ଟି-୨୦ ବିଶ୍ୱକପ୍ ପୂର୍ବରୁ ପାକିସ୍ତାନ ଅଧିନାୟକଙ୍କ ବଡ ବୟାନ । କହିଲେ, ଏଥର ଭାରତ ବିପକ୍ଷ ମ୍ୟାଚରେ ଆମେ ଜିତିବୁ, ଟିମ୍ ଇଣ୍ଡିଆ ହାରିବ ।
କନକ ବ୍ୟୁରୋ: ଟି-୨୦ ବିଶ୍ୱକପରେ ଭାରତ ନିଜର ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନ ସହ ମ୍ୟାଚ୍ ଖେଳି ଏଥର ଅଭିଯାନ ଆରମ୍ଭ କରିବ । ଅକ୍ଟୋବର ୨୪ ତାରିଖରେ କ୍ରିକେଟ୍ ପଡିଆରେ ଏହି ଦୁଇ ଦେଶର ଖେଳାଳି ଏକ ପ୍ରକାରର ଯୁଦ୍ଧ ଲଢିବେ । ହେଲେ ଏହାପୂର୍ବରୁ ପାକିସ୍ତାନ କ୍ରିକେଟ୍ ଟିମର ଅଧିନାୟକ ବାବର ଆଜମ୍ ଏହି ମ୍ୟାଚକୁ ନେଇ ଏକ ବଡ ବୟାନ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଇସିସି ୱେବସାଇଟ୍ ସହିତ କଥାବାର୍ତ୍ତାରେ ବାବର୍ କହିଛନ୍ତି, ତାଙ୍କୁ ପୂରା ବିଶ୍ୱାସ ଅଛି, ଏଥର ଭାରତ ବିପକ୍ଷରେ ସେମାନେ ନିଶ୍ଚୟ ବିଜୟୀ ହେବେ । ଗତ ତିନି-ଚାରି ବର୍ଷ ହେଲା ୟୁଏଇରେ ଖେଳିବା ନେଇ ପାକିସ୍ତାନର ଅନୁଭବ ଅଧିକ ରହିଛି । ଯାହାକି ଦଳ ପାଇଁ ଲାଭଦାୟକ ହେବ । ଖାଲି ସେତିକି ନୁହେଁ, ଏଠାକାର ପରିବେଶ ମଧ୍ୟ ପାକିସ୍ତାନ ଖେଳାଳିମାନେ ବେଶ୍ ଭଲ ଭାବେ ଜାଣିଛନ୍ତି, ତେଣୁ ମ୍ୟାଚ୍ ଦିନ ଭାରତକୁ ହରାଇବାରେ ପାକିସ୍ତାନ ସଫଳ ହେବ ବୋଲି ବାବର୍ ଆଜମ୍ କହିଛନ୍ତି ।
ସୂଚନାଯୋଗ୍ୟ ଯେ, ଆସନ୍ତା ଅକ୍ଟୋବର ୨୪ ତାରିଖରେ ଭାରତ-ପାକିସ୍ତାନ ମଧ୍ୟରେ ଲିଗ୍ ମ୍ୟାଚ୍ ଖେଳାଯିବ । ଯାହାକି ୟୁଏଇର ଦୁବାଇ ଇଣ୍ଟର ନ୍ୟାସନାଲ ଷ୍ଟାଡିୟମରେ ଖେଳାଯିବ । ଦୁଇ ଦେଶର ଖେଳାଳିଙ୍କ ଅନୁଭବକୁ ବିଚାର କଲେ, ଏହି ଷ୍ଟାଡିୟମରେ ପାକିସ୍ତାନ ଖେଳାଳି ଅଧିକ ମ୍ୟାଚ୍ ଖେଳିଛନ୍ତି । କାହିଁକି ନାଁ ପାକିସ୍ତାନକୁ ଯିବାକୁ ଅନ୍ୟ ଦେଶର ଖେଳାଳିମାନେ ମନା କରିବା ପରଠାରୁ ପାକିସ୍ତାନ ନିଜର ହୋମ୍ ଗ୍ରାଉଣ୍ଡ ଭାବେ ୟୁଏଇରେ ମ୍ୟାଚ୍ ଖେଳିଆସୁଛି । ଏହି କାରଣରୁ ସେଠାକାର ପରିବେଶ ନେଇ ଦଳର ଖେଳାଳିମାନେ ବେଶ ପରିଚିତ ।
ବିଶ୍ୱକପରେ ଭାରତଠାରୁ କୌଣସି ମ୍ୟାଚ୍ ଜିତିନି ପାକିସ୍ତାନ
ଟି-୨୦ ବିଶ୍ୱକପ୍ ହେଉ ଅବା ଦିନିକିଆ ବିଶ୍ୱକପ୍ , ଆଜି ପର୍ଯ୍ୟନ୍ତ ଭାରତ ବିପକ୍ଷରେ ଗୋଟିଏ ବି ମ୍ୟାଚ୍ ଜିତିପାରିନି ପାକିସ୍ତାନ କ୍ରିକେଟ୍ ଦଳ । ଟି-୨୦ ବିଶ୍ୱକପରେ ଦୁଇ ଦଳ ଏଯାବତ ୫ଟି ମ୍ୟାଚ୍ ଖେଳିଥିବାବେଳେ ସମସ୍ତ ମ୍ୟାଚରେ ଭାରତ ବିଜୟୀ ହୋଇଛି । ସେହିପରି ଦିନିକିଆ ବିଶ୍ୱକପରେ ମଧ୍ୟ ପାକିସ୍ତାନ ଦଳ ଭାରତକୁ କଦାପି ପରାଜିତ କରିପାରିନି ।