କନକ ବ୍ୟୁରୋ: ଆଜି ବି ବାଧା ଦେଇପାରେ ବର୍ଷା । ଭାରତ-ନ୍ୟୁଜିଲାଣ୍ଡ ସେମିଫାଇନାଲ ମ୍ୟାଚର ବାକିଆ ଖେଳରେ ପୁଣି ବାଧକ ସାଜିପାରେ ବର୍ଷା । କାରଣ ଭାରତୀୟ ସମୟ ଅନୁସାରେ ଆଜି ସକାଳେ ମାଞ୍ଚେଷ୍ଟରରେ ବର୍ଷା ହୋଇଛି । ଆଉ ମାଞ୍ଚେଷ୍ଟର ଆକାଶରେ କଳା ବାଦଲ ଘୁରି ବୁଲୁଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଆକ୍ୟୁ ୱେଦର ଡଟ କମ ଅନୁସାରେ ଆଜି ମ୍ୟାଚ ଆରମ୍ଭ ପରେ ପରେ ହିଁ ବର୍ଷା ହେବାର ଅନୁମାନ କରାଯାଉଛି । ନ୍ୟୁଜିଲାଣ୍ଡ ୪୭ ଓଭରର ୨ୟ ବଲରୁ ବାକିଆ ଖେଳ ଆରମ୍ଭ କରିବା ପରେ ହିଁ ପଡିଆରେ ବର୍ଷା ଆରମ୍ଭ ହେବାର ଅନୁମାନ କରାଯାଇଛି । ଅପରାହ୍ଣ ୩.୩୦ରୁ ବର୍ଷା ଆରମ୍ଭ ହୋଇ ୪.୩୦ ପର୍ଯ୍ୟନ୍ତ ଚାଲିବ । ତେବେ ଏହି ବର୍ଷା ୫.୩୦ରୁ ୮.୩୦ ପର୍ଯ୍ୟନ୍ତ କମ ରହିବ ମାତ୍ର ଆକାଶରେ ବାଦଲ ଘୋଡି ରହିବ । କିନ୍ତୁ ପୁଣି ୯ଟା ୩୦ରେ ବର୍ଷା ତାର ଖେଳ ଆରମ୍ଭ କରିଦେବ ବୋଲି ଅନୁମାନ କରାଯାଇଛି ।
ତେବେ ଗତକାଲି ମାଞ୍ଚେଷ୍ଟରରେ ବର୍ଷା ଲାଗି ରହିବାରୁ ଖେଳାଯାଉଥିବା ମ୍ୟାଚକୁ ଶେଷ ମୁହୂର୍ତ୍ତରେ ଅଧାରୁ ଆଜିକୁ ସ୍ଥଗିତ ରଖାଯାଇଥିଲା । ଆଜି ବାକିଆ ମ୍ୟାଚ ଖେଳାଯିବ । ଗତକାଲି ଯେଉଁଠୁ ଖେଳ ବନ୍ଦ୍ ରହିଥିଲା ଆଜି ସେଇଠୁ ଆରମ୍ଭ ହେବ । ଅର୍ଥାତ ଆଜି ପ୍ରଥମେ କିୱି ଦଳ, ବାକି ଥିବା ଅବଶିଷ୍ଟ ଓଭରରେ ବ୍ୟାଟିଂ କରିବ । ତାପରେ ଭାରତୀୟ ଟିମ୍ ବ୍ୟାଟିଂ କରିବାକୁ ପଡିଆକୁ ଓହ୍ଲାଇବ । ଗତକାଲି କିୱି ଟିମ୍ ମ୍ୟାଚ୍ର ୪୭ ତମ ଓଭର ଖେଳୁଥିବା ବେଳେ ତୁହାକୁ ତୁହା ବର୍ଷା ହୋଇଥିଲା । ଏହାପରେ ଅମ୍ପାୟର ମ୍ୟାଚକୁ ବନ୍ଦ ରଖିଥିଲେ । ରାତି ୧୦ଟାରେ ବର୍ଷା ଟିକେ କମ ହେବାରୁ ଫିଲ୍ଡରୁ କଭର ହଟାଯାଇଥିଲା । ଅମ୍ପାୟର ପିଚ୍ର ଅନୁଧ୍ୟାନ କରିଥିଲେ ।
ହେଲେ ଏହାପରେ ପୁଣି ବର୍ଷା ଆରମ୍ଭ ହୋଇଯାଇଥିଲା । ଫଳରେ ପଡିଆକୁ ପୁଣି କଭରରେ ଘୋଡାଇ ଦିଆଯାଇଥିଲା । ଏଭଳି ସ୍ଥିତିରେ ମ୍ୟାଚ ହେବା ଅସମ୍ଭବ ହେବାରୁ ରାତି ୧୦ଟା ୫୦ରେ ମ୍ୟାଚକୁ ସ୍ଥଗିତ ରଖିବାକୁ ନିଷ୍ପତି ହୋଇଥିଲା । ମ୍ୟାଚ୍ ବନ୍ଦ ହେବା ବେଳକୁ ନ୍ୟୁଜିଲାଣ୍ଡ ୪୬ ଓଭରରେ ୫ ଉଇକେଟ୍ ହରାଇ ୨୧୧ ରନ୍ କରିଛି ।