ସୀମାରୁ ମିଳୁଛି ସାଂଘାତିକ ସଂକେତ । ଭାରତ-ଚୀନ ସୀମାନ୍ତ ଏଲଏସିରେ ଦୀର୍ଘ ଦିନ ଧରି ମୁହାଁମୁହିଁ ସ୍ଥିତିରେ ରହିପାରନ୍ତି ସେନା । ଉଭୟ ପକ୍ଷ ବଢାଉଛନ୍ତି ସାମରିକ ବଳ, ଡୋକଲାମ୍ ଠାରୁ ବି ଅଧିକ ଦିନ ଚାଲିପାରେ ଛକାପଞ୍ଝା ।
କନକ ବ୍ୟୁରୋ: ସହଜରେ ଶେଷ ହେବ ନାହିଁ ଭାରତ – ଚୀନ ସୀମା ବିବାଦ । ଗତ ୨୫ଦିନରୁ ଅଧିକ ସମୟ ଧରି ଲଦାଖ ସୀମାରେ ଭାରତ ଓ ଚୀନ ସେନା ମୁହାଁମୁହିଁ ପରିସ୍ଥିତିରେ ରହିଛନ୍ତି । ଉଭୟ ପଟେ ସୈନ୍ୟ ବଳ ବଢାଯାଉଛି । ଅସ୍ତ୍ରଶସ୍ତ୍ର ଠୁଳ କରାଯାଉଛି । ସୀମାରେ ଲାଗି ରହିଥିବା ଏହି ସମସ୍ୟାକୁ ନେଇ କେନ୍ଦ୍ର ସରକାର ମଧ୍ୟ ନିଜ ନିଷ୍ପତିରେ ଅଟଳ ଅଛନ୍ତି । ଯଦି ସୀମାରେ ଚୀନ ନିଜ ଗତିବିଧି ନ ବଦଳାଇବ, ଭାରତ ତାର ଉତର ଦେବାକୁ ପ୍ରସ୍ତୁତ ଅଛି । ଆଉ ଏସବୁ ଦେଖି ଲାଗୁଛି ଏ ସମସ୍ୟାର ସମାଧାନ ଏତେ ସହଜରେ ହେବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଲଦାଖ ସୀମାର ଏହି ୪ଟି ସ୍ଥାନରେ ଗତ ୨୫ ଦିନରୁ ଅଧିକ ସମୟ ଧରି ମୁହାଁମୁହିଁ ପରିସ୍ଥିତିରେ ରହିଛନ୍ତି ଭାରତୀୟ ଓ ଚୀନ ସେନା । ଆଉ ଏହି ସମସ୍ୟା ଏତେ ଶୀଘ୍ର ଶେଷ ହେବା ପରି ମନେ ହେଉ ନାହିଁ । ଚୀନ ନିଜ ପଟ ସୀମାରେ ପାଖାପାଖି ୬ହଜାର ସେନା ମୁତୟନ କରି ସାରିଲାଣି । ସେପଟେ ତିବତ ସୀମାରେ ଥିବା ନିଜ ଏୟାରବେସ୍କୁ ମଧ୍ୟ ସଂପ୍ରସାରଣ କରିବାରେ ଲାଗିଛି । ଏପଟେ ଭାରତ ମଧ୍ୟ ଲଦାଖ ସୀମାରେ ନିଜ ସେନା ଠୁଳ କରିବାରେ ଲାଗିଛି । ଭାରତ ସୀମାରେ ନିଜ ଭିତିଭୂମି ସୁଦୃଢ କରିବାରେ ଲାଗିଛି । ଆଉ ଏହାକୁ ସହ୍ୟ କରି ପାରୁନି ଚୀନ । ଡୋକଲାମ ସୀମାରେ ବିବାଦ ପରେ ଏବେ ଲଦାଖ ସୀମାରେ ଚୀନ ସହ ବିବାଦ ଅଧିକ ଦିନ ପର୍ଯ୍ୟନ୍ତ ଲାଗି ରହିବ ବୋଲି ପ୍ରତିରକ୍ଷା ବିଶେଷଜ୍ଞ ମାନେ ମତ ଦେଉଛନ୍ତି ।
ମେ ମାସ ଆରମ୍ଭରୁ ଲଦାଖ ସୀମାରେ ଉଭୟ ସେନାଙ୍କ ଭିତରେ ବିବାଦ ଧିରେ ଧିରେ ଆରମ୍ଭ ହୋଇଥିଲା ।
ମେ’ ୫, ପୋଙ୍ଗୟାଙ୍ଗ ହ୍ରଦ
ପାଟ୍ରୋଲିଂ ପାଇଁ ଯାଇଥିବା ଭାରତୀୟ ଯବାନଙ୍କ ବାଟ ଓଗାଳିଥିଲା ଡ୍ରାଗନ୍ ସେନା । ଭାରତୀୟ ଯବାନ ପ୍ରଶ୍ନ କରିଥିଲେ, କିପରି ଚୀନ ସେନା ଏଲଏସି ବା ପ୍ରକୃତ ନିୟନ୍ତ୍ରଣ ରେଖା ପାର କରି ତାଙ୍କ ଅଂଚଳକୁ ଆସିଛି । ସେପଟେ ଚୀନ ସେନା ଦାବି କରିଥିଲା ସେ ସ୍ଥାନ ଚୀନର ।
ମେ’ ୬, ନାକୁ ଲା, ଉତ୍ତର ସିକିମ
ସୀମାରେ ଭାରତ ଓ ଚୀନ ସେନା ମଧ୍ୟରେ ମୁହାଁମୁହିଁ ଏପରି କି ହାତାହାତିର ଦୃଶ୍ୟ ସାମ୍ନାକୁ ଆସିଲା । ପାଟ୍ରୋଲିଂ ପାଇଁ ଯିବା ସମୟରେ ଉଭୟ ସେନା ମଧ୍ୟରେ ଝଗଡା ହୋଇଥିବା ଜଣା ପଡିଥିଲା ।
ମେ’ ୧୨, ଲଦାଖ
ଚୀନ ସେନାର ହେଲିକପ୍ଟର ପ୍ରକୃତ ନିୟନ୍ତ୍ରଣ ରେଖାର ଅତି ନିକଟରେ ଉଡିବାର ଦେଖିବାକୁ ମିଳିଲା । ଏହାର ଯବାବ ଦେବାକୁ ଯାଇ ସୀମାରେ ଭାରତୀୟ ବାୟୁସେନାର ଲଢୁଆ ବିମାନ ପାଟ୍ରୋଲିଂ କରିବା ସହ ଚୀନ ହେଲିକପ୍ଟରକୁ ଘଉଡାଇତିଲା ।
ସେନାମୁଖ୍ୟ ଜେନେରାଲ ମନୋଜ ନରଭଣେ, ଲେହ ସ୍ଥିତ ମୁଖ୍ୟାଳୟ ଭ୍ରମଣ କରିବା ସହ ଲଦାଖ ସୀମାରେ ଲାଗି ରହିଥିବା ବିବାଦ ସମୟରେ ତଦାରଖ କରିଥିଲେ ।
ମେ’ ୨୬, ବେଜିଙ୍ଗ
ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ଧମକ । କୌଣସି ବି ପରିସ୍ଥିତିରେ ଚୀନ ସେନା ଯୁଦ୍ଧ ପାଇଁ ପ୍ରସ୍ତୁତ ବୋଲି ପରୋକ୍ଷ ଭାବେ ଭାରତକୁ ଧମକାଇଥିଲେ ଜିନ୍ପିଙ୍ଗ ।
ମେ’ ୨୬, ନୂଆ ଦିଲ୍ଲୀ
ସୀମା ପରିସ୍ଥିତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜରୁରୀ କାଳୀନ ବୈଠକ । ଜାତୀୟ ସୁରକ୍ଷା ଅଧିକାରୀ ଅଜିତ୍ ଡୋଭାଲ, ବିଦେଶ ମନ୍ତ୍ରୀ ଏସ୍ ଜୟଶଙ୍କର ଏବଂ ତିନି ସେନା ପ୍ରମୁଖଙ୍କ ସହ ପ୍ରଧାନମନ୍ତ୍ରୀଙ୍କ ଆଲୋଚନା ।
ଜୁନ୍ ୧, ଲଦାଖ
ଚୀନର ଲଢୁଆ ବିମାନ ଲଦାଖ ସୀମାର ଅତି ନିକଟରେ ଉଡିଲା ।
ଏହାରି ଭିତରେ ବେଜିଙ୍ଗ ପ୍ରଥମ ଥର ପାଇଁ ସୀମା ବିବାଦକୁ ନେଇ ଜବାବ ରଖିଛି । ଚୀନ ବିଦେଶ ମନ୍ତ୍ରାଳୟର ମୁଖପାତ୍ର ଜାହୋ ଲିଜିଆନ୍ ସାମ୍ବାଦିକ ସମ୍ମିଳନୀକୁ ସମ୍ବୋଧନ କରି କହିଛି, ସୀମାରେ ସ୍ଥିତି ସ୍ଥିର ରହିଛି ।