ପୂର୍ବତନ ପାକିସ୍ତାନ ଅଧିନାୟକଙ୍କ ଭବିଷ୍ୟବାଣୀ । ଟି-୨୦ ବିଶ୍ୱକପ ଟାଇଟଲର ପ୍ରବଳ ଦାବିଦାର ଟିମ୍ ଇଣ୍ଡିଆ, ଭାରତ-ପାକିସ୍ତାନ ମ୍ୟାଚକୁ ନେଇ କହିଲେ ଏମିତି କଥା ।
କନକ ବ୍ୟୁରୋ : ଅକ୍ଟୋବର ୨୪ । ଟି-୨୦ ବିଶ୍ୱକପରେ ମୁହାଁମୁହିଁ ହେବେ ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ । ଭାରତ-ପାକିସ୍ତାନ ମଧ୍ୟରେ ହେବାକୁ ଥିବା ଏହି ମୁକାବିଲାକୁ ପୂରା ବିଶ୍ୱ କ୍ରିକେଟ ଚାହିଁ ବସିଛି । ତେବେ ଏହି ମ୍ୟାଚ୍ ପୂର୍ବରୁ ପାକିସ୍ତାନର ପୂର୍ବତନ ଅଧିନାୟକ ଇଞ୍ଜାମାମ୍ ଉଲ ହକ୍ ଏକ ବଡ ଭବିଷ୍ୟବାଣୀ କରିଛନ୍ତି । ଚଳିତ ଟି-୨୦ ବିଶ୍ୱକପରେ ଟିମ୍ ଇଣ୍ଡିଆ ଟାଇଟଲ ଜିତିବାର ପ୍ରବଳ ଦାବିଦାର ରହିଛନ୍ତି । ୟୁଏଇର ପିଚ୍ ଓ ପରିସ୍ଥିତି ଭାରତକୁ ବେଶ ସୁହାଇବ, ଏଭଳି କ୍ଷେତ୍ରରେ କୋହଲିଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ ବିଶ୍ୱକପ୍ ବିଜୟୀ ହେବାର ପ୍ରବଳ ଦାବିଦାର ରହିଛି ।
Kanak News is now on WhatsApp
Join and get latest news updates delivered to you via WhatsApp
ନିଜ ୟୁଟ୍ୟୁବ୍ ଚ୍ୟାନେଲରେ ଇଞ୍ଜାମାମ କହିଛନ୍ତି, ଅଷ୍ଟ୍ରେଲିଆ ବିପକ୍ଷ ଅଭ୍ୟାସ ମ୍ୟାଚକୁ ବେଶ ସହଜରେ ଜିତିଥିଲା ଟିମ୍ ଇଣ୍ଡିଆ । ଉପମହାଦେଶୀୟ ପିଚରେ ଟିମ୍ ଇଣ୍ଡିଆ ଟି-୨୦ରେ ସବୁଠୁ ଶକ୍ତିଶାଳୀ ଦଳ । ୧୫୫ ରନର ବିଜୟଲକ୍ଷ୍ୟକୁ ସହଜରେ ହାସଲ କରିଥିଲା ଟିମ୍ ଇଣ୍ଡିଆ ଓ ଏଥିପାଇଁ କୋହଲିଙ୍କ ବ୍ୟାଟିଂର ଆବଶ୍ୟକତା ମଧ୍ୟ ପଡିନଥିଲା । କୌଣସି ଟୁର୍ଣ୍ଣାମେଣ୍ଟରେ ଏହା ସ୍ପଷ୍ଟ ଭାବେ କୁହାଯାଇପାରିବ ନାହିଁ ଯେ, କିଏ ଚାମ୍ପିୟନ ହେବ?କିନ୍ତୁ ଦୁବାଇର ପରିସ୍ଥିତି ଓ ପରିବେଶକୁ ଦେଖିଲେ ଟିମ୍ ଇଣ୍ଡିଆ ଚାମ୍ପିୟନ ହେବାର ସମ୍ଭାବନା ଯଥେଷ୍ଟ ଅଧିକ ରହିଛି ।
ଇଞ୍ଜାମାମ୍ କହିଛନ୍ତି, ଟିମ୍ ଇଣ୍ଡିଆ ପାଖରେ ଦକ୍ଷ ଖେଳାଳୀ ରହିଛନ୍ତି । ଉଭୟ ବ୍ୟାଟିଂ ଓ ବୋଲିଂରେ ଦଳ ବେଶ ଶକ୍ତିଶାଳୀ । ଟୁର୍ଣ୍ଣାମେଣ୍ଟ ଆଗକୁ ବଢିବା ସହ ୟୁଏଇ ପିଚ୍ ସ୍ପିନ ବୋଲିଂକୁ ସୁହାଇବ । ଏଭଳି କ୍ଷେତ୍ରରେ ଭାରତ ପାଖରେ ଅଶ୍ୱିନୀ ଓ ଜାଡେଜାଙ୍କ ଭଳି ଅନୁଭବୀ ସ୍ପିନର ରହିଛନ୍ତି । ଏହାସହ ଭାରତୀୟ ବ୍ୟାଟସମ୍ୟାନ୍ ସ୍ପିନକୁ ବେଶ ଭଲ ଭାବେ ଖେଳନ୍ତି । ତେଣୁ ଭାରତକୁ ଚଳିତ ବିଶ୍ୱକପରେ ଏତେଟା ଚ୍ୟାଲେଞ୍ଜର ସମ୍ମୁଖୀନ ହେବାକୁ ନ ପଡିପାରେ ।
ଅନ୍ୟପଟେ ଭାରତ-ପାକିସ୍ତାନ ମୁକାବିଲାକୁ ନେଇ ଇଞ୍ଜାମାମ କହିଛନ୍ତି, ୨୪ ଅକ୍ଟୋବରରେ ହେବାକୁ ଥିବା ମୁକାବିଲା ଫାଇନାଲ ପୂର୍ବରୁ ଫାଇନାଲ । ୨୦୧୭ ଚାମ୍ପିୟନ୍ସ ଟ୍ରଫିରେ ମଧ୍ୟ ଭାରତ-ପାକିସ୍ତାନ ପରସ୍ପରକୁ ସାମ୍ନା କରିବା ଟୁର୍ଣ୍ଣାମେଣ୍ଟରେ ଯାତ୍ରା ଆରମ୍ଭ କରିଥିଲେ ଫାଇନାଲ ଖେଳି ଯାତ୍ରା ଶେଷ କରିଥିଲେ । ଭାରତ-ପାକିସ୍ତାନ ମଧ୍ୟରେ ଖେଳଯାଇଥିବା ଉଭୟ ମ୍ୟାଚ୍ ଫାଇନାଲ ମୁକାବିଲା ଭଳି ଥିଲା । ଏସବୁ ଭିତରେ ଭାରତ-ପାକିସ୍ତାନ ମଧ୍ୟରେ ଖେଳାଯିବାକୁ ଥିବା ମୁକାବିଲାକୁ ଜିତି ମନୋବଳ ବଢାଇବାକୁ ଚାହିଁବେ ଉଭୟ ଟିମ୍ । କାରଣ ଏହି ମ୍ୟାଚ୍ ଜିତିବା ଦ୍ୱାରା ବିଜୟୀ ଟିମ୍ ଉପରୁ ୫୦ ପ୍ରତିଶତ ଭଳି ଚାପ କମିପାରେ ବୋଲି କହିଛନ୍ତି ଇଞ୍ଜାମାମ୍ ।
ବିଶ୍ୱକପ ମୁକାବିଲାରେ ଏଯାଏଁ ପାକିସ୍ତାନ ଠାରୁ ହାରିନାହିଁ ଭାରତ । ଉଭୟ ଦଳ ମଧ୍ୟରେ ୧୨ଟି ମୁକାବିଲା ଖେଳାଯାଇଥିବା ବେଳେ ସବୁ ମ୍ୟାଚରେ ବାଜି ମାରିଛି ଟିମ୍ ଇଣ୍ଡିଆ ।