ଜାତିସଂଘରେ ପାକିସ୍ତାନକୁ ଭତ୍ସନା କଲେ ଭାରତୀୟ କୂଟନୀତଜ୍ଞ । ପଢନ୍ତୁ, କଣ କହିଲେ ଆଇଏଫଏସ ସ୍ନେହା ଦୁବେ…

108

କନକ ବ୍ୟୁରୋ: ଜାତିସଂଘ ସାଧାରଣ ପରିଷଦ ବୈଠକରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଭତ୍ସନା କରିଛନ୍ତି ଭାରତୀୟ କୂଟନୀତିଜ୍ଞ ସ୍ନେହା ଦୁବେ । ଜାତିସଂଘରେ ଇମ୍ରାନ ଖାନଙ୍କ ବକ୍ତବ୍ୟର କଡା ଜବାବ ରଖିଛନ୍ତି ଏହି ମହିଳା କୂଟନୀତିଜ୍ଞ । ସେ କହିଛନ୍ତି, ପାକିସ୍ତାନ ପାଇଁ ସାରା ବିଶ୍ୱ ସମସ୍ୟାକୁ ସାମ୍ନା କରୁଛି । ପାକିସ୍ତାନ ନିଜ ମାଟିରେ ଆତଙ୍କବାଦୀଙ୍କୁ ପ୍ରଶୟ ଦେଉଥିବାରୁ ସାରା ବିଶ୍ୱ ଏହାର ପରିଣାମ ଭୋଗୁଛି ।

ସ୍ନେହା ଦୁବେ କହିଛନ୍ତି, ଜାତିସଂଘର ମଞ୍ଚକୁ ବ୍ୟକ୍ତିଗତ ଆକ୍ରୋଶ ବାହାର କରିବା ପାଇଁ ପାକିସ୍ତାନର ପ୍ରଧାନମନ୍ତ୍ରୀ ଯେପରି ବ୍ୟବହାର କରିଛନ୍ତି ତାହା ଗ୍ରହଣୀୟ ନୁହେଁ । ନିଜ ଦେଶରେ ଅମେକ ସମସ୍ୟା ଥାଇ ମୋ ଦେଶକୁ ନେଇ ମନ୍ତବ୍ୟ ଦେବା ଠିକ୍ ନୁହେଁ । ଏମିତି ବିଶ୍ୱ ସମୂହ ଆଗରେ ମୋ ଦେଶକୁ ନେଇ ମିଛ ବୟାନବାଜି କରିବା ଆଉ ଏନେଇ ଜାତିସଂଘ ମଞ୍ଚକୁ ବ୍ୟବହାର କରିବା ପାକିସ୍ତାନର ଛୋଟ ମନୋବୃତ୍ତିକୁ ଦର୍ଶାଉଛି । ତେବେ ଏହା ପ୍ରଥମ ଥର ନୁହେଁ ପାକିସ୍ତାନ ନେତା ଏହି ପ୍ଲାଟଫର୍ମକୁ ଭୁଲ ଭାବେ ନିଜ ସ୍ୱାର୍ଥ ପାଇଁ ବ୍ୟବହାର କରିଛନ୍ତି । ମୋ ଦେଶକୁ ନେଇ ମନ୍ତବ୍ୟ ନଦେଇ ନିଜ ଦେଶରେ ହେଉଥିବା ଆତଙ୍କବାଦକୁ ରୋକିବା ଆବଶ୍ୟକ । ହେଲେ ପାକିସ୍ତାନ ତାହା ନକରି ଓଲଟା ଆତଙ୍କବାଦୀଙ୍କୁ ପ୍ରୋତ୍ସାହନ ଯୋଗାଇ ଆସୁଛି ।

ତେବେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ନିଜ ବକ୍ତବ୍ୟରେ ଜମ୍ମୁ-କାଶ୍ମୀର ପ୍ରସଙ୍ଗ ଉଠାଇଥିଲେ । ଜାତିସଂଘରେ ଇମ୍ରାନ ଖାନ୍, ମୋଦୀ ସରକାଙ୍କ ଦ୍ୱାରା ଜମ୍ମୁ-କାଶ୍ମୀରରୁ ଧାରା ୩୭୦-ଏ ଉଚ୍ଛେଦ ପ୍ରସଙ୍ଗ ଉଠାଇଥିଲେ । ଯାହାର ଉତ୍ତର ରଖିଛନ୍ତି ଭାରତର ମହିଳା କୂଟନୀତିଜ୍ଞ । ସ୍ନେହା ଦୁବେ ଆହୁରି ମଧ୍ୟ କହିଛନ୍ତି, ପାକିସ୍ତାନ ଆତଙ୍କବାଦକୁ ପ୍ରୋତ୍ସାହନ ଦେବା, ଆତଙ୍କବାଦୀଙ୍କୁ ଶରଣ ଦେବା ସେମାନଙ୍କୁ ସୁରକ୍ଷା ପ୍ରଦାନ କରିବାର ଅନେକ ଉଦାହରଣ ରହିଛି । କେବଳ ସେତିକି ନୁହେଁ ଆତଙ୍କବାଦୀଙ୍କୁ ପାଣ୍ଠି ଯୋଗାଇବା ଠାରୁ ଆରମ୍ଭ କରି ସେମାନଙ୍କୁ ଶରଣ ଦେବାର ରେକର୍ଡ ରହିଛି ପାକିସ୍ତାନ ପାଖରେ । ଗତ କିଛି ଦିନ ଆଗରୁ ୯/୧୧ ଆତଙ୍କବାଦୀ ଆକ୍ରମଣର ୨୦ ବର୍ଷ ପୂରଣ କରିଛି ଆମେରିକା ଆଉ ଏହି ଆକ୍ରମଣର ମାଷ୍ଟର ମାଇଣ୍ଡ ଓସାମା ବିନ୍ ଲାଡେନକୁ ପାକିସ୍ତାନ ଯେପରି ନିଜ ଦେଶରେ ଲୁଚାଇଥିଲା ତାହା ସାରା ବିଶ୍ୱ ଦେଖିଛି । ତେବେ ଦୁଃଖର କଥା ଆଜି ବି ପାକିସ୍ତାନ ପ୍ରଧାନମନ୍ତ୍ରୀ ଆତଙ୍କବାଦୀଙ୍କୁ ପ୍ରତ୍ୟକ୍ଷ ଭାବେ ସମର୍ଥନ କରୁଥିବା ତାଙ୍କ କଥାରୁ ସଫା ସଫା ବାରି ହୋଇ ପଡୁଛି । ତେବେ ପାକିସ୍ତାନର ଏଭଳି କାର୍ଯ୍ୟକଳାପକୁ ଆଦୌ ସହ୍ୟ କରାଯିବ ନାହିଁ ।

ଜାତିସଂଘରେ ନିଜ ଉତ୍ୟକ୍ତ ବୟାନରେ ପାକିସ୍ତାନର ଇମ୍ରାନ ସରକାରଙ୍କୁ ଟାର୍ଗେଟ କରିଥିବା ଭାରତୀୟ କୂଟନୀତିଜ୍ଞ ସ୍ନେହା ଦୁବେ ଏବେ ସାରା ବିଶ୍ୱରେ ଚର୍ଚ୍ଚାର ବିଷୟ ପାଲିଟିଛନ୍ତି । ତେବେ କିଏ ଏହି ଭାରତୀୟ କୂଟନୀତିଜ୍ଞ..

  • ସ୍ନେହା ୨୦୧୨ ବ୍ୟାଚର ଆଇଏଫଏସ ଅଧିକାରୀ
  • ଗୋଆରେ ତାଙ୍କ ସ୍କୁଲ ପାଠପଢା ଶେଷ ହୋଇଛି
  • ପରେ ସେ ପୁଣେ ଫରଗୁସନ କଲେଜ୍ରେ ନିଜ ପାଠ୍ୟକ୍ରମ ଶେଷ କରିଛନ୍ତି
  • ସେ ଜେଏନ୍ୟୁରେ ଇଣ୍ଟରନ୍ୟାସନାଲ ଷ୍ଟଡିଜରେ ନିଜ ଏମଫିଲ୍ ଡିଗ୍ରୀ ହାସଲ କରିଛନ୍ତି