ଧୂପକାଠି ପ୍ରସ୍ତୁତ କରି ନିଜେ ହୋଇଛନ୍ତି ସ୍ୱାବଲମ୍ବୀ । ଅନ୍ୟ ମାନଙ୍କ ପାଇଁ ଖୋଲିଛନ୍ତି ରୋଜଗାରର ବାଟ, ସଫଳ ଉଦ୍ୟୋଗୀ ଡମାଇଙ୍କ ପ୍ରେରଣାଦାୟୀ କାହାଣୀ ।
କନକ ବ୍ୟୁରୋ : ଧୂପକାଠି ପ୍ରସ୍ତୁତ କରି ସେ ନିଜେ ସ୍ୱାବଲମ୍ବୀ ହୋଇଛନ୍ତି । ଏହାସହ ଅନ୍ୟଙ୍କୁ ଦେଇଛନ୍ତି ରୋଜଗାରର ମାଧ୍ୟମ । ଏ ହେଉଛନ୍ତି କୋରାପୁଟ ଜିଲ୍ଲା ବୈପାରୀଗୁଡ଼ା ବ୍ଲକର ମାଠପଡ଼ା ଗ୍ରାମର ଜଣେ ସଫଳ ମହିଳା ଉଦ୍ୟୋଗୀଙ୍କ ସଂଘର୍ଷ ଓ ସଫଳତାର କାହାଣୀ । ଡ଼ମାଇ ନାୟକ ଧୂପକାଠି ପ୍ରସ୍ତୁତି ଉଦ୍ୟୋଗ କରି ଗାଁକୁ ଦେଇଛନ୍ତି ଏକ ନୂଆ ପରିଚୟ । ଜଙ୍ଗଲରୁ ସଂଗ୍ରହ ହେଉଥିବା ଝୁଣାକୁ ନିଜେ ଧୂପକାଠି ତିଆରି କରି ବ୍ୟବସାୟ ଆରମ୍ବ କରିଥିଲେ । ବିନା କେମିକାଲରେ ତିଆରି ହୋଇଥାଏ ଏହି ଧୂପକାଠି । ଏବେ ଗାଁର ମହିଳାମାନେ ମଧ୍ୟ ଏହି କାମରେ ନିଜକୁ ନିୟୋଜିତ କରି ରୋଜଗାର କରିପାରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କୋରାପୁଟ ଜିଲ୍ଲା ବୈପାରୀଗୁଡ଼ା ବ୍ଲକର ମାଠପଡ଼ା ଗ୍ରାମ । ବିକାଶ କହିଲେ ଗାଁରେ କେବଳ ଖଣ୍ଡିଏ ସ୍କୁଲ । ଜୀବିକା କହିଲେ କୁଲି କାମ କରିବା ସହ ବଣ ଜଙ୍ଗଲରୁ ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରି ବିକ୍ରି କରିବା । ହେଲେ ଏହି ଗ୍ରାମର ଜଣେ ମହିଳା ଡ଼ମାଇ ନାୟକ ଗାଁକୁ ଦେଇଛନ୍ତି ଏକ ନୂଆ ପରିଚୟ । ପରିବାରର ଆର୍ଥିକ ଅବସ୍ଥାକୁ ପରିବର୍ତନ କରିବାକୁ ଯାଇ ନିଜେ ସ୍ୱାବଲମ୍ବୀ ହେବା ସହ ଗାଁ ମହିଳା ମାନଙ୍କୁ କରିଛନ୍ତି ସ୍ୱାବଲମ୍ବୀ ।
ବୋହୂ ହୋଇ ମାଠପଡ଼ା ଗାଁକୁ ଆସିଥିଲେ ଡ଼ମାଇ । ପରିବାରର ଆର୍ଥିକ ଅବସ୍ଥା ଦେଖି ନିଜେ ରୋଜଗାର କରିବାକୁ ଅଣ୍ଟା ଭିଡ଼ିଥିଲେ । ଜଙ୍ଗଲରୁ ସଂଗ୍ରହ ହେଉଥିବା ଝୁଣାକୁ ନିଜେ ଧୂପକାଠି ତିଆରି କରି ବ୍ୟବସାୟ ଆରମ୍ଭ କଲେ । ବିନା କେମିକାଲରେ ତିଆରି ହେଉଥିବା ଏହି ଧୂପକାଠିର ଚାହିଦା ବଢିବାରୁ ଗାଁର ମହିଳା ମାନଙ୍କୁ ଏକାଠି କରି ଡ଼ୋକ୍ରା ସ୍ୱୟଂ ସହାୟକ ଦଳ ଗଠନ କଲେ । ଅଧିକ ବ୍ୟବସାୟ କରିବା ପାଇଁ ପ୍ରଶିକ୍ଷଣ କେନ୍ଦ୍ରରୁ ତାଲିମ ନେଲେ । ଝୁଣା ସହ ମଶା ଧୂପ କାଠି ମଧ୍ୟ ତିଆରି କଲେ । ଚାହିଦା ବଢିଲା । ବ୍ୟବସାୟ ବଢ଼ି଼ିଲା । ଆଖ ପାଖ ଗ୍ରାମରେ ପ୍ରଶିକ୍ଷଣ ପାଇଁ ଡ଼ମାଇକୁ ଡ଼ାକିଲେ । ପ୍ରଶାସନର ଦୃଷ୍ଟି ଆକର୍ଷଣ ହେଲା । କୋରାପୁଟର ରାଜ୍ୟସ୍ତରୀୟ ସାଂସ୍କୃତିକ କାର୍ଯ୍ୟକ୍ରମ ପରବ ଭଳି ରାଜ୍ୟର ପ୍ରତ୍ୟେକ ଜିଲ୍ଳାସ୍ତରୀୟ ମହୋତ୍ସବରେ ପ୍ରଶାସନ ତରଫରୁ ନିମନ୍ତ୍ରଣ ମିଳିଲା । ରାଜଧାନୀ ଠାରୁ ଆରମ୍ଭ କରି ଅବିଭକ୍ତ କୋରାପୁଟ ଜିଲ୍ଲା ସମେତ ବୌଦ୍ଧ, ଯାଯପୁର, କଟକ, ବାଲେଶ୍ୱର, କଟକ, ବଲାଙ୍ଗୀର, ଝାରସୁଗୁଡ଼ା, ନୟାଗଡ଼ ଗୁଣପୁରରେ ସେ ନିଜର ବ୍ୟବସାୟକୁ ପହଞ୍ଚାଇଛନ୍ତି ଓ ଏହାସହ ଅନେକ ପୁରସ୍କାର ମଧ୍ୟ ହାତେଇଛନ୍ତି ।