ଆଜି ଭାରତ ନ୍ୟୁଜିଲାଣ୍ଡ ତୃତୀୟ ଦିନିକିଆ : ଶୃଙ୍ଖଳା ମୂଳପୋଛ ଲକ୍ଷ୍ୟରେ ଟିମ୍ ଇଣ୍ଡିଆ
କନକ ବ୍ୟୁରୋ : ଇନ୍ଦୋରରେ ଆଜି ଭାରତ ଓ ନ୍ୟୁଜିଲାଣ୍ଡ ତୃତୀୟ ଦିନିକିଆ ମ୍ୟାଚ୍ । ଆଉ ଏକ ସିରିଜ କ୍ଲିନସ୍ୱିପ୍ ଲକ୍ଷ୍ୟରେ ରହିଛି ଟିମ୍ ଇଣ୍ଡିଆ । ମ୍ୟାଚ୍ ଜିତିଲେ ଦିନିକିଆ ମାନ୍ୟତାରେ ନମ୍ବର ୱାନ୍ ହେବ ଭାରତ । ୨-୦ରେ ଶୃଙ୍ଖଳା କବଜା କରିବା ପରେ ଭାରତର ଆତ୍ମବିଶ୍ୱାସ ଉଚ୍ଚରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଓପନର ଶୁବମନ ଗିଲ ହାଇଦ୍ରାବଦରେ ମାଷ୍ଟରକ୍ଲାସ ବ୍ୟାଟିଂ କରିବା ସହ ସିମରଙ୍କୁ ସହାୟତା କରୁଥିବା ରାୟପୁର ପିଚରେ ବି ଚମତ୍କାର ଖେଳି ଦଳକୁ ଶଂଖଳା ବିଜୟ ଦେବାରେ ପ୍ରମୁଖ ଭୂମିକା ତୁଲାଇଥିଲେ । ଅଧିନାୟକ ରୋହିତ ଶର୍ମା ମଧ୍ୟ ପ୍ରଥମ ଦୁଇ ଦିନିକିଆରେ ଭଲ ରନ୍ କରିଥିଲେ । ତୃତୀୟ ଦିନିକିଆ ମ୍ୟାଚରେ ଇଶାନ କିଶାନ, ହାର୍ଦ୍ଦିକ ପାଣ୍ଡ୍ୟା ଓ ସୂର୍ଯ୍ୟ କୁମାର ଯାଦକଙ୍କୁ ବ୍ୟାଟିଂ ଅଭ୍ୟାସ ଲାଗି ସୁଯୋଗ ମିଳିପାରେ ।
ପ୍ରଥମ ଦୁଇ ମ୍ୟାଚ୍ରେ ବାମହାତୀ ସ୍ପିନ୍ ବିପକ୍ଷରେ ଖେଳିବା ବିରାଟ କୋହଲି ଅସୁବିଧାରେ ପଡ଼ୁଥିବା ଦେଖାଦେଇଛି । ୪ଟି ପାଳିରେ ୩ ଶତକ ଅର୍ଜନ କରିଥିବା କୋହଲି କିନ୍ତୁ ନ୍ୟୁଜିଲାଣ୍ଡ ବିପକ୍ଷ ଦୁଇଟି ଯାକ ମ୍ୟାଚ୍ରେ ମିଚେଲ ସାଣ୍ଟନରଙ୍କ ଦ୍ବାରା ଆଉଟ ହୋଇଥିଲେ । ବିଶ୍ବକପ୍ ଆଉ କିଛି ମାସ ଥିଲା ବେଳେ କୋହଲିଙ୍କୁ ଏହି ଭୁଲ୍ ସୁଧାରିବାକୁ ପଡ଼ିବ । ଶ୍ରେୟସ ଆୟରଙ୍କ ଅନୁପସ୍ଥିତରେ ସୂର୍ଯ୍ୟକୁମାରଙ୍କଠୁ ବଡ଼ ପାଳି ଆଶା ରଖିଛି ଦଳ । ତେବେ ଟ୍ବେଣ୍ଟି-୨୦ ବ୍ୟାଟର୍ ହାର୍ଦିକ ଶ୍ରୀଲଙ୍କା କିମ୍ବା ନ୍ୟୁଜିଲାଣ୍ଡ ବିପକ୍ଷରେ ନିଜ ବ୍ୟାଟ୍ରେ କମାଲ୍ ଦେଖାଇ ପାରିନାହାନ୍ତି ।
ଆଗକୁ ଟ୍ବେଣ୍ଟି-୨୦ ଶୃଙ୍ଖଳା ଏବଂ ଅଷ୍ଟ୍ରେଲିଆ ବିପକ୍ଷ ଗୁରୁତ୍ବପୂର୍ଣ୍ଣ ଟେଷ୍ଟ ଶୃଙ୍ଖଳା ଥିବାରୁ ଆୟରଙ୍କ ସ୍ଥାନରେ ସ୍ଥାନ ପାଇଥିବା ରଜତ ପଟିଦାରଙ୍କୁ ପଦାର୍ପଣ ସୁଯୋଗ ଦେବାକୁ ଦଳ ଚିନ୍ତା କରୁଛି । ଘରୋଇ ପ୍ରତିଯୋଗିତା ଏବଂ ଆଇପିଏଲ୍ରେ ପଟିଦାରଙ୍କ ପ୍ରଦର୍ଶନ ଚମତ୍କାର ରହିଥିବାରୁ ଏହି ଆଶା ଦେଖାଦେଇଛି । ବୋଲିଂରେ କିଛି ଅଦଳବଦଳ ହୋଇପାରେ । ଦ୍ରୁତବୋଲର ଉମ୍ରାନ ମଲ୍ଲିକ ଫେରିପାରନ୍ତି କିମ୍ବା କୁଲଦୀପ ଯାଦବଙ୍କ ସ୍ଥାନରେ ୟୁଝବେନ୍ଦ୍ର ଚହଲଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ମିଳିପାରେ ।
ସମ୍ଭାବ୍ୟ ଭାରତୀୟ ଦଳ : ରୋହିତ ଶର୍ମା (ଅଧିନାୟକ), ଶୁବମନ ଗିଲ୍, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦିକ ପାଣ୍ଡ୍ୟା, ଈଶାନ କିଶନ, ୱାସିଂଟନ ସୁନ୍ଦର, ମହମ୍ମଦ ସାମି, ଶାର୍ଦୁଳ ଠାକୁର/ଉମ୍ରାନ ମଲ୍ଲିକ, ମହମ୍ମଦ ସିରାଜ, କୁଲଦୀପ ଯାଦବ/ୟୁଝବେନ୍ଦ୍ର ଚହଲ।
ସମ୍ଭାବ୍ୟ ନ୍ୟୁଜିଲାଣ୍ଡ ଦଳ : ଫିନ୍ ଆଲେନ, ଡେଭନ କନୱେ, ହେନରି ନିକଲ୍ସ, ଡାରିଲ ମିଚେଲ, ଟମ ଲଥାମ (ଅଧିନାୟକ), ଗ୍ଲେନ ଫିଲିପ୍ସ, ମାଇକେଲ ବ୍ରେସୱେଲ, ମିଚେଲ ସାଣ୍ଟନର, ହେନରି ସିପ୍ଲେ, ଲୋକି ଫର୍ଗୁସନ, ବ୍ଲେୟର ଟିକନର।