ଆଇକ୍ୟୁ ଏୟାର ଜାରି କଲା ରିପୋର୍ଟ । ଭାରତ ତୃତୀୟ ସର୍ବାଧିକ ପ୍ରଦୂଷିତ ଦେଶ
କନକ ବ୍ୟୁରୋ : ମାନବ ସମାଜର ଅବହେଳା ଓ ଦିନକୁ ଦିନ ବଢୁଥିବା ମନୁଷ୍ୟକୃତ ପ୍ରଦୂଷଣ ଯୋଗୁଁ ଆମ ଅଜାଣତରେ ଆମ ପରିବେଶ ଖୁବ ଶୀଘ୍ର କ୍ଷୟ ହେବାରେ ଲାଗିଛି । ଆମେ ଅଣଦେଖା କରି ଆଗତ ଭୟାବହତାକୁ ଏଡାଇ ଦେଇ ପାରୁ, ସେ ନେଇ କିନ୍ତୁ କିଛି ଅନୁଷ୍ଠାନ ଆମକୁ ସର୍ବଦା ଚେତେଇ ଦେଉଛନ୍ତି । ସେମାନଙ୍କ ମଧ୍ୟରେ ରହିଛି ସ୍ୱିଡେନର ଏୟାର କ୍ୱାଲିଟି ଇଣ୍ଡେକ୍ସ୍ ।
Kanak News is now on WhatsApp
Join and get latest news updates delivered to you via WhatsApp
ଏହି ସଂସ୍ଥାର ବାର୍ଷିକ ରିପୋର୍ଟ ଅନୁଯାୟୀ ଚଳିତ ବର୍ଷ ଭାରତର ବାୟୁର ଗୁଣାତ୍ମକ ମାନ ଚିନ୍ତାଜନକ ପରିସ୍ଥିତି ସୃଷ୍ଟି କରିଛି । ଗତ ବର୍ଷ ଏୟାର କ୍ୱାଲିଟି ଇଣ୍ଡେକ୍ସରେ ଭାରତ ଅଷ୍ଟମ ସ୍ଥାନରେ ଥିବା ବେଳେ ଚଳିତ ବର୍ଷ ଏହା ଖସି ଆସି ତୃତୀୟରେ ପହଂଚିଛି । ଏହି ରିପୋର୍ଟ କେବଳ ପରିବେଶବିତ୍ ଓ ସରକାର ନୁହେଁ ସାଧାରଣ ଲୋକଙ୍କୁ ମଧ୍ୟ ଚିନ୍ତାରେ ପକାଉଛି ।
ମୋଟ ୧୩୪ଟି ଦେଶ ମଧ୍ୟରେ ବାଂଲାଦେଶର ବାୟୁର ମାନ ସବୁଠାରୁ ଖରାପ ହୋଇଥିବାରୁ ସେ ଏକ ନମ୍ବର ସ୍ଥାନରେ ରହିଛି । ଏହା ପଛକୁ ରହିଛି ପାକିସ୍ତାନ । ବାର୍ଷିକ ପି.ଏମ ୨.୫ର ହାରାହାରି ସାନ୍ଧ୍ରତା ବାଂଲାଦେଶରେ ୭୯.୯ କ୍ୟୁବିକ୍ ମିଟର, ପାକିସ୍ତାନରେ ୭୩.୭ କ୍ୟୁବିକ୍ ମିଟର ଥିବା ବେଳେ ଭାରତରେ ୫୪.୪ ରହିଛି । ୨୦୨୨ ବର୍ଷ ପି.ଏମ ୨.୫ର ସାନ୍ଧ୍ରତା ୫୩.୩ ସହ ଭାରତ ଅଷ୍ଟମ ସ୍ଥାନରେ ରହିଥିଲା । ଏହା ପରେ କ୍ରମାନ୍ୱୟରେ ତାଜିକିସ୍ତାନ୍ ଓ ବୁରକିନା ଫାସୋ ରହିଛନ୍ତି ।
ଖାଲି ଏତିକି ନୁହେଁ ଏୟାର କ୍ୱାଲିଟି ଇଣ୍ଡେକ୍ସ୍ ରିପୋର୍ଟ ଅନୁଯାୟୀ ସର୍ବାଧିକ ପ୍ରଦୂଷିତ ୫୦ ସହର ମାନଙ୍କ ମଧ୍ୟରେ ସର୍ବାଧିକ ସହର ଭାରତର ବୋଲି ଜଣା ପଡିଛି । ପ୍ରାୟ ୪୨ଟି ଭାରତୀୟ ସହର ଏହି ଲିଷ୍ଟରେ ରହିଛନ୍ତି । ସେମାନଙ୍କ ମଧ୍ୟରୁ ସବୁଠାରୁ ଅଧିକ ପ୍ରଦୂଷିତ ମେଟ୍ରୋପଲିଟାନ୍ ସହର ଭାବେ ବିହାରର ବେଗୁସରାଇରେ ପି.ଏମ ୨ଏ.୫ର ସାନ୍ଧ୍ରତା ୧୧୮.୯ ମାଇକ୍ରୋଗ୍ରାମ୍ ପର୍ କ୍ୱୁବିକ୍ ମିଟର୍ ଥିବା ବେଳେ ଏହା ପଛକୁ ରହିଛନ୍ତି ଗୌହାଟୀ ଓ ଦିଲ୍ଲୀ ଭଳି ସହର । ତେବେ ଆଶ୍ଚର୍ଯ୍ୟର ବିଷୟ ହେଉଛି ଗତ ବର୍ଷ ଗଣନା ଘେରରେ ମଧ୍ୟ ଆସି ନଥିବା ସହର ବେଗୁସରାଇରେ ଏଥର ପ୍ରଦୂଷଣ ସବୁ ସୀମା ପାର କରିଛି, ଯାହାର ପି.ଏମ ୨.୫ର ସାନ୍ଧ୍ରତା ଗତ ବର୍ଷ କେବଳ ୧୯.୭ ରହିଥିଲା ।
ଅଷ୍ଟ୍ରେଲିଆ, ଇଷ୍ଟୋନିଆ, ଫିନଲ୍ୟାଣ୍ଡ, ଗ୍ରେନାଡା, ଆଇସଲ୍ୟାଣ୍ଡ, ମରିସସ୍ ଓ ନ୍ୟୁଜିଲ୍ୟାଣ୍ଡ ଭଳି କେବଳ ୭ଟି ଦେଶ ରହିଛନ୍ତି ଯେଉଁ ମାନେ ବିଶ୍ୱସ୍ୱାସ୍ଥ୍ୟ ସଂଗଠନ ମାର୍ଗଦର୍ଶିକା ଅନୁଯାୟୀ ପି.ଏମ ୨.୫ର ବାର୍ଷିକ ହାରାହାରି ସାନ୍ଧ୍ରତା ୫ କିମ୍ବା ତାଠାରୁ କମ୍ କ୍ୱୁବିକ୍ ପର ମିଟରର ମାନ ଦଣ୍ଡ ବଜାୟ ରଖି ପାରିଛନ୍ତି ।