୨୧ ବର୍ଷ ପରେ ଭୁବନେଶ୍ୱର ଦେଖିବ କି ନୂଆ ସାଂସଦ ପ୍ରାର୍ଥୀ ? ଅଫିସର ଥିଲେ, ସାଂସଦ ହେବେ ।
ପାଟ୍ଟଶାଣୀ ଯିବା ପରେ କିଏ ଆସିବେ ?
କନକ ବ୍ୟୁରୋ : ୨୦୧୯ ନିର୍ବାଚନ ଯେତିକି ପାଖେଇ ଆସୁଛି ରାଜ୍ୟ ରାଜନୀତି ସେତିକି ଉଷ୍ମ ହେବାରେ ଲାଗିଛି । ପ୍ରତ୍ୟେକ ଦଳ ଏଥିପାଇଁ ଜୋରଦାର ପ୍ରସ୍ତୁତି ମଧ୍ୟ ଆରମ୍ଭ କଲେଣି । କଂଗ୍ରେସ ଆଗୁଆ କିଛି ପ୍ରାର୍ଥୀ ତାଲିକା ଘୋଷଣା କରିଥିବା ବେଳେ ବିଜେପି ନିଜକୁ ଆହୁରି ସଙ୍ଗଠିତ କରୁଛି । ଆଉ ଏସବୁ ଭିତରେ ଶାସକ ବିଜେଡି ନିଜର ପୁରୁଣା ଫର୍ମୁଲାରେ ନିର୍ବାଚନ ଲଢିବ ବୋଲି ଚର୍ଚ୍ଚା ହେଉଛି । ପୁରୁଣା ଫର୍ମୁଲା କହିଲେ, କିଛି ନେତାଙ୍କ ଟିକେଟ କଟାଯିବ ଓ କିଛି ନେତାଙ୍କର ନିର୍ବାଚନମଣ୍ଡଳୀ ପରିବର୍ତ୍ତନ କରାଯିବ ବୋଲି ଶୁଣିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ପୁରୁଣା ଫର୍ମୁଲା ତାଲିକାର ପ୍ରଥମ ନାଁ ଭାବେ ଏବେ ଭୁବନେଶ୍ୱର ସାଂସଦ ପ୍ରସନ୍ନ ପାଟ୍ଟଶାଣୀଙ୍କ ନାଁ ସାମ୍ନାକୁ ଆସୁଛି । ୨୦୧୯ରେ ବାବା ପାଟ୍ଟଶାଣୀଙ୍କୁ ସଂସଦରେ ନୁହେଁ ବରଂ ବିଧାନସଭାରେ ଦେଖିବାକୁ ମିଳିବ ବୋଲି ଚର୍ଚ୍ଚା ହେଉଛି । ଅଥାର୍ତ ବାବା ଲୋକସଭା ଆସନରେ ନ ଲଢି ବିଧାନସଭା ଆସନରେ ଲଢିବେ ତାଙ୍କ ପାଖ ଲୋକ କୁହାକୁହି ହେଉଛନ୍ତି । ଯାହା ଭୁବନେଶ୍ୱର ରାଜନୀତିକୁ ସରଗରମ କରିଛି ।
ବାବା ପାଟ୍ଟଶାଣୀ ଯଦି ଚଳିତ ଥର ବିଧାନସଭା ଆସନରେ ଲଢିବେ ତେବେ ତାଙ୍କ ଆସନ କାହାକୁ ଦେବ ବିଜେଡି । ଏଭଳି ଏକ ପ୍ରଶ୍ନ ରାଜଧାନୀବାସୀଙ୍କ ମନରେ ଉଙ୍କି ମାରୁଛି । ଭୁବନେଶ୍ୱରରୁ ୪ ଥର ସାଂସଦ ହେବା ପରେ ରାଜଧାନୀରେ ପାଟ୍ଟଶାଣୀ ବିରୋଧୀ ହାୱା ବହିବା ଆରମ୍ଭ ହୋଇଛି । ତେଣୁ ଏଭଳି ସ୍ଥିତିରେ ପାଟ୍ଟଶାଣୀଙ୍କୁ ଭୁବନେଶ୍ୱର ଲୋକସଭା ଆସନରୁ ପ୍ରାର୍ଥୀ ନ କରି ନୂଆଁ ମୁହଁ ବିଜେଡି ଖୋଜୁଛି ବୋଲି ଚର୍ଚ୍ଚା ହେଉଛି ।
ଶୁଣିବାକୁ ମିଳୁଛି, ଭୁବନେଶ୍ୱର ଆସନ ଉପରେ ଅଧିକାଂଶ ବିଜେଡି ନେତା ଆଖି ପକାଇଛନ୍ତି । ଆଉ ଏଥିପାଇଁ ଲବି ମଧ୍ୟ କରୁଛନ୍ତି । କିନ୍ତୁ ଏହି ଆସନ ପାଇଁ ନବୀନଙ୍କ ପସନ୍ଦର ଚେହେରା ଭାବେ ମୁମ୍ବାଇର ପୂର୍ବତନ ପୋଲିସ କମିଶନର ତଥା ବିଜେଡି ଯୁବ ବାହିନୀ ଦାୟିତ୍ୱରେ ଥିବା ଅରୂପ ପଟ୍ଟନାୟକଙ୍କୁ ଟିକେଟ ମିଳିପାରେ ବୋଲି ଚର୍ଚ୍ଚା ହେଉଛି । ଏପରିକି ଅରୂପ ମଧ୍ୟ ନବୀନଙ୍କ ଗୁଡବୁକରେ ରହିଛନ୍ତି ।
ମୁମ୍ବାଇର ପୂର୍ବତନ ପୋଲିସ କମିଶନର ଥିବା ଅରୂପ ଭୁବନେଶ୍ୱର ଆସନରେ ବିଜେଡି ପାଇଁ ଟ୍ରମ୍ପକାର୍ଡ ସାଜିବେ ବୋଲି ଚର୍ଚ୍ଚା ହେଉଛି । କାରଣ ଭୁବନେଶ୍ୱରର ଅଧିକାଂଶ ଭୋଟର ଶିକ୍ଷିତ । ତେଣୁ ଅରୂପଙ୍କ ଭଳି ସ୍ୱଚ୍ଛ ଓ ନିର୍ମଳ ଭାବମୂର୍ତ୍ତି ଥିବା ବ୍ୟକ୍ତିଙ୍କୁ ପ୍ରାର୍ଥୀ କରାଗଲେ ବେଶ ସହଜରେ ରାଜଧାନୀବାସୀ ଗ୍ରହଣ କରିନେବେ ବୋଲି ବିଜେଡି ଶିବିରରେ ଚର୍ଚ୍ଚା ହେଉଛି । ଏହାଛଡା ପୂର୍ବରୁ ମୁମ୍ବାଇର କମିଶନର ଥିବା ବେଳେ ଅରୂପ ଲୋକଙ୍କ ପାଇଁ ଅନେକ ଗୁଡିଏ କାର୍ଯ୍ୟ କରି ବେଶ ପ୍ରଂଶସା ସାଉଁଟିଛନ୍ତି । ତେଣୁ ଅରୂପଙ୍କୁ ପ୍ରାର୍ଥୀ କରି ବିଜେଡି ଭୁବନେଶ୍ୱରରେ କ୍ଲିନ ସୁଇପ କରିବାକୁ ଲକ୍ଷ୍ୟ ରଖିଛି ବୋଲି ଚର୍ଚ୍ଚା ହେଉଛି ।
ତେବେ ପ୍ରଶ୍ନ ଉଠୁଛି, ଯଦି ଅରୂପଙ୍କୁ ଭୁବନେଶ୍ୱର ଆସନରୁ ପ୍ରାର୍ଥୀ କରାଯାଏ ତେବେ ବାବା ପାଟ୍ଟଶାଣୀ କେଉଁ ଆସନରୁ ଲଢିବେ । ବିଜେଡି ଶିବିରରେ ହେଉଥିବା ଚର୍ଚ୍ଚା ଅନୁଯାୟୀ, ପାଟ୍ଟଶାଣୀଙ୍କୁ ଚିଲିକା ଆସନରେ ଲଢାଇବାକୁ ଯୋଜନା କରୁଛି ଦଳ । ଚିଲିକାରେ ଗତ ନିର୍ବାଚନରେ ବିଜେପି ଜିତିଥିବା ବେଳେ ଏହି ଆସନ ଉପରେ ନଜର ପକାଇଛି ବିଜେଡି । ଏହାଛଡା ପୂର୍ବଥର ଚିଲିକା ଆସନରେ ଲଢିଥିବା ରଘୁ ସାହୁଙ୍କୁ ଚଳିତ ଥର ବିଜେଡି ଟିକେଟ ମିଳିବ ନାହିଁ ବୋଲି ଚର୍ଚ୍ଚା ହେଉଛି ।
ଭିତିରିଆ ବିଜେଡି କରିଥିବା ସର୍ଭେ ଅନୁଯାୟୀ, ଚିଲିକା ନିର୍ବାଚନମଣ୍ଡଳୀରେ ରଘୁ ସାହୁଙ୍କ ସ୍ଥିତି ସେମିତି ଆଖିଦୃଶିଆ ନାହିଁ । ତେଣୁ ଏଠାରେ ତାଙ୍କୁ ପ୍ରାର୍ଥୀ କରି ରିସ୍କ ନେବାକୁ ଦଳ ଚାହୁଁନାହିଁ ବୋଲି ଚର୍ଚ୍ଚା ହେଉଛି । ତେଣୁ ରଘୁ ସାହୁଙ୍କ ବଦଳରେ ଚିଲିକା ଆସନ ପାଟ୍ଟଶାଣୀଙ୍କ ପାଇଁ ଫିକ୍ସ କରାଯାଇଥିବା ଶୁଣିବାକୁ ମିଳୁଛି । ମନ୍ତ୍ରୀପଦର ଅଫର ଦେଇ ପାଟ୍ଟଶାଣୀଙ୍କୁ ଲୋକସଭା ଛାଡି ବିଧାନସଭା ଲଢିବାକୁ ଦଳ ପକ୍ଷରୁ କୁହାଯାଇଥିବା ଚର୍ଚ୍ଚା ହେଉଛି । ଆଉ ଦଳ ପକ୍ଷରୁ ଦିଆଯାଇଥିବା ଅଫରକୁ କାଳେ ବାବା ପାଟ୍ଟଶାଣୀ ହଁ କରିଥିବା ଚର୍ଚ୍ଚା ହେଉଛି ।