୪୧ ବର୍ଷ ପରେ ଭାରତ ପଦକ ପାଇଲା, ପୂରା ଦେଶ ନବୀନଙ୍କୁ ଶ୍ରେୟ ଦେଲା । ଭାରତୀୟ ହକିର ସ୍ୱର୍ଣ୍ଣିମ ଯୁଗ ଫେରାଇ ଆଣିବା ପଛର ସାରଥୀ ।
କନକ ବ୍ୟୁରୋ : କ୍ରୀଡା ଓ ନବୀନ ଗୋଟିଏ ମୁଦ୍ରାର ଦୁଇଟି ପାଶ୍ୱର୍ କହିଲେ ଅତ୍ୟୁକ୍ତି ହେବ ନାହିଁ । କାରଣ କ୍ରୀଡାକୁ ଆଗକୁ ନେବା ଓ କ୍ରୀଡାବିତଙ୍କୁ ପୋତ୍ସାହିତ କରିବା କ୍ଷେତ୍ରରେ ଅନ୍ୟ ରାଜନେତାଙ୍କ ତୁଳନାରେ ନବୀନ ସବୁବେଳେ ଦୁଇ ପାଦ ଆଗରେ । କ୍ରୀଡା ପ୍ରତି ନବୀନଙ୍କ ଅବଦାନ କଣ ତାହା ବାଖ୍ୟା କରିବାର ଆଉ ବୋଧହୁଏ ଆବଶ୍ୟକତା ନାହିଁ । କାରଣ କ୍ରୀଡା ଓ କ୍ରୀଡାବିତଙ୍କୁ ସଫଳତାର ଶିଖରରେ ପହଞ୍ଚାଇବା ପାଇଁ ନବୀନ ଯେଉଁ ରାସ୍ତା ଆପଣାଇଛନ୍ତି ସେଥିପାଇଁ ଦେଶର କୋଣ ଅନୁକୋଣରୁ ପ୍ରଂଶସାର ସୁଅ ଛୁଟୁଛି । ନେତା, ଅଭିନେତା, କ୍ରୀଡାବିତ୍, ଶିଳ୍ପପତି, ସାମ୍ବାଦିକ, ସାଧାରଣ ଲୋକ ଦେଶର ଏମିତି କୌଣସି ବର୍ଗ ନାହାନ୍ତି ଯେଉଁମାନେ କ୍ରୀଡା ପ୍ରତି ନବୀନଙ୍କର ଥିବା ଭଲପାଇବା ଦେଖି ପ୍ରଂଶସା କରିନାହାନ୍ତି । ଜାତୀୟ କ୍ରୀଡା ହକିକୁ ପୁନଃଜନ୍ମ ଦେବା ଠାରୁ ଆରମ୍ଭ କରି ଅନ୍ୟ କ୍ରୀଡାକୁ ଆପଣାଇବାରେ କେବେ ବି କୁଣ୍ଠାବୋଧ କରିନାହାନ୍ତି ନବୀନ । ସେଥିପାଇଁ ତ କିଏ ଓଡ଼ିଶାକୁ ହକିର ହବ କହୁଛି ତ ଆଉ କିଏ ଓଡ଼ିଶାକୁ ସ୍ପୋଟ୍ସ କ୍ୟାପିଟାଲର ଟ୍ୟାଗ ଦେଉଛି । ଆଉ ଏହା ପଛର ମୁଖ୍ୟ ନାୟକ ସାଜି ଉଭା ହୋଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ କ୍ରୀଡା ପ୍ରତି ନବୀନଙ୍କର ଏପରି ଭଲପାଇବା ସ୍କୁଲ ସମୟରୁ ରହିଆସିଛି ।
Kanak News is now on WhatsApp
Join and get latest news updates delivered to you via WhatsApp
ସ୍କୁଲ ବେଳୁ ହକି ଷ୍ଟିକ ଧରିଥିବା ନବୀନ ରାଜ୍ୟର ମଙ୍ଗ ଧରିବା ପରେ ମଧ୍ୟ ହକି ଖେଳ ପ୍ରତି ଥିବା ଭଲପାଇବାକୁ ଭୁଲି ପାରିନଥିଲେ । ଆଉ ନବୀନ ହକିକୁ କେତେ ଭଲପାଆନ୍ତି ସେତେବେଳେ ପୂରା ଦେଶ ଦେଖିଥିଲା ଯେତେବେଳେ ଭାରତୀୟ ଟିମର ପ୍ରାୟୋଜକରୁ ସାହାର ଓହରିଯାଇଥିଲା । ସେତେବେଳେ ଭାରତୀୟ ହକିର ସ୍ପନସର ହେବାକୁ କୌଣସି ସଂସ୍ଥା ଏତେଟା ଆଗ୍ରହ ଦେଖାଇନଥିଲେ । କିନ୍ତୁ ଏହି ସମୟରେ ନବୀନ ନେଇଥିଲେ ଏମିତି ଏକ ନିଷ୍ପତ୍ତି ଯାହା ପୂରା ଦେଶବାସୀଙ୍କୁ ଚକିତ କରିଦେଇଥିଲା । ଓଡ଼ିଶା ଭାରତୀୟ ହକି ଦଳର ପ୍ରାୟୋଜକ ହେବ ବୋଲି ଘୋଷଣା କରି ଦୁର୍ଦ୍ଦିନରେ ଗତି କରୁଥିବା ହକି ଇଣ୍ଡିଆ ମନରେ ସାହସ ଭରିଥିଲେ । ଆଉ ଭାରତୀୟ ହକି ଦଳର ଦାୟିତ୍ୱ ଓଡ଼ିଶା ଉପରକୁ ନେଇ ନବୀନ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିବା ସହ ଭାରତୀୟ ହକି ଇତିହାସରେ ନୂଆ ଅଧ୍ୟାୟ ଆରମ୍ଭ କରିଥିଲେ । ଯାହାର ଫଳାଫଳ ଭାରତକୁ ଅଲିମ୍ପିକ୍ସରେ ମିଳିଥିଲା । ଦୀର୍ଘ ୪୧ ବର୍ଷ ପରେ ଅଲିମ୍ପିକ୍ସରେ ପୋଡିୟମ ଫିନିସ କରିଥିଲା ଭାରତୀୟ ପୁରୁଷ ହକି ଦଳ । ଭାରତୀୟ ପୁରୁଷ ହକି ଟିମ୍ ବ୍ରୋଞ୍ଜ ପଦକ ଜିତିଥିଲା ସତ କିନ୍ତୁ ପୁଣିଥରେ ଭାରତୀୟ ହକିର ସ୍ୱର୍ଣ୍ଣିମ ଯୁଗ ଆରମ୍ଭ ହୋଇଥିଲା । ଆଉ ଏଭଳି ସଫଳତା ପାଇଁ ସେତେବେଳେ ନବୀନଙ୍କୁ ଶ୍ରେୟ ଦେଇଥିଲେ ଦେଶବାସୀ । ପଦକ ଜିତିବା ପରେ ପୁଣିଥରେ ଭାରତୀୟ ହକିକୁ ବଡ ଭେଟି ଦେଇଥିଲେ ନବୀନ । ଆଉ ୧୦ ବର୍ଷ ପ୍ରାୟୋଜକ ରହିବାକୁ ଘୋଷଣା କରି ଭାରତୀୟ ହକି ପ୍ରେମୀଙ୍କ ହୃଦୟ ଜିତିଥିଲେ ନବୀନ । ଓଡ଼ିଶା ହକିର ହବ ଏକଥା ତ ଦେଶ ଜାଣିଥିଲା, କିନ୍ତୁ ହକିକୁ ନେଇ ବିଶ୍ୱସ୍ତରରେ ଓଡ଼ିଶାକୁ ନୂଆ ପରିଚୟ ଦେଇଥିଲେ ନବୀନ ।
ହକି ମ୍ୟାଚ୍ ଆୟୋଜନ କରିବା ପାଇଁ ଯେତେବେଳେ ବିଭିନ୍ନ ରାଜ୍ୟ ପଛଘୁଞ୍ଚା ଦେଇଥିଲେ ସେତେବେଳେ ଆଗେଇ ଆସିଥିଲେ ନବୀନ । ଓଡ଼ିଶାରେ ବିଶ୍ୱସ୍ତରୀୟ ହକି ଟୁର୍ଣ୍ଣାମେଣ୍ଟ ଆୟୋଜନ ପାଇଁ ମୁଖ୍ୟମନ୍ତ୍ରୀ ଦେଇଥିଲେ ଗ୍ରୀନ୍ ସିଗନାଲ । ମିଶନ ମୋଡରେ ହକି ଟୁର୍ଣ୍ଣାମେଣ୍ଟ ପାଇଁ ପ୍ରସ୍ତୁତି ଚାଲିଲା, ଗୋଟିଏ ପରେ ଗୋଟିଏ ବିଶ୍ୱସ୍ତରୀୟ ଟୁର୍ଣ୍ଣାମେଣ୍ଟର ସାକ୍ଷୀ ସାଜିଲା ଓଡ଼ିଶା । ହକି ୱାର୍ଲ୍ଡ ଲିଗ୍ ଫାଇନାଲ, ଚାମ୍ପିୟନ୍ସ ଟ୍ରଫି, ହକି ଇଣ୍ଡିଆ ଲିଗର ସଫଳତା ପରେ ଓଡ଼ିଶାକୁ ମିଳିଥିଲା ବିଶ୍ୱକପ ହକି ଆୟୋଜନର ଗୁରୁଦାୟିତ୍ୱ । ଆଉ ଖୁବ୍ କମ ଦିନରେ ହକି ବିଶ୍ୱକପର ସଫଳ ଆୟୋଜନ କରି ପୂରା ବିଶ୍ୱରେ ନୂଆ ପରିଚୟ ସୃଷ୍ଟି କରିଥିଲା ଓଡ଼ିଶା । ଆଉ ହକି ପ୍ରତି ଥିବା ନବୀନଙ୍କ ପ୍ରତିବଦ୍ଧତା ଦେଖି ୨୦୨୩ ହକି ବିଶ୍ୱକପ ଆୟୋଜନ ପାଇଁ ଓଡ଼ିଶା ପାଲଟିଛି ବିଶ୍ୱର ପ୍ରଥମ ପସନ୍ଦର ଭେନ୍ୟୁ । ନବୀନଙ୍କ ଗୋଟିଏ ନିଷ୍ପତ୍ତି ବିଶ୍ୱ ମାନଚିତ୍ରରେ ଓଡ଼ିଶାକୁ ସ୍ୱତନ୍ତ୍ର ପରିଚୟ ଦେଇଥିଲା ।
ଏସବୁ ଭିତରେ ଆଗକୁ ହକି ବିଶ୍ୱକପ ଓ ଜୁନିୟର ହକି ବିଶ୍ୱକପର ଆୟୋଜନ କରିବ ଓଡ଼ିଶା । ଆସନ୍ତା ନଭେମ୍ବରରେ ହେବାକୁ ଥିବା ଜୁନିୟର ହକି ବିଶ୍ୱକପ ପାଇଁ କଳିଙ୍ଗ ଷ୍ଟାଡିୟମରେ ପ୍ରସ୍ତୁତି ଏକପ୍ରକାର ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ୨୦୨୩ ବିଶ୍ୱକପ ପାଇଁ ଏବେଠୁ ପ୍ରସ୍ତୁତି ମଧ୍ୟ ଆରମ୍ଭ ହୋଇଛି । କଳିଙ୍ଗ ଷ୍ଟାଡିୟମ ସହ ସୁନ୍ଦରଗଡରେ ନୂଆକରି ନିର୍ମାଣ ହେବାକୁ ଥିବା ଦେଶର ବଡ ହକି ଷ୍ଟାଡିୟମରେ ଖେଳାଯିବ ବିଶ୍ୱକପ ହକି ମ୍ୟାଚ୍ । ହକିର ଏନ୍ତୁଡିଶାଳ କୁହାଯାଉଥିବା ସୁନ୍ଦରଗଡକୁ ମଧ୍ୟ ହକିର ହବ ଭାବେ ଗଢିତୋଳିବାକୁ ବିଶ୍ୱସ୍ତରୀୟ ଷ୍ଟାଡିୟମର ପୁନାଦି ପକାଇଛନ୍ତି ନବୀନ । ଗାଁରୁ ହିଁ ନୂଆ ନୂଆ ପ୍ରତିଭା ସୃଷ୍ଟି ହୁଅନ୍ତୁ ଏହି ଲକ୍ଷ୍ୟ ନେଇ ସୁନ୍ଦରଗଡ ଉପରେ ଫୋକସ କରିଛନ୍ତି ସରକାର ।
କେବଳ ଯେ ହକି ପ୍ରତି ଭଲପାଇବା ରହିଛି ତାହା ନୁହେଁ ବରଂ ଅନ୍ୟ କ୍ରୀଡାକୁ ମଧ୍ୟ ଅଗ୍ରାଧିକାର ଦେଇଛନ୍ତି ନବୀନ । ଗ୍ରାମାଞ୍ଚଳରେ କ୍ରୀଡା ଭିତ୍ତିଭୂମିକୁ ସୁଦୃଢ କରିବାକୁ ଇନଡୋର ଷ୍ଟାଡିୟମ ନିର୍ମାଣ ପାଇଁ ଗ୍ରୀନ୍ ସିଗନାଲ ଦେଇଥିବା ବେଳେ ପୁରୀରେ ଅତ୍ୟାଧୁନିକ ସ୍ପୋଟ୍ସ କମ୍ଲେକ୍ସର କାର୍ଯ୍ୟକୁ ତ୍ୱରାନିତ୍ୱ କରିବାକୁ ନିର୍ଦ୍ଦେଶ ଦେଇଛନ୍ତି ନବୀନ । ଏହାବାଦ୍ ରଗବୀ ଦଳର ସ୍ପନସର ଭାବେ ଓଡ଼ିଶା ନିଜେ ଦାୟିତ୍ୱ ନେବା ସହ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଦେଶର ପ୍ରଥମ ୨୦୦ ମିଟର ଇନଡୋର ଷ୍ଟାଡିୟମ ନିର୍ମାଣ କରି କ୍ରୀଡାବିତଙ୍କୁ ବଡ ଉପହାର ଦେଇଛନ୍ତି ନବୀନ । କ୍ରୀଡା ପ୍ରତି ନବୀନଙ୍କର ଥିବା ଭଲ ପାଇବା କେବଳ ଓଡ଼ିଶାକୁ ସ୍ପୋର୍ଟ୍ସ କ୍ୟାପିଟାଲର ପରିଚୟ ଦେଇନାହିଁ ବରଂ କ୍ରୀଡାବିତଙ୍କୁ କ୍ୟାରିୟର ଗଢିବା ପାଇଁ ନୂଆ ସୁଯୋଗ ସୃଷ୍ଟି କରିଛି ।