ଫେରିବ କହି ଫେରିଲନି… ବାପା ! ତମେ ମତେ କେମିତି ଠକି ପାରିଲ…? ସୀମାରେ ସହିଦ ହେବା ପରେ ବାପାର ଫଟୋକୁ ଦେଖି ଅଭିମାନରେ କୁନି ଝିଅ ପଚାରିଲା ପ୍ରଶ୍ନ । ବାପ-ଝିଅର ଫଟୋ ଦେଖି ସୋସିଆଲ ମିଡିଆରେ ଭାବୁକ ହେଲେ ଲୋକେ…
କନକ ବ୍ୟୁରୋ: ବାପା ! ମୁଁ ତମ ଉପରେ ରାଗିଛି… ତମ ସହ ଜମା କଥା ହେବିନି… କହିଥିଲ ନା ଧନ ଲୋ’ କରୋନା ପଳେଇଲେ ମୁଁ ଘରକୁ ଯିବି ଆଉ ତୋ ସହ ଦିନରାତି ଖେଳିବି । ମୋ ସୁନା ଝିଅଟା ପରା ଆଉ କିଛି ଦିନ ରହିଯା, ତୋ ପାଇଁ ସବୁ ନେଇକି ଯିବି… ତମ କଥା ମାନି ମୁଁ ମନକୁ ବୁଝେଇଦେଲି । କହିଥିଲ ସୀମାରୁ ଫେରିଲା ବେଳେ ସାଙ୍ଗରେ କେତେ କଣ ଆଣିବ । ମୋ ଫେବରାଇଟ୍ ଡଲ୍, ମୋ ପାଇଁ ନୂଆ ଡ୍ରେସ ଆଉ ମେଞ୍ଚା ମେଞ୍ଚା ଚକଲେଟ୍ । ହେଲେ ଆଜି ଜାଣିଲି ସେଦିନ ତମେ ମିଛ କହିଥିଲ… ସୀମାରେ ଲଢୁ ଲଢୁ ସହିଦ ହୋଇଗଲ । ମା କହୁଥିଲା ସେଠୁ କାଳେ ଆଉ କେହି ଫେରନ୍ତିନି… ସତରେ ବାପା ତମେ କଣ ମତେ ଠକି ଦେଲ…
Kanak News is now on WhatsApp
Join and get latest news updates delivered to you via WhatsApp
ସୀମାରେ ସହିଦ ହୋଇଥିବା ବାପାକୁ ଶେଷ ଶ୍ରଦ୍ଧାଞ୍ଜଳି ଦେଲା ବେଳେ ହୁଏତ ଅଭିମାନରେ ଏମିତି କିଛି କଥା କହୁଥାଇପାରେ ଏ କୁନି ଝିଅ । ଜୀବନ କଣ ଜାଣିନଥିବା ଏ କଅଁଳ କଢି କିନ୍ତୁ ମୃତ୍ୟୁକୁ ଧିରେ ଧିରେ ବୁଝୁଛି । କାରଣ ତା ବାପା ସହିଦ ହୋଇଛନ୍ତି । ଚୀନର ଚକ୍ରବ୍ୟୁହରେ ଫସି ଶେଷ ରକ୍ତ ବିନ୍ଦୁ ଥିବା ଯାଏ ଶତ୍ରୁ ସହ ଲଢେଇ କରିଛନ୍ତି । ଆଉ ମାଟି ମାଆ ପାଇଁ ପ୍ରାଣବଳୀ ଦେଇଛନ୍ତି । ବୋଧେ ସେଇଥି ପାଇଁ ଦୀପଟିଏ ଜାଳି କୁନି ହାତରେ ତା ବାପାଙ୍କୁ ଶେଷ ସଲାମ ଜଣାଉଛି ।
ଲଦ୍ଦାଖ ଗଲୱାନ ଘାଟିରେ ଡ୍ରାଗନ ସେନା ସହ ମୁହାଁମୁହିଁ ହୋଇ କମାଣ୍ଡିଂ ଅଫିସର ସନ୍ତୋଷ ବାବୁ ସହିଦ ହେବା ପରେ ତେଲେଙ୍ଗାନା ସ୍ଥିତ ତାଙ୍କ ଘରେ ଶୋକାକୂଳ ପରିବେଶ ସୃଷ୍ଟି ହୋଇଛି । ପୁଅକୁ ହରାଇ ବାପାମାଆ ସ୍ଥାଣୁ ପାଲଟିଥିବା ବେଳେ ସୀମାରେ ଲିଭିଛି ସ୍ତ୍ରୀର ସିନ୍ଦୂର । ଆଉ ସ୍ୱାମୀ ସହିଦ ହେବା ପରେ ଲୁହ ନିଗାଡି ଭାଗ୍ୟକୁ ନିନ୍ଦୁଛି ସ୍ତ୍ରୀ । ସେପଟେ ବାପା ଆଉ ଏ ଦୁନିଆରେ ନଥିବା କଥା ଜାଣିପାରୁନି କୁନି ପୁଅ । କିନ୍ତୁ ଏ ଝିଅ ବୁଝିଛି ତା ବାପା ଆଉ ସୀମାରୁ ଫେରିବେନି ବୋଲି । ବାପାକୁ ଶେଷ ପ୍ରଣାମ ଦେଲା ବେଳେ ସୋସିଆଲ ମିଡିଆରେ ଭାଇରାଲ ହେଉଥିବା ଏ ଲୁହଭିଜା ଫଟୋ ସମସ୍ତଙ୍କୁ କନ୍ଦାଇ ଦେଇଛି…
ସେପଟେ ସୀମାରେ ଓଡିଆ ପୁଅ ସହିଦ ହେବା ପରେ ଲୁହରେ ଓଦା ହୋଇଛି ରାଇରଙ୍ଗପୁର ବଡଚମ୍ପାଉଦା ଗାଁ । ବୀର ପୁଅକୁ ହରାଇ ଗାଁ କାନ୍ଦୁଛି ତ ସ୍ୱାମୀଟକୁ ହରାଇ ସ୍ତ୍ରୀ । ଆଉ ବାପା ପ୍ରାଣବଳୀ ଦେବା ପରେ ବାପ ଛେଉଣ୍ଡ ହୋଇଛନ୍ତି ସହିଦ ଯବାନ ନନ୍ଦୁରାମ ସୋରେନଙ୍କ ୩ ଝିଅ । ଜୀବନକୁ ନେଇ ଦେଖିଥିବା ପିଲାଙ୍କ ସବୁ ସ୍ୱପ୍ନକୁ ସତ କରୁଥିଲେ ବାପା, ହେଲେ ସେ ଆଖିବୁଜିବା ପରେ ଏବେ ଭାଙ୍ଗିପଡିଛନ୍ତି ୩ ଝିଅ । ଜଣେ ଝିଅ ନବମରେ, ଜଣେ ଷଷ୍ଠରେ ଆଉ ଜଣେ ପ୍ରଥମ ପଢୁଥିବା ବେଳେ ବାପା ସହିଦ ହେବା ପରେ ବାକଶୂନ୍ୟ ହୋଇଛନ୍ତି ସମସ୍ତେ ।
ବର୍ଡରରୁ ଆସିଥିବା ଖବର ହୁଏତ ଏ ପିଲାଙ୍କ ମୁଣ୍ଡରେ ବାପ ଛେଉଣ୍ଡର ଟ୍ୟାଗ ଲଗେଇ ଦେଇଛି । ହେଲେ ଏମାନେ କିନ୍ତୁ ଦୁଃଖ ଭିତରେ ବି ସବୁଦିନ ପାଇଁ ଗର୍ବରେ ବଞ୍ଚିବେ । କାରଣ ତାଙ୍କ ବାପା ଦେଶ ପାଇଁ ଜୀବନ ଦେଇଛନ୍ତି, ମାଟି ମାଆ ପାଇଁ ସହିଦ ହୋଇଛନ୍ତି…