ଟି-୨୦ ବିଶ୍ୱକପରେ ଅଷ୍ଟ୍ରେଲିଆକୁ ହରାଇଲା ଭାରତ । ଅଧିନାୟକ ରୋହିତ ଶର୍ମାଙ୍କ ବିସ୍ଫୋରକ ଇନିଂସ ।

କନକ ବ୍ୟୁରୋ: ଟି-୨୦ ବିଶ୍ୱକପ୍ ସେମି ଫାଇନାଲରେ ଭାରତ । ଅଷ୍ଟ୍ରେଲିଆକୁ ହରାଇ ଦିନିକିଆ ବିଶ୍ୱକପର ବଦଲା ନେଲା ଟିମ୍ ଇଣ୍ଡିଆ । ଅଧିନାୟକ ରୋହିତ ଶର୍ମାଙ୍କ ବିସ୍ଫୋରକ ଇନିଂସ ପରେ ବୋଲରଙ୍କ ମାପଚୁପ ବୋଲିଂ ବଳରେ ରୋମାଞ୍ଚକର ମୁକାବିଲା ବାଜି ମାରିଲା ଭାରତ । ଅଷ୍ଟ୍ରେଲିଆକୁ ୨୪ ରନରେ ହରାଇ ୨୦୨୩ ଦିନିକିଆ ବିଶ୍ୱକପ୍ ଫାଇନାଲର ମଧୁର ପ୍ରତିଶୋଧ ନେଇଛନ୍ତି ରୋହିତ ବାହନୀ । ଏହି ବିଜୟ ସହ ଭାରତ ଗ୍ରୁପ୍-୧ରୁ ପ୍ରଥମ ଦଳ ଭାବେ ସେମି ଫାଇନାଲକୁ ପ୍ରବେଶ କରିଛି ।

ଅନ୍ୟପଟେ ପରାଜୟ ପରେ ଅଷ୍ଟ୍ରେଲିଆର ସେମି ଫାଇନାଲ ଯିବା ମୁସ୍କିଲ ହୋଇ ଯାଇଛି । ପ୍୍ରଥମ ବ୍ୟାଟିଂ କରି ଭାରତ ରୋହିତ ଶର୍ମାଙ୍କ ଧୂଆଁଧାର ୯୨ ରନ ବଳରେ ୮ ୱିକେଟ୍ ହରାଇ ୨୦୫ ରନ କରିଥିଲା । ୨୦୬ ରନର ବିଜୟ ଲକ୍ଷ୍ୟ ପିଛା କରିଥିବା ଅଷ୍ଟ୍ରେଲିଆ ୭ ୱିକେଟ୍ ହରାଇ ୧୮୧ ରନରେ ସୀମିତ ରହିଥିଲା । କ୍ୟାପଟେନ୍ ରୋହିତ ଶର୍ମା ପ୍ଲେୟର୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ ।