କନକ ବ୍ୟୁରୋ : ଓଡିଶାରେ ଏବର୍ଷ ଅସହ୍ୟ ଗରମ ଅନୁଭୂତ ହେବ । ଖରା ମାସଗୁଡିକରେ ତତଲା ତାୱା ପାଲଟିବ ଆଭ୍ୟନ୍ତରୀଣ ଓ ପଶ୍ଚିମ ଓଡିଶା । କାରଣ ଭାରତୀୟ ପାଣିପାଗ ବିଭାଗର ଆକଳନ, ଓଡିଶା ସମେତ ଉତ୍ତର-ପଶ୍ଚିମାଂଚଳ ରାଜ୍ୟଗୁଡିକରେ ଅଧିକ ଉତ୍ତାପ ଅନୁଭୂତ ହେବ । ଗ୍ରୀଷ୍ମ ଋତୁରେ ଅନୁଭୂତ ହେଉଥିବା ସାଧାରଣ ତାପମାତ୍ରାଠାରୁ ୧ ଡିଗ୍ରୀ ଉପରେ ରହିବ ପାରଦ ।
Kanak News is now on WhatsApp
Join and get latest news updates delivered to you via WhatsApp
ସମ୍ବାଦ ସରବରାହ ସଂସ୍ଥା ପିଟିଆଇ ରିପୋର୍ଟ କରିଛି, କୋର ହିଟୱେଭ ଜୋନ୍ ଓଡିଶା, ଆନ୍ଧ୍ର, ତେଲେଙ୍ଗାନା, ପଶ୍ଚିମବଙ୍ଗ ସମେତ ୧୬ଟି ରାଜ୍ୟରେ ମାର୍ଚ୍ଚରୁ ମେ’ ମାସ ଭିତରେ ସାଧାରଣଠାରୁ ଅଧିକ ତାପମାତ୍ରା ଅନୁଭୂତ ହେବ ।
ଚଳିତ ବର୍ଷ ଜାନୁଆରୀରେ ଅଧିକ ଉତ୍ତାପ ଅନୁଭୂତ ହୋଇଛି । ୧୧୬ ବର୍ଷ ପରେ ଅଷ୍ଟମଥର ପାଇଁ ଜାନୁଆରୀରେ ତାପମାତ୍ରା ଅଧିକ ଥିବା ରେକର୍ଡ କରିଛି ଆଇଏମଡି । ଏହିଧାରା ଆଗକୁ ମଧ୍ୟ ଜାରି ରହିବ ବୋଲି ଭାରତୀୟ ପାଣିପାଗ ବିଭାଗ ପୂର୍ବନୁମାନ କରିଛି ।
ଆଇଏମଡି ଡିଜି କେ.ଜେ. ରମେଶ ଜାତୀୟ ଗଣମାଧ୍ୟମ ଦି ହିନ୍ଦୁକୁ ଫୋନରେ ଦେଇଥିବା ପ୍ରତିକ୍ରିୟା ଅନୁସାରେ ବିଶ୍ୱ ତାପନ ଯୋଗୁଁ ଦିନକୁ ଦିନ ଏଭଳି ତାପମାତ୍ରା ବୃଦ୍ଧି ପାଉଛି । ସମୁଦ୍ର ଉପରି ଭାଗରେ ବାୟୁ ଉତପ୍ତ ରହୁଥିବାରୁ ସ୍ଥଳ ଭାଗରେ ଏହାର ପ୍ରଭାବ ଦେଖିବାକୁ ମିଳୁଛି ।
୧୯୦୧ ପରେ ୨୦୧୬ରେ ଖରାଦିନେ ହାରାହାରି ତାପମାତ୍ରଠାରୁ ୧.୩୬ ଡିଗ୍ରୀ ସେଲସିଅସ ଅଧିକ ରହିଥିଲା । ଏବେ ଜାନୁଆରୀରେ ଅନୁଭୂତ ହୋଇଥିବା ଉତ୍ତାପ ଆଗକୁ ଆହୁରି ବଢିବ ବୋଲି ସଂକେତ ମିଳିସାରିଲାଣି ।