କନକ ବ୍ୟୁରୋ : ବିଶ୍ୱ ଟେଷ୍ଟ ଚାମ୍ପିୟନସିପ ଫାଇନାଲ ମୁକାବିଲା ପାଇଁ ଭାରତୀୟ ଦଳ ଘୋଷଣା । ଶିବସୁନ୍ଦର ଦାସଙ୍କ ନେତୃତ୍ୱ ଗଠିତ ଚୟନ କମିଟି ଫାଇନାଲ ମୁକାବିଲା ପାଇଁ ଦଳ ଘୋଷଣା କରିଛି । ରୋହିତଙ୍କ ନେତୃତ୍ୱରେ ଦଳ ଫାଇନାଲ ମୁକାବିଲା ଖେଳିବ । ସେହିଭଳି ଦୀର୍ଘ ଦିନ ପରେ ପୁଣିଥରେ ଦଳକୁ କମବ୍ୟାକ୍ କରିଛନ୍ତି ଆଜିଙ୍କ୍ୟ ରାହାଣେ । ଆଇପିଏଲରେ ଦମଦାର ପ୍ରଦର୍ଶନ ଫଳରେ ରାହାଣେଙ୍କୁ ଭାରତୀୟ ଦଳରୁ ପୁଣିଥରେ ଡାକରା ଆସିଛି ।

Advertisment

ସେହିଭଳି ବିଶ୍ୱ ଟେଷ୍ଟ ଚାମ୍ପିୟନସିପ୍ ଫାଇନାଲ ପାଇଁ ଘୋଷିତ ଦଳରୁ ସୂର୍ଯ୍ୟକୁମାର ଯାଦବ ବାଦ୍ ପଡିଛନ୍ତି । ସୂର୍ଯ୍ୟକୁମାର ଯାଦବଙ୍କର ଟେଷ୍ଟ ଖେଳିବାର ସେତେଟା ଅଭିଜ୍ଞତା ନଥିବା ବେଳେ ଅନୁଭବୀ ରାହାଣେଙ୍କୁ ସୁଯୋଗ ମିଳିଛି । ଦୀର୍ଘଦିନ ପରେ ଦଳକୁ ଜୟଦେବ ଉନାଦକତ ଫେରିଛନ୍ତି । ରଣଜୀରେ ଦମଦାର ପ୍ରଦର୍ଶନ ତାଙ୍କୁ ଟିମ୍ ଇଣ୍ଡିଆର ଟିକେଟ ଦେଇଛି । ଆହତ କାରଣରୁ ବୁମରାହ ବାଦ୍ ପଡିଥିବା ବେଳେ ସାମି, ସିରାଜ ଓ ଉମେଶ ଦଳର ବୋଲିଂ ମଙ୍ଗ ସମ୍ଭାଳିବେ । ସ୍ପିନର ଭାବେ ଜାଡେଜା ଓ ଅଶ୍ୱିନୀଙ୍କୁ ସାମିଲ କରାଯାଇଥିବା ବେଳେ ଅଲରାଉଣ୍ଡର ସ୍ଥାନ ସାର୍ଦ୍ଦୁଳ ଠାକୁର ନେଇଛନ୍ତି । ୱିକେଟ କିପର ଭାବେ ପୁଣିଥରେ କେ.ଏସ ଭରତଙ୍କ ଉପରେ ଭରସା କରିଛନ୍ତି ଚୟନକର୍ତ୍ତା । ଫର୍ମରେ ନଥିଲେ ମଧ୍ୟ କେ.ଏଲ ରାହୁଲଙ୍କୁ ଟିମରେ ସାମିଲ କରାଯାଇଥିବା ବେଳେ ଶୁଭମାନ ଗିଲଙ୍କୁ ଦଳରେ ସ୍ଥାନ ମିଳିଛି ।

ଆସନ୍ତା ଜୁନ୍ ମାସରେ ଇଂଲଣ୍ଡରେ ବିଶ୍ୱ ଟେଷ୍ଟ ଚାମ୍ପିୟନସିପର ଫାଇନାଲ ଖେଳାଯିବ । ଟାଇଟଲ ପାଇଁ ଭାରତ-ଅଷ୍ଟ୍ରେଲିଆ ମୁହାଁମୁହିଁ ହେବେ । ଇଂଲଣ୍ଡର ଦ ଓଭାଲ ଗ୍ରାଉଣ୍ଡରେ ଏହି ମୁକାବିଲା ଖେଳାଯିବ । ଏହି ହାଇଭୋଲଟେଜ ମୁକାବିଲାକୁ ଚାହିଁ ବସିଛନ୍ତି କ୍ରିକେଟପ୍ରେମୀ ।