ଭାରତରେ ବିଶ୍ୱର ସବୁଠାରୁ ବଡ ଟିକାକରଣ ପ୍ରକ୍ରିୟା । ପ୍ରାଥମିକ ପାର୍ଯ୍ୟାୟରେ ପ୍ରାୟ ୩୦ କୋଟି ଲୋକଙ୍କୁ ଦିଆଯିବ ଟିକା ।
କନକ ବ୍ୟୁରୋ : ଭାରତର ୧୩୦ କୋଟି ଲୋକଙ୍କ ମଧ୍ୟରୁ ପ୍ରାଥମିକ ପାର୍ଯ୍ୟାୟରେ ପ୍ରାୟ ୩୦ କୋଟି ଲୋକଙ୍କୁ ଦିଆଯିବ ଟିକା । ଯାହାକି ବିଶ୍ୱର ସବୁଠୁ ବଡ ଟିକାକରଣ ପ୍ରକ୍ରିୟା । କାରଣ ସମଗ୍ର ବିଶ୍ୱରେ କରୋନା ସଂକ୍ରମଣରେ ଆମେରିକା ପରେ ଦ୍ୱିତୀୟ ସ୍ଥାନରେ ରହିଛି ଭାରତ । ଏକ କୋଟିରୁ ଅଧିକ ଲୋକ କରୋନାରେ ସଂକ୍ରମିତ ହୋଇଛନ୍ତି । ଏପରି ସ୍ଥିତିରେ ଲୋକଙ୍କ ପାଖରେ କିପରି ଟିକା ପହଂଚିବ ତାକୁ ପ୍ରାଥମିକତା ଦେଉଛନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ଯଦି ଆମେରିକା ସହିତ ଏହି ଟିକାକରଣ ପ୍ରକ୍ରିୟାକୁ ତୁଳନା କରାଯାଏ ତେବେ ଭାରତ ବେଶ ଯୋଜନାବଦ୍ଧ ଭାବେ ଏହି କ୍ଷେତ୍ରରେ ଆଗଉଛି । ଟିକାକରଣ ଆରମ୍ଭ ହେବା ପୂର୍ବରୁ ସାରାଭାରତରେ ଚାଲିଛି ଡ୍ରାଏ ରନ । ଡ୍ରାଏ ରନ ବା ଡ୍ରିଲ ଚାଲିଥିବା ସମୟରେ ପ୍ରକ୍ରିୟାରେ ଥିବା ତ୍ରୁଟିକୁ ଖୋଜି ବାହାର କରାଯାଉଛି ଯାହା ଫଳରେ ଟିକାକରଣ ଯେପରି ସଫଳ ହୋଇପାରିବ ସେ ଦିଗରେ ସରକାର ବେଶ ଯତ୍ନବାନ ଅଛନ୍ତି । ଟିକାକରଣ ବୁଥରେ ଉଚିତ ତାପମାତ୍ରାରେ କିପରି ଟିକା ପହଂଚି ପାରିବ ସେନେଇ ପ୍ରୟାସ ଜାରି ରହିଛି ।
କିନ୍ତୁ ସଂକ୍ରମଣରେ ପ୍ରଥମ ସ୍ଥାନରେ ରହିଥିବା ଆମେରିକାରେ ଟିକାକରଣ ଆରମ୍ଭ ହୋଇଥିଲେ ମଧ୍ୟ ଏତେଟା ବ୍ୟବସ୍ଥିତ ହୋଇଥିବା ଜଣାପଡୁନାହିଁ । ବିଶେଷଜ୍ଞମାନେ ଆକଳନ କରୁଛନ୍ତି, ପୁରା ଟିକାକରଣ ପ୍ରକ୍ରିୟା ଆମେରିକାରେ ଶେଷ କରିବା ପାଇଁ ବର୍ଷ ବର୍ଷ ସମୟ ଲାଗିଯିବ । କାରଣ ଆମେରିକା ସରକାର ସେପରି କିଛି ଯୋଜନା ନକରି ଟିକାକରଣ ଆରମ୍ଭ କରିଦେଇଛନ୍ତି ।
ଏ ଦୃଶ୍ୟ ହେଉଛି ଫ୍ଲୋରିଡାର । ଥଣ୍ଡା କାକରରେ ଲୋକେ କୋଭିଡ ଟିକା ନେବା ପାଇଁ ଲମ୍ବା ଲାଇନରେ ଛିଡା ହୋଇଛନ୍ତି । ଏପଟେ କାଲିଫଣ୍ଣିଆରେ ହସ୍ପିଟାଲ ଗୁଡିକରେ ଆବଶ୍ୟକ ଡାକ୍ତର ଏବଂ ସ୍ୱାସ୍ଥ୍ୟକର୍ମୀ ନାହାନ୍ତି ଟିକାକରଣ ପ୍ରକ୍ରିୟାରେ କାମ କରିବା ପାଇଁ । ଯାହାକି ଚିନ୍ତାଜନକ ବିଷୟ ହୋଇଛି ।
ସବୁଠୁ ବଡ ସମସ୍ୟା ସୃଷ୍ଟି ହୋଇଛି ଟିକାର ପରିବହନକୁ ନେଇ । ସ୍ଥିତି ଏପରି ହୋଇଛି ଯେ ଯିଏ ଟିକା ପାଇଗଲା ସେ ନିଜକୁ ଭାଗ୍ୟବାନ ବୋଲି ମନେ କରୁଛି । ଏପରି ସ୍ଥିତିରେ ସବୁଠୁ ବଡ ପ୍ରଶ୍ନ ହୋଇଛି ଆମେରିକାରେ ଟିକା ଆବଶ୍ୟକ କରୁଥିବା ଲୋକଙ୍କ ପାଖରେ ପହଂଚିପାରିବ ତ ଟିକା ।