ଭାରତ-ଅଷ୍ଟ୍ରେଲିଆ ମୁକାବିଲା: ଓପନିଂ କରିବେ ଇସାନ କିଶାନ!

କନକ ବ୍ୟୁରୋ: ରବିବାର ବିଶ୍ୱକପରେ ମୁହାଁମୁହିଁ ହେବେ ଭାରତ ଓ ଅଷ୍ଟ୍ରେଲିଆ । ଚେନ୍ନାଇର ଚିଦାମ୍ବରମ ଷ୍ଟାଡିୟମରେ ଦିନିକିଆ ରାଙ୍କିରେ ଏକ ନମ୍ବର ଦଳ ସହ ୩ ନମ୍ବର ଦଳ ମଧ୍ୟରେ ମ୍ୟାଚ ଖେଳାଯିବ । ଡେଙ୍ଗୁରେ ପୀଡିତ ଥିବା ଶୁଭମନ ଗିଲ ପୁରା ସୁସ୍ଥ ହୋଇନଥିରୁ ତାଙ୍କ ସ୍ଥାନରେ ଇସାନ କିଶାନଙ୍କୁ ଓପନିଂ କରିବା ନେଇ ସୂଚନା ମଳିଛି । ଅଧିନାୟକ ରୋହିତ ଶର୍ମାଙ୍କ ସହ ଇସାନ ଓପନିଂ କରିବେ । ବିରାଟ କୋହଲି, ଶ୍ରେୟସ ଆୟର, ଲୋକେଶ ରାହୁଲ, ହାର୍ଦିକ ପାଣ୍ଡ୍ୟା, ରବୀନ୍ଦ୍ର ଜାଡେଜାଙ୍କ ଭଳି ବ୍ୟାଟିଂ ଲାଇନଅପ ଭାରତ ପାଖରେ ଅଛି । ସେହିପରି ଅଷ୍ଟ୍ରେଲିଆର ଡେଭିଡ ୱାର୍ଣ୍ଣର, ଷ୍ଟିଭ ସ୍ମିଥ, ଟ୍ରାଭିସ୍ ହେଡ, ମିଚେଲ ମାର୍ସ, ଗ୍ଲେନ ମାକ୍ସୁଏଲ, କ୍ୟାମରନ ଗ୍ରୀନ, ଷ୍ଟୋଇନିସ୍ଙ୍କ ଭଳି ବ୍ୟାଟିଂ ଲାଇନ ଅପ ଅଛି । ତେଣୁ ମ୍ୟାଚରେ ବଡ଼ ସ୍କୋର ସହ ରୋମାଂଚକର ଖେଳ ଦେଖିବାକୁ ମିଳିବ ବୋଲି ଆଶାକରାଯାଉଛି ।

ଚେନ୍ନାଇ ଷ୍ଟାଡିୟମ ସ୍ପିନରଙ୍କୁ ସୁହାଉଥିବାରୁ ଭାରତ ଦୁଇଟି ସ୍ପିନର ବଦଳରେ ତିନି ଜଣଙ୍କୁ ନେଇ ପଡିଆକୁ ଓହ୍ଲାଇବ ବୋଲି କୁହାଯାଉଛି । ଟିମରେ ସାମିଲ ହୋଇଥିବା ରବିଚନ୍ଦ୍ରନ ଅଶ୍ୱୀନୀଙ୍କର ଏହା ହୋମ ଗ୍ରାଉଣ୍ଡ ହୋଇଥିବାରୁ ଅଶ୍ୱୀନୀଙ୍କୁ ଦଳରେ ସାମିଲ କରାଯାଇପାରେ । ସେହିପରି ଅଲରାଉଣ୍ଡର ସ୍ପିନର ରବୀନ୍ଦ୍ର ଜାଦେଜା ଏବଂ କୁଲଦୀପ ଯାଦବ ମଧ୍ୟ ଖେଳିବେ । ପେସ ବୋଲର ଭାବେ ଯଶପ୍ରିତ ବୁମ୍ରା ଏବଂ ମହମ୍ମଦ ସିରାଜ ଟିମରେ ରହିପାରନ୍ତି । ଅଷ୍ଟ୍ରେଲିଆର ଆଡମ ଜାମ୍ପାଙ୍କ ସହ ଷ୍ଟିଭ ସ୍ମିଥ, କ୍ୟାମରେନ ଗ୍ରୀନ, ଗ୍ଲେନ ମାକ୍ସୁଏଲଙ୍କ ଭଳି ସ୍ପିନର ଦଳରେ ଅଛନ୍ତି । ତେଣୁ ଉଭୟ ବ୍ୟାଟିଂ ଏବଂ ବୋଲିଂ କଡା ଟକ୍କର ଦେଖିବାକୁ ମିଳିବ ।

୨୦୨୦ରୁ ୨୦୨୩ ମଧ୍ୟରେ ଅଷ୍ଟ୍ରେଲିଆ ଇଣ୍ଡିଆ ମଧ୍ୟରେ ୬ ଟି ମ୍ୟାଚ ଖେଳଯାଇଥିବା ବେଳେ ଉଭୟ ୩ଟି ଲେଖାଏଁ ମ୍ୟାଚରେ ବିଜୟୀ ହୋଇଛନ୍ତି । ତେବେ କ୍ରିକେଟର ଦୁଇ ଚିର ପ୍ରତିଦ୍ୱନ୍ଦୀ ଅଷ୍ଟ୍ରେଲିଆ ଏବଂ ଇଣ୍ଡିଆ ମ୍ୟାଚ ଦେଖିବାକୁ ଉତ୍କଣ୍ଠାର ସହ ଅପେକ୍ଷା କରିଛନ୍ତି କ୍ରିକେଟ ପ୍ରେମୀ ।