ଦିନିକିଆ । ଜୋହନ୍ସବର୍ଗରେ ଖେଳାଯିବ ଭାରତ-ଦକ୍ଷିଣ ଆଫ୍ରିକା ସିରିଜର ପ୍ରଥମ ମ୍ୟାଚ । ରାହୁଲଙ୍କ ନେତୃତ୍ୱରେ ପଡ଼ିଆକୁ ଓହ୍ଲାଇବ ଟିମ୍ ଇଣ୍ଡିଆ ।

କନକ ବ୍ୟୁରୋ: ଆଜିଠୁ ଭାରତ-ଦକ୍ଷିଣ ଆଫ୍ରିକା ପ୍ରଥମ ଦିନିକିଆ । ଜୋହାନ୍ସବର୍ଗ ୱାନଡରର୍ସ ଷ୍ଟାଡିୟମରେ ଭାରତୀୟ ସମୟ ଦିନ ୧ଟା୩୦ରେ ଖେଳାଯିବ ମ୍ୟାଚ । ବିଶ୍ୱକପ ପରେ ପ୍ରଥମଥର ଦିନିକିଆ ଅଭିଯାନ ଆରମ୍ଭ କରିଛି ଭାରତୀୟ ଦଳ । ରୋହିତ ଶର୍ମା, ବିରାଟ କୋହଲିଙ୍କ ଅନୁପସ୍ଥିତିରେ ଦଳର ନେତୃତ୍ୱ ନେଉଛନ୍ତି କେ.ଏଲ ରାହୁଲ । ଦିନିକିଆ ଶୃଙ୍ଖଳାରେ ଯୁବ ଖେଳାଳିଙ୍କୁ ପ୍ରାଧାନ୍ୟ ଦେଇଛି ଦଳ ।

ଟି-୨୦ ସିରଜରେ ଫିନିସର ଭୂମିକାରେ ଅବତୀର୍ଣ୍ଣ ହୋଇଥିବା ରିଙ୍କୁ ସିଂଙ୍କୁ ଆଜି ଦିନିକିଆ ମ୍ୟାଚରେ ପଦାର୍ପଣର ସୁଯୋଗ ମିଳିପାରେ ବୋଲି ଚର୍ଚ୍ଚା ହେଉଛି । ସେହିପରି ଘରୋଇ କ୍ରିକେଟରେ ପ୍ରଚୁର ରନ କରିଥିବା ସାଇ ସୁଦର୍ଶନ, ତିଲକ ବର୍ମା, ରଜତ ପଟିଦାରଙ୍କୁ ମଧ୍ୟ ସୁଯୋଗ ଦେଇପାରେ ଦଳ । ଆହତ ଏବଂ ପାରିବାରିକ ସ୍ୱାସ୍ଥ୍ୟ ସମସ୍ୟା କାରଣରୁ ଭାରତୀୟ ପେସ ବୋଲର ମହମ୍ମଦ ସାମି ଏବଂ ଦୀପକ ଚହର ଦଳରୁ ବାଦ ପଡିଥିବା ବେଳେ ଆକାଶ ଦୀପଙ୍କୁ ମିଳିପାରେ ସୁଯୋଗ । ସେପଟେ ଭାରତୀୟ ଯୁବ ବାହିନୀକୁ ମାତ ଦେବାକୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିଛି ଦକ୍ଷିଣ ଆଫ୍ରିକା ଦଳ ।