ବିଶ୍ୱ ଟେଷ୍ଟ ଚାମ୍ପିୟନସିପର ପଏଣ୍ଟ ଟେବୁଲର ଶୀର୍ଷରେ ଟିମ୍ ଇଣ୍ଡିଆ । ଦ୍ୱିତୀୟ ସ୍ଥାନରେ ପହଞ୍ଚିଲା ପଡୋଶୀ ପାକିସ୍ତାନ ।
କନକ ବ୍ୟୁରୋ : ବିଶ୍ୱ ଟେଷ୍ଟ ଚାମ୍ପିୟନସିପର ପଏଣ୍ଟ ତାଲିକାରେ ଏବେ ଶୀର୍ଷରେ ଟିମ୍ ଇଣ୍ଡିଆ । ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ ଜିତିବା ପରେ ପଏଣ୍ଟ ତାଲିକାର ଶୀର୍ଷକୁ ଉଠିଛି ବିରାଟ ବାହିନୀ । ଲଡର୍ସରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ଭାରତ ୧୫୧ ରନରେ ଇଂଲଣ୍ଡକୁ ମାତ୍ ଦେଇ ବିଜୟ ହାସଲ କରିଥିଲା । ଆଉ ଏହି ମ୍ୟାଚରେ ବିଜୟୀ ହୋଇ ଭାରତ ୧୨ ପଏଣ୍ଟ ହାସଲ କରିଥିଲା । ସେହିଭଳି ପ୍ରଥମ ମ୍ୟାଚ୍ ଡ୍ର ହେବା କାରଣରୁ ଭାରତକୁ ୪ ପଏଣ୍ଟ ମିଳିଥିଲା । ତେବେ ଭାରତକୁ ୧୬ ପଏଣ୍ଟ ବଦଳରେ ୧୪ ପଏଣ୍ଟ ମିଳିଛି । କାରଣ ସ୍ଲୋ ଓଭର ପାଇଁ ଟିମ୍ ଇଣ୍ଡିଆର ୨ ଅଙ୍କ କାଟି ଦିଆଯାଇଛି । ଏହାସତ୍ତେ୍ୱ ମଧ୍ୟ ଭାରତ ୧୪ ପଏଣ୍ଟ ପାଇଁ ତାଲିକାର ଶୀର୍ଷରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱ ଟେଷ୍ଟ ଚାମ୍ପିୟନସିପର ନିୟମ ଅନୁଯାୟୀ, ନିର୍ଦ୍ଧାରିତ ସମୟରୁ ଗୋଟିଏ ଓଭର ବି କମ ପକାଇଲେ ଟିମକୁ ଗୋଟିଏ ଅଙ୍କ ହରାଇବାକୁ ପଡିବ ।ସେହିଭଳି ପ୍ରତ୍ୟେକ ମ୍ୟାଚ୍ ବିଜୟୀ ହେଲେ ୧୨ ଅଙ୍କ, ଟାଇ ହେଲେ ୬ ଅଙ୍କ ଓ ଡ୍ର ହେଲେ ୪ ଅଙ୍କ ମିଳିବ । ସେହିଭଳି ପଏଣ୍ଟ ଟେବୁଲର ଦ୍ୱିତୀୟ ସ୍ଥାନରେ ଭାରତର ଚିର ପ୍ରତିଦ୍ୱନ୍ଦ୍ୱୀ ପାକିସ୍ତାନ ରହିଛି । ୱେଷ୍ଟଇଣ୍ଡିଜ ବିପକ୍ଷ ମ୍ୟାଚ୍ ଜିତିବା ପରେ ପାକିସ୍ତାନ ପଏଣ୍ଟ ଟେବୁଲର ଦ୍ୱିତୀୟ ସ୍ଥାନକୁ ଉଠିଛି । ସେହିଭଳି ତୃତୀୟ ସ୍ଥାନରେ ୱେଷ୍ଟଇଣ୍ଡିଜ ଓ ଚତୁର୍ଥ ସ୍ଥାନରେ ଇଂଲଣ୍ଡ ରହିଛି । ଭାରତ ବିପକ୍ଷରେ ଇଂଲଣ୍ଡ ପ୍ରଥମ ମ୍ୟାଚ୍ ଡ୍ର କରିଥିଲେ ସୁଦ୍ଧା ସ୍ଲୋ ଓଭର ପାଇଁ ୨ ପଏଣ୍ଟ ହରାଇଛି । ଏବେ ମାତ୍ର ୨ ପଏଣ୍ଟ ସହ ଭାରତ ପଏଣ୍ଟ ଟେବୁଲର ଚତୁର୍ଥ ସ୍ଥାନରେ ରହିଛି । ଅନ୍ୟ ଟିମ୍ ଯେହେତୁ କୌଣସି ସିରିଜ ଏଯାବତ୍ ଖେଳିନାହାନ୍ତି ତେଣୁ ପଏଣ୍ଟ ଟେବୁଲରେ ସାମିଲ ହୋଇନାହାନ୍ତି । ତେବେ ଇଂଲଣ୍ଡ ବିପକ୍ଷ ତୃତୀୟ ଟେଷ୍ଟରେ ବିଜୟୀ ହୋଇ ପଏଣ୍ଟ ଟେବୁଲର ଶୀର୍ଷ ସ୍ଥାନରେ ନିଜର ଦାବିଦାର ଆହୁରି ଦୃଢ କରିବାକୁ ଭାରତ ପାଖରେ ସୁଯୋଗ ରହିଛି ।