ଦୈନିକ ସଂକ୍ରମଣର ନୂଆ ବିଶ୍ୱ ରେକର୍ଡ କଲା ଭାରତ ।୨୪ ଘଂଟାରେ ୪ଲକ୍ଷ ଟପିଲା ଆକ୍ରାନ୍ତଙ୍କ ସଂଖ୍ୟା, ୩୫ ଶହରୁ ଅଧିକ ମୃତ ।
କନକ ବ୍ୟୁରୋ: ଦେଶରେ ଟିକାକରଣ ଚାଲିଥିବା ବେଳେ ସାଂଘାତିକ ହେଉଛି କରୋନା ସ୍ଥିତି । ସାରା ବିଶ୍ୱରେ ଦୈନିକ ସଂକ୍ରମଣ ଚିହ୍ନଟ ମାମଲାରେ ଭାରତ ଆଜି ଅଲୋଡା ରେକର୍ଡ କରିଛି । ଗତ ୨୪ ଘଂଟାରେ ଦେଶରୁ ୪ଲକ୍ଷ ୧ହଜାର ୯୩୩ଜଣ ନୂଆ ଆକ୍ରାନ୍ତ ଚିହ୍ନଟ ଓ ୩ହଜାର ୫୨୩ ସଂକ୍ରମିତ ପ୍ରାଣ ହରାଇଛନ୍ତି । ନୂଆ ମାମଲାକୁ ମିଶାଇ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୧କୋଟି ୯୧ଲକ୍ଷ ୬୪ହଜାର ୯୬୯ରେ ପହଁଚିଛି । ଦେଶରେ ଏବେ ୩୨ ଲକ୍ଷ ୬୮ହଜାର ୭୧୦ ସକ୍ରିୟ ସଂକ୍ରମିତ ଚିକିତ୍ସିତ ଅଛନ୍ତି । ଦିନକୁ ଦିନ କରୋନା ମିଟର ଉପରମୁହାଁ ହୋଇଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ଭାରତରେ କରୋନା ସଂକ୍ରମଣର ଚେନ ଉପରେ କେମିତି ଲାଗିବ ବ୍ରେକ ସେନେଇ ପରାମର୍ଶ ଦେଇଛନ୍ତି ଆମେରିକା ଡାକ୍ତର ଏନ୍ଥୋନୀ ଫସି । ବାଇଡେନ ପ୍ରଶାସନର ଚିଫ ମେଡିକାଲ ଅଫିସର ଏନ୍ଥୋନୀ ଫସି ସଂକ୍ରମଣ ରୋକିବାକୁ ୩ ସୂତ୍ରୀ ଉପାୟ ବତାଇଛନ୍ତି ।
୧ ଅସ୍ଥାୟୀ ଲକଡାଉନ୍
ଡାକ୍ତର ଫସି କହିଛନ୍ତି, ଭାରତରେ ସଂକ୍ରମଣର ଚେନକୁ ଭାଙ୍ଗିବାକୁ ୬ମାସ ଲକ୍ଡାଉନ କରିବା ଆବଶ୍ୟକ ନୁହେଁ, କିଛି ସପ୍ତାହର ଲକ୍ଡାଉନ ଲାଗୁ, କରୋନା ଚେନ ଭାଙ୍ଗିବା ପାଇଁ ଫଳପ୍ରଦ ଉପାୟ ହୋଇପାରିବ ।
୨ ଅକ୍ସିଜେନ, ଔଷଧ ସମସ୍ୟା ଦୂର କରିବା
ଲୋକଙ୍କୁ ଟିକାକରଣ କରିବା ନିହାତି ଦରକାର, ହେଲେ ଏହାର ପ୍ରଭାବ ବିଳମ୍ବରେ ଆରମ୍ଭ ହେବ । ତେଣୁ ଏହା ଲୋକଙ୍କ ଅକ୍ସିଜେନ ଆବଶ୍ୟକ ଓ ହସ୍ପିଟାଲରେ ଭର୍ତି ହେବା ସମସ୍ୟାକୁ ରୋକିପାରିବ ନାହିଁ । ତେଣୁ ଅକ୍ସିଜେନ, ଔଷଧ ଅଭାବ ସମସ୍ୟାରେ ସୁଧାରକୁ ପ୍ରାଥମିକତା ଦେବା ଉଚିତ୍ ।
୩ ଚୀନ ଭଳି ଅସ୍ଥାୟୀ ହସ୍ପିଟାଲ ନିର୍ମାଣ
ଭାରତରେ ଲୋକ ଚିକିତ୍ସା ପାଇଁ ହସ୍ପିଟାଲ ଘୁରି ବୁଲୁଥିବାରୁ, ଚୀନ ଭଳି ଅସ୍ଥାୟୀ ହସ୍ପିଟାଲ ନିର୍ମାଣ କରାଯିବା ଉଚିତ୍ । ଚୀନ କିଛି ସପ୍ତାହ ଭିତରେ ଅସ୍ଥାୟୀ ହସ୍ପିଟାଲ ନିର୍ମାଣ କରି ଚିକିତ୍ସା ସେବା ଯୋଗାଇବାରେ ସଫଳ ହୋଇଥିଲା । ଏଥିପାଇଁ ଦରକାର ହେଲେ ସେନାର ସହାୟତା ମଧ୍ୟ ନିଆଯାଇ ପାରେ । ଆମେରିକା ମଧ୍ୟ ଟିକା ବିତରଣ ପାଇଁ ନେସନାଲ ଗାର୍ଡର ସହାୟତା ନେଇଥିଲା ବୋଲି କହିଛନ୍ତି ଡାକ୍ତର ଏନ୍ଥୋନୀ ଫସି ।
ଏପ୍ରିଲ ୨୨ ତାରିଖରୁ ଦେଶରେ ୩ଲକ୍ଷରୁ ଅଧିକ ଆକ୍ରାନ୍ତ ଚିହ୍ନଟ ହେଉଥିବା ବେଳେ ମେ’ ପହିଲାରେ ସଂକ୍ରମଣ ସଂଖ୍ୟା ୪ଲକ୍ଷ ଟପି ନୂଆ ରେକର୍ଡ କରିଛି । ଆଉ ଏହି ଧାରା ଆଗକୁ ଜାରି ରହିଲେ ଦେଶ ଓ ସ୍ୱାସ୍ଥ୍ୟ ସେବାର ସ୍ଥିତି କଣ ହେବ ଏବେ କହିବା ମୁସ୍କିଲ ।