ପୁଣି ଲଜ୍ଜିତ ହେଲା ପାକିସ୍ତାନ । ମିଳିତ ଜାତିସଂଘରେ ପାକିସ୍ତାନ ପ୍ରଧାନମନ୍ତ୍ରୀଙ୍କ ଅଭିଭାଷଣକୁ ବର୍ଜନ କଲା ଭାରତ, ଇମ୍ରାନଙ୍କ ଅଭିଭାଷଣ ଆରମ୍ଭ ହେବା ମାତ୍ରେ କକ୍ଷତ୍ୟାଗ କଲେ ଭାରତୀୟ ପ୍ରତିନିଧୀ
କନକ ବ୍ୟୁରୋ : ମିଳିତ ଜାତିସଂଘରେ ପାକିସ୍ତାନ ପ୍ରଧାନମନ୍ତ୍ରୀଙ୍କ ଅଭିଭାଷଣକୁ ବର୍ଜନ କଲା ଭାରତ । ଇମ୍ରାନ୍ ଖାନଙ୍କ ଏହି ଅଭିଭାଷଣ ଆରମ୍ଭ ହେବା ମାତ୍ରେ ଭାରତୀୟ ପ୍ରତିନିଧି ମିଳିତ ଜାତିସଂଘ କକ୍ଷତ୍ୟାଗ କରି ନିଜର ବିରୋଧ ପ୍ରଦର୍ଶନ କରିଛନ୍ତି । ନ୍ୟୁୟର୍କରେ ଚାଲିଥିବା ମିଳିତ ଜାତିସଂଘର ୭୫ ତମ ଅଧିବେଶନରେ ଏଥର ଇମ୍ରାନ୍ ଖାନ୍ ଅଭିଭାଷଣ ରଖିବା ସମୟରେ ଭାରତ ସମ୍ପର୍କରେ ଟିପ୍ପଣୀ କରିବାକୁ ଭୁଲି ନଥିଲେ ।
Kanak News is now on WhatsApp
Join and get latest news updates delivered to you via WhatsApp
ସବୁଥର ପରି ଏଥର ବି ଇମ୍ରାନ୍ ଖାନ୍ ଭାରତକୁ କାଶ୍ମୀର ପ୍ରସଙ୍ଗ, ଆତଙ୍କବାଦ ନେଇ ଘେରିବାକୁ ଏକ ବିଫଳ ଉଦ୍ୟମ କରିଥିଲେ । ମିଳିତ ଜାତିସଂଘରେ ଏହାର କଡା ଜବାବ ଦେଇଛି ଭାରତ । ଜାତିସଂଘକୁ ଥିବା ଭାରତୀୟ ପ୍ରତିନିଧି ଟିଏସ ନ୍ୟାୟମୂର୍ତି ପାକିସ୍ତାନ ପ୍ରଧାନମନ୍ତ୍ରୀଙ୍କ ଭାଷଣକୁ କୂଟନୈତିକ ସ୍ତରରେ ଅତି ନିମ୍ନମାନର ବୋଲି କହିଛନ୍ତି । ପାକ୍ ପ୍ରଧାନମନ୍ତ୍ରୀଙ୍କ ବୟାନରେ ମିଛ, ବ୍ୟକ୍ତିଗତ ଆକ୍ରୋଶ ଭରା । ପାକିସ୍ତାନ ତା ମାଟିରେ ସଂଖ୍ୟାଲଘୁଙ୍କ ଉପରେ ଅତ୍ୟାଚାର ଏବଂ ସୀମାରେ ଆତଙ୍କବାଦକୁ ନଦେଖି ଭାରତ ଉପରେ ଟିପ୍ପଣୀ ରହିଛି । ଏସବୁ ଅତି ନିମ୍ନମାନର କୂଟନୀତି ବୋଲି ଭାରତ କହିଛି ।
ଏହା ସହିତ ଭାରତ କହିଛି ବିଶ୍ୱରେ ଯେଉଁ ଦେଶକୁ ଆତଙ୍କବାଦୀଙ୍କ ପାଳନ କେନ୍ଦ୍ର ବୋଲି ଜଣାଯାଏ, ତାହା ଠାରୁ ମାନବାଧିକାର ନେଇ କିଛି ଶିକ୍ଷା କରିବାର ନାହିଁ । ସେହିପରି ଭାରତର ସ୍ଥାୟୀ ମିଶନର ପ୍ରଥମ ସଚିବ ସିନ୍ଥିଲ କୁମାର ପାକିସ୍ତାନ ଆଣିଥିବା ସବୁ ଅଭିଯୋଗ ମିଥ୍ୟା ଓ ଅମୂଳକ ବୋଲି କହିଛନ୍ତି । ଏପରି ବିଶ୍ୱ ମଂଚକୁ ପାକିସ୍ତାନ କେବଳ ଭାରତକୁ ଅପମାନ କରିବାକୁ ବ୍ୟବହାର କରିଥାଏ ବୋଲି ସେ କହିଛନ୍ତି ।